អ្នកសិល្បៈជាច្រើនអ្នក ទាំងអ្នកចម្រៀង តារាភាពយន្ដ ចាស់ថ្មី ហាក់កំពុងមានសន្ទុះលើអាជីវកម្មអនឡាញ នៅអំឡុងឆ្នាំ២០២១នេះ។ តើអ្វីទៅជាមូលហេតុនាំឲ្យ អ្នកសិល្បករ ងាកមកចាប់អារម្មណ៍ការលក់អនឡាញ?
ឆ្នាំ២០២១ ជាឆ្នាំនៃការផ្ទុះខ្លាំងនៃជំងឺកូវីដ១៩ ជាពិសេសព្រឹត្តិការណ៍ ២០កុម្ភៈ ដែលបានអូសបន្លាយមកដល់ពេលសព្វថ្ងៃនេះ។ ជំងឺកូវីដ១៩ បានរាំងខ្ទប់មិនឲ្យមនុស្សជួបជុំគ្នាច្រើន ម៉្លោះហើយការប្រគំតន្រ្តី ការសម្ដែងសិល្បៈនានា រួមទាំងការថតភាពយន្ដផង ហាក់ស្ងប់ស្ងាត់។ ឯអាល់ប៊ុមចម្រៀង ក៏មិនសូវចេញបទថ្មីៗដែរ ដែលធ្វើឲ្យប៉ះពាល់ដល់ប្រាក់ចំណូល របស់អ្នកសិល្បៈជាច្រើនរូប។
ដើម្បីសម្របខ្លួនក្នុងការរស់នៅបរិបទថ្មី និងដើម្បីជីវភាព ក្រុមអ្នកសិល្បៈ បានងាកមកចាប់អារម្មណ៍មុខរបរអនឡាញ កុំឲ្យទំនេរ។ ការណ៍ដែលឃើញអ្នកសិល្បៈលក់អនឡាញច្រើន តាមរយៈការឡាយផ្ទាល់លក់ផលិតផលនានា ដូចជា អាហារបំប៉នសុខភាព កាបូប ខោ អាវ និងផលិតផលថែរក្សាស្បែកមុខ ទាំងឡាយលក់ជាលក្ខណៈឯកជន និងលក់ជាមួយអ្នកល្បីល្បាញលក់តាមអនឡាញស្រាប់ ដូចជា ស្រីអូន ជាដើម។
មុខរបរទាំងអស់នេះ គឺសុទ្ធសឹងតែជាមុខរបរ ដែលកំពុងទទួលការចាប់អារម្មណ៍ពីមហាជន បើទោះសម័យកាលកូវីដ១៩ កំពុងទាំងរាំងខ្ទប់មនុស្សមួយចំនួន ឲ្យនៅតែក្នុងផ្ទះក៏ដោយ។
តើអ្នកសិល្ប ឬតារាណាខ្លះ កំពុងលេចមុខលក់ផលិតផលអនឡាញ នាពេលបច្ចុប្បន្ន ?
១. លោក ណុប បាយ៉ារិទ្ធិ ជួយ Live លក់ផលិតផលកាបូប
២. កញ្ញា មាស សុខសោភា (តំណាងចែកចាយសម្រស់ធម្មជាតិ)
៣. លោក ពាក់មី
៤. លោក ឆន សុវណ្ណារាជ
៥. អ្នកកំប្លែងអ្នកនាង ស្រីខ្ញុង
៦. តារាចម្រៀងអ្នកនាង សុគន្ធ និសា
៧. តារាចម្រៀង ខាន់ ជែមស៍ (លក់ផលិតផលទឹកលាងមុខនិងធុងបាស)
៨. កញ្ញា រចនា រ៉ាវ៉ាឌី
៩. លោក ព្រីនស៍
១០. អ្នកនាង ខាត់ សុឃីម
១១. អ្នកនាង ឌី សូនិីត្តា និង លោក អេឡិច ហ្សូរ៉ា
១២. តារាសម្ដែង កែវ ឡាវីញ កូនស្រីតារាសម្ដែងជើងចាស់ អ្នកនាង កែវ កល្យាណ
១៣. លោក ជី ដេវីត និង កញ្ញា ទេព បូព្រឹក្ស
ក្រៅពីសិល្បករ និងសិល្បការិនីខាងលើ នៅមានតារាជាច្រើនដួងទៀត បាននឹងកំពុងមានសកម្មភាពយ៉ាងខ្លាំងលើការលក់ផលិតផលអនឡាញ ដែលសារព័ត៌មានត្រយងមិនអាចរៀបរាប់ឈ្មោះអស់៕
ទស្សនាវីដេអូព័ត៌មានអ្នកសិល្បៈមានសន្ទុះចាប់អាជីពលក់អនឡាញក្នុងឆ្នាំ២០២១៖
