សិល្បៈជាតិ៖ នាពេលថ្មីៗនេះ មន្ទីរវប្បធម៌ និងវិចិត្រសិល្បៈខេត្តកំពង់ចាម បានកោះហៅក្រុមតន្ត្រីកុសល់ប្រម៉ូតន្ត្រី មកធ្វើការអប់រំណែនាំ និងធ្វើកិច្ចសន្យាបញ្ឈប់ការប្រើប្រាស់ពាក្យពេចន៍អសីលធម៌ ដែលប៉ះពាល់ប្រពៃណីវប្បធម៌ និងសីលធម៌សង្គម។
យ៉ាងណាមិញគេបានដឹងថា ក្រុមតន្ត្រីកុសល់ប្រម៉ូតន្ត្រី គឺមានលោក កាយ កុសល ជាអ្នកដឹកនាំក្រុម និងជាម្ចាស់ផេក កុសល់ប្រម៉ូតតន្ត្រី ដែលបានបង្ហោះវីដេអូក្រុមចម្រៀងនារីអកកាដង់ ដែលបានច្រៀងឡើងនូវពាក្យអសុរសចំអេសចំអាសរំលេចកេរភេទស្ត្រីចំៗនៅលើឆាក រហូតធ្វើឱ្យមានការរិះគន់យ៉ាងខ្លាំងនៅលើបណ្ដាញសង្គម។
ដោយឡែក ការបង្ហោះមាតិកាបែបនេះ ម្ចាស់ផេកផ្ទាល់ក៏បានអះអាងនៅលើហ្វេសប៊ុកដែរថា នៅពេលដែលក្រុមចម្រៀងពួកគាត់ច្រៀងមិនល្អបែបនេះ គឺមានអ្នកស៊ែច្រើនណាស់ តែពេលដែលក្រុមគាត់កែអោយត្រូវវិញបែរជាគ្មានសន្ទុះស៊ែ។ នេះសបញ្ជាក់ថា មាតិកាច្រៀងបែបចំអេសចំអាសដែលក្រុមកុសល់ប្រម៉ូតន្ត្រី បានព្យាយាមបង្កើតឡើងនាពេលកន្លង ក្នុងគោលបំណងស្រូបទាញអ្នកលេងបណ្ដាញសង្គមឱ្យចូលមើល ដើម្បីឱ្យក្រុមចម្រៀងរបស់ខ្លួនបានល្បី ប៉ុន្តែផ្ទុយទៅវិញអ្នកលេងបណ្ដាញសង្គមបែរជាចាប់អារម្មណ៍ថា ការផលិតមាតិកាដែលខ្វះការគិតគូដិតដល់បែបនេះ គឺបានធ្វើឱ្យប៉ះពាល់ដល់សេចក្ដីថ្លៃថ្នូររបស់ស្ត្រីខ្មែរ និងសង្គមជាតិទាំងមូល។
គួរដឹងថា ក្រោយមានការកោះហៅពីប្រធានមន្ទីរវប្បធម៌ខេត្តកំពង់ ក្រុមតន្ត្រីកុសល់ប្រម៉ូតន្ត្រី បានធ្វើចំណារលិខិតកិច្ចសន្យា ដែលមានខ្លឹមសារយ៉ាងដូច្នោះ ៖ «ខ្ញុំបាទឈ្មោះ កាយ កុសល ភេទប្រុស អាយុ ៣៥ ដែលជាម្ចាស់ Page កុសល់ប្រម៉ូតតន្ត្រី។ សូមគោរពជូនលោកប្រធានមន្ទីរវប្បធម៌ និងវិចិត្រសិល្បៈខេត្តកំពង់ចាម ខ្ញុំបាទសូមធ្វើការសន្យាថា នឹងឈប់ផុសមាតិកា រូបភាព ឬ វីដេអូ និងច្រៀងដែលមានបារ៉ូលអសុរស ធ្វើឱ្យប៉ះពាល់ដល់តម្លៃវប្បធម៌ជាតិខ្មែរដ៏ផូរផង់ ក៏ដូចជា កាយវិការណាមួយដែលមិនសមរម្យទៅក្នុងបណ្ដាញសង្គមដូចជា Facebook Youtube TikTok ជាដើម ល។ ប្រសិនបើខ្ញុំបាទមិនគោរពកិច្ចសន្យានេះទេ ខ្ញុំបាទសូមទទួលខុសត្រូវមុខច្បាប់ជាធរមាន»៕