សិល្បៈជាតិ៖ ប្រជាជនខ្មែរមានវប្បធម៌ប្រើប្រាស់ទូកតាំងពីយូរណាស់មកហើយ។ មកទល់នឹងបច្ចុប្បន្ននេះ ការប្រើប្រាស់ទូករបស់ប្រជាពលរដ្ឋខ្មែរនៅតែមានសារៈសំខាន់សម្រាប់បម្រើដល់នេសាទ និងធ្វើដំណើររបស់អ្នកស្រុកនៅតាមមាត់ស្ទឹង ទន្លេ ឬអ្នកភូមិបណ្ដែតទឹក ពិសេសអាចយកទៅចូលរួមប្រណាំងលេងកម្សាន្ត ក្នុងឱកាសព្រះរាជពិធីប្រណាំងទូកផងដែរ។
ពីដើមទូក«ង» គឺជាប្រភេទទូកចម្បាំងទ័ពជើងទឹករបស់ខ្មែរ សម្រាប់ការពារបូរណភាពទឹកដី ដែលរៀបចំឡើងយ៉ាងជំនាញ និងមានក្រឹត្យក្រមត្រឹមត្រូវបំផុត។ ការណ៍ដែលគេហ៊ាននិយាយបែបនេះ ក៏ព្រោះតែគេសម្អាងទៅលើចម្លាក់ទូកចម្បាំងនេះ នៅលើប្រាសាទបាយ័ន ដែលបង្ហាញពីភាពអង់អាចក្លាហានរបស់កងទ័ពជើងទឹកខ្មែរ។ ក៏ប៉ុន្ដែ នៅពេលបច្ចុប្បន្ន ទូក«ង» បានក្លាយជាទូកដ៏មានប្រជាប្រិយភាពបំផុតសម្រាប់ប្រជាពលរដ្ឋខ្មែរ ពិសេសនៅក្នុងព្រះរាជពិធីប្រណាំងទូក។
នៅក្នុងជំនឿខ្មែរ មនុស្សម្នារតែងនិយាយថា បើចង់ឱ្យទូកលឿន និងមានជ័យជម្នះក្នុងការប្រណាំង គឺផ្អែកទៅលើការដាក់គោរមងារ ទូក«ង» ដែលគេជឿជាក់លើគោលគំនិតនិយមមួយនេះ ដោយផ្សារភ្ជាប់នឹងទស្សនៈ និងជំនឿលើអ្វីមួយដែលគេជឿ។ ជំនឿដាក់ឈ្មោះទូកនេះ គឺដោយសារតែគេយល់ថា ទូក«ង» ជាវត្ថុដ៏ពិសិដ្ឋដែលមានព្រលឹង ឬបារមីកាន់។ ហេតុតែអត្ថន័យនៃជំនឿលើវិញ្ញាណនេះហើយ ទើបប្រជាជនខ្មែរថែរក្សាតម្កល់ទូកទុកដោយប្រយ័ត្ន និងត្រឹមត្រូវបំផុតក្នុងបរិវេណវត្ត ហើយនៅពេលចូលរួមប្រណាំងម្តងៗ គេត្រូវធ្វើពិធីក្រុងពាលីដាក់ទូកចុះលើទឹក ដើម្បីឱ្យទូករឹតតែមានកម្លាំងខ្លាំងទៅតាមបារមីនោះ។
គេនៅចាំបានថា កម្ពុជាធ្លាប់សាងទូក«ង» ដែលវែងជាងគេដើម្បីបំបែកឯតទគ្គកម្មពិភពលោកនេះ នៅអំឡុងឆ្នាំ ២០១៨ ដោយប្រើរយៈពេល ៦ ខែក្នុងការសាងសង់ ដោយមានការជួយជ្រោមជ្រែងពីអភិបាលខេត្ត មន្ត្រីរាជការ យុវជន និស្សិត និងប្រជាពលរដ្ឋ។
ទូក«ង» នេះត្រូវបានប្រសិទិ្ធនាមថា «កម្ភោជិកបុត្តាខេមរាតរី» មានន័យថា ទូក«ង»របស់កូនខ្មែររស់នៅក្នុងដែនដីកម្ពុជា» ហើយទូកនេះធ្វើអំពីឈើគគីម្សៅ មានបណ្តោយ៨៧,៣ម៉ែត្រ និងទទឹងប្រវែង១,៩៤ម៉ែត្រ និងអាចផ្ទុកមនុស្សចំនួន១៧៩នាក់។ ការកសាងទូកងនេះនៅក្នុងបរិបថសង្គមខ្មែរ គឺមានគោលបំណងសំខាន់ៗចំនួន ៤ ដូចជា៖
ទី១ ដើម្បីរំឭកនឹកគុណដល់ប្រវត្តិសាស្ត្រទូកងដែលត្រូវបានប្រើប្រាស់ដោយព្រះមហាក្សត្រខ្មែរ ជំនាន់ដើម ក្នុងបុព្វហេតុការការពារជាតិមាតុភូមិ ពើគឺដើម្បីរំលឹក និងចងចាំពីគុណបំណាច់របស់បុព្វ បុរសខ្លួន ដែលបានរំដោះទឹកដីឱ្យរួចពីការត្រួតត្រារបស់ខ្មាំងសត្រូវ ក៏ដូចជាដើម្បីសំដែងមនោសញ្ចេតនា ដឹងគុណចំពោះ ទន្លេមេគង្គនិងទន្លេសាប ដែលបាននាំដីល្បាប់មកស្រោយស្រពដល់ទឹកដីកម្ពុជា។
ទី២ ដើម្បីលើកកិត្យានុភាពជាតិដោយបង្ហាញពិភពលោកថា កម្ពុជាបានបង្កើតស្នាដៃដ៏អស្ចារ្យ
ទី៣ ដើម្បីជំរុញ ទឹកចិត្តស្នេហាជាតិសាមគ្គីភាពរបស់យុវជន និងមនុស្សជំនាន់ក្រោយ
ទី៤ ជួយលើកស្ទួយដល់សេដ្ឋកិច្ចជាតិតាមរយៈការទាក់ទាញភ្ញៀវទេសចរផងដែរ៕
