សិល្បៈជាតិ៖ នៅថ្ងៃទី ២២ ខែវិច្ឆិកា ឆ្នាំ ២០២៣នេះ គេបានឃើញសកម្មភាពរបស់កញ្ញា ពេជ្រវត្តី សារ៉ាវឌ្ឍី រួមទាំងសិល្បការិនីក្នុងប្រព័ន្ធ-ក្រៅប្រព័ន្ធ កំពុងហាត់សមយ៉ាងសកម្មសម្រាប់ទស្សនីយភាពដ៏អស្ចារ្យក្នុងព្រឹត្តិការណ៍ «រាត្រីចងចាំ» ដែលត្រៀមធ្វើឡើងនៅលើទឹកដីអង្គរនាពេលខាងមុខនេះ។
ចំពោះការប្រារព្ធនូវព្រឹត្តិការណ៍ «រាត្រីចងចាំ» នេះឡើង គឺដើម្បីអបអរសាទរសម្បត្តិបេតិកភណ្ឌវប្បធម៌រូបី និងអរូបី ដែលត្រូវបានចុះក្នុងបញ្ជីបេតិកភណ្ឌពិភពលោក និងបេតិកភណ្ឌអរូបីនៃមនុស្សជាតិ ។ នេះជាលើកទី៤ហើយ ដែលក្រសួងវប្បធម៌និងវិចិត្រសិល្បៈ បានរៀបចំព្រឹត្តិ្កការណ៍នេះឡើង។ បន្ទាប់ពីធ្លាប់បានរៀបចំព្រឹត្តិការណ៍រាត្រីចងចាំលើកទី១ នៅលើទឹកដីអង្គរខេត្តសៀមរាប នៅឆ្នាំ ២០២០ ដែលមានអ្នកចូលរួមទស្សនាដោយផ្ទាល់ ទាំងភ្ញៀវជាតិ និងអន្តរជាតិប្រមាណជាង២ម៉ឺននាក់។
សូមជម្រាបថា ព្រឹត្តិការណ៍សិល្បៈដ៏ធំនេះ ត្រូវបានប្រមូលផ្ដុំដោយសិល្បករ សិល្បការិនី នាដកា តន្ត្រីករ និងតារាសម្តែងល្បីៗជាច្រើនបានស្ម័គ្រចិត្តចូលរួមសម្តែង។ ការស្ម័គ្រចិត្តរបស់សិល្បករទាំងអស់ ក៏បានបង្ហាញពីការពេញចិត្ត និងក្តីស្រលាញ់ពីបេះដូងចំពោះព្រឹត្តិការណ៍នេះ ក្នុងគោលបំណងបង្ហាញពីឆន្ទ:ជាកូនខ្មែរ ដើម្បីរួមគ្នាលើកស្ទួយមរតកវប្បធម៌ជាតិ។
តាមដឹងត្រួសៗ សិល្បករដែលចូលរួមសម្ដែងនៅក្នុងព្រឹត្តិការណ៍ «រាត្រីចងចាំ» ២០២៣នេះ ក៏មានដូចជា លោក ជី ដេវីត អ្នកនាង ទេព បូព្រឹក្ស អ្នកនាង មាស សុខសោភា លោកពូឃ្លាំង Top 5 Miss Grand Cambodia កញ្ញា ពេជ្រវត្តី សារ៉ាវឌ្ឍី ក្រុមឌីហ្សាញនើល្បីៗ និងសិល្បករសិល្បការិនីបុរាណសម័យជាច្រើនរូបទៀត៕
