តំណាងក្រុមបាល់ទាត់ខេត្តត្បូងឃ្មុំ និងខេត្តកំពង់ចាម សុទ្ធតែបង្ហាញចំណាប់អារម្មណ៍តាំងចិត្តរៀងៗខ្លួន មុនការប្រកួតវគ្គផ្ដាច់ព្រ័ត្រពានរង្វាន់បាល់ទាត់សម្តេចតេជោ ហ៊ុន សែន (Hun Sen Cup) ជើងឯកថ្នាក់ខេត្តឆ្នាំ២០២៣ នៅថ្ងៃសុក្រ សប្ដាហ៍នេះ។
នៅក្នុងសន្និសីទសារព័ត៌មានព្រឹកថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០២៣ ក្នុងពហុកីឡដ្ឋានជាតិ លោក អ៊ីវ សារី គ្រូបង្វឹកក្រុមខេត្តត្បូងឃ្មុំ បានលើកឡើងថា ទោះធ្លាប់ឈ្នះក្រុមកំពង់ចាមទាំង២ជើងក្នុងវគ្គចែកពូល តែលោកគិតថា នឹងនៅតែជាជំនួបតានតឹង។ ដូច្នេះការប្រកួតផ្ដាច់ព្រ័ត្រនេះ នឹងមិនមានប្រៀបខ្លាំងជាងគ្នាប៉ុន្មានទេ។ ម្យ៉ាងទៀត ក្រុមទាំង២ក៏មកពីខេត្តជាប់គ្នា ហើយកីឡាករក៏ធ្លាប់លេងជាមួយគ្នា។ យ៉ាងណា លោកនៅតែរំពឹងថា ក្រុមរបស់លោកនៅតែអាចដណ្ដើមបានជ័យជម្នះ។
លោក អ៊ីវ សារី បន្តថាក្រុមលោកធ្វើបានល្អនៅតំបន់ការពារ តែសម្រាប់បម្រើ និងប្រយុទ្ធ វិញ មិនបានរលូន១០០ភាគរយទេ ព្រោះអវត្តមានកីឡាករមួយចំនួន។ លោកបានចាត់ទុកថាក្រុមខេត្តកំពង់ចាម លេងបានល្អក្នុងបច្ចេកទេស build up ហើយបម្រើក៏ល្អថែមទៀត ជាពិសេសការលេងវាយបក។
ជាមួយគ្នានេះដែរលោក ងួន បូរី គ្រូបង្គោលក្រុមខេត្តកំពង់ចាម វិញបានវាយតម្លៃថា ការឈានដល់វគ្គផ្ដាច់ព្រ័ត្រនេះសុទ្ធតែបានការរួមចំណែកពីសមាជិកក្រុមទាំងអស់ តាំងពីថ្នាក់ដឹកនាំ រហូតដល់កីឡាករ និងក្រុមការងារ។
លោកបានសិក្សា និងកែប្រែចំណុចខ្វះខាតក្រុមយ៉ាងល្អិតល្អន់ ពិសេសពីពេលចាញ់ត្បូងឃ្មុំ កន្លងទៅ ដែលលោកគិតថា មិនមែនជាលទ្ធផលអាក្រក់ណាស់ណាទេ។ លោកប្ដេជ្ញាថា នឹងយកជ័យជម្នះឱ្យបានសម្រាប់ការប្រកួតវគ្គផ្ដាច់ព្រ័ត្រលើកដំបូងនេះ។
ការប្រកួតវគ្គផ្ដាច់ព្រ័ត្រ ពានរង្វាន់ សម្ដេចអគ្គមហាសេនាបតីតេជោ ហ៊ុន សែន ថ្នាក់ខេត្ត ២០២៣ នឹងប្រព្រឹត្តទៅនៅពហុកីឡដ្ឋានជាតិអូឡាំពិក វេលាម៉ោង៦និង៣០នាទីល្ងាច។ ចំណែកការប្រកួតយកលេខមេដាយសំរឹទ្ធរវាងក្រុមខេត្តបន្ទាយមានជ័យ និងក្លិបបាល់ទាត់សន្តិភាពខេត្តកំពង់ធំ នឹងធ្វើឡើងនៅម៉ោង៣និង៣០នាទីរសៀល៕
