ក្លិបបាល់ទះ Lavie Long An ដែលជាក្លិបរបស់កីឡាករ គួន ម៉ុម បានបញ្ជប់រដូវកាល ហើយកាលពីពេលថ្មីៗនេះ ដោយឈរនៅលេខ៦ ក្នុងពានរង្វាន់បាល់ទះ ជើងឯកថ្នាក់ជាតិ ឆ្នាំ២០២៣ នៅប្រទេសវៀតណាម។
ពានរង្វាន់បាល់ទះជើងឯកនៃប្រទេសវៀតណាម បានបញ្ជប់ការប្រកួតជើងទី២ហើយ ជាផ្លូវការហើយ ខណៈម្ចាស់ជើងឯកបានលើក្រុម Sanest Khanh Hoa វិញ្ញាសារ បុរស ស្របពេលដែលវិញ្ញាសារ នាទីបានលើក្រុម Ninh Binh LP Bank ។
ខណៈក្រុម Lavie Long An របស់ គួន ម៉ុម គឺឈរនៅចំណាត់ថ្នាក់លេខ ៦ ក្រោយ ឆ្លងកាត់ ៥ប្រកួត ឈ្នះ១ និងចាញ់៤ ស្របពេលនោះ Long An ស្ថិតនៅពូល C ជាមួយក្រុម Sanest Khanh Hoa, Thể Công, Hà Tĩnh, TP. Hồ Chí Minh ។
គួន ម៉ុម គឺជាកីឡាករខ្មែរទី២ បន្ទាប់ពី វឿន វាសនា ផ្លាស់ទៅចូលរួមក្លិបបាល់ទះ Lavie Long សមាជិកលីគកំពូលបាល់ទះរបស់ប្រទេសវៀតណាម ជាមួយតម្លៃខ្លួន២ម៉ឺនដុល្លារ ក្លាយជាកីឡាករបាល់ទះខ្មែរដែលមានតម្លៃខ្លួនថ្លៃជាងគេ។
សម្រាប់កីឡាករ គួន ម៉ុម បច្ចុប្បន្នមានវ័យ២៥ឆ្នាំ ជាកីឡាករដែលមានបទពិសោធន៍ខ្លាំងរបស់កម្ពុជា ដោយរូបគេធ្លាប់បានចេញទៅប្រកបអាជីពនៅប្រទេសឥណ្ឌូណេស៊ី នៅឆ្នាំ២០២០ កន្លងទៅជាមួយក្រុម Garuda Jakarta ក្នុងរដ្ឋធានីហ្សាកាតា។ យ៉ាងណាក្ដីកីឡាករូបនេះដុះចេញពីក្រុមបាល់ទះក្រសួងមហាផ្ទៃចន្លោះឆ្នាំ២០១៥ ដល់២០១៨ មុនផ្ទេរចូលរួមជាមួយក្រុមវិសាខា ពីឆ្នាំ២០១៨ ដល់២០១៩។
ត្រឡប់មកពីឥណ្ឌូណេស៊ី វិញ គួន ម៉ុម ដែលមានស្រុកកំណើតនៅខេត្តតាកែវ បានបន្តចូលរួមជាមួយក្រុមវិសាខា វិញ រហូតដល់ពេលនេះទើបគេព្រមចេញទៅបន្តអាជីពនៅក្រៅប្រទេសម្តងទៀត ពោលគឺចូលរួមក្រុម Long An ក្នុងលីគបាល់ទះវៀតណាម ជើងទី២។
សូមជម្រាបថា ក្រុម Lavie Long An ធ្លាប់ឈ្នះជើងឯក ពានរង្វាន់ Hoa Lu Cup Volleyball Tournament ពីរលើក នៅឆ្នាំ២០០៨ និង២០១១ ខណៈនៅឆ្នាំ២០១១ ដដែល Long An ក៏ជាម្ចាស់ជើងឯក the Hung Kings Cup Volleyball Tournament ថែមទៀតផង៕