កញ្ញាឯកដ៏ឆ្លាតវៃរបស់កម្ពុជា (Miss Wisdom Cambodia) កញ្ញា ហុក សារិតុលា បានធ្វើដំណើរទៅដល់ទឹកដីខេត្តបាត់ដំបង ដែលជាទឹកដីកំណើតរបស់ខ្លួនហើយ កាលពីថ្ងៃទី៤ ខែសីហា ឆ្នាំ២០២១។
ទៅដល់ទឹកដីកំណើតកញ្ញា ហុក សារិតុលា មិនភ្លេចនាំយកមកុដនិងឈាងទៅគោរពបូជាលោកតាដំបងក្រញូងដែលជាទីសក្ការៈបូជារបស់អ្នកខេត្តបាត់ដំបងនោះឡើយ។ រូបភាពរបស់កញ្ញាត្រូវបានមហាជនមានការសង្ស័យថាតើកញ្ញាឯកដ៏សោភារូបនេះទៅលាបំណន់ លាមាត់ លាក ក្រោយបានទទួលជ័យជំនះឬក៏យ៉ាងណាដែរ?
ចំពោះរឿងនេះ កញ្ញា តុលា បានសើចហើយឆ្លើយប្រាប់សារព័ត៌មានត្រយងថា ជាការពិតណាស់ កញ្ញាគឺជាអ្នកខេត្តបាត់ដំបង ដូច្នេះហើយពេលមកដល់ទឹកដីកំណើតគឺមកគោរពបូជាលោកតាដំបងក្រញូងដែលជាម្ចាស់ថែរក្សាទឹកដីគឺជាការគួរ តែកញ្ញាក៏មិនបដិសេធដែរថា អ្នកម្ដាយនិងបងស្រី ពិតជាបានមកសុំឱ្យកញ្ញាមានសេចក្ដីសុខក្នុងពេលប្រកួតឆ្ងាយផ្ទះ និង សុំឱ្យកញ្ញាទទួលបានជ័យជំនះ ដូច្នេះកញ្ញាក៏មកជាមួយអ្នកទាំងពីរនិងឆ្លៀតថតរូប រួមជាមួយនឹងលោកតាដំបងក្រញូង ដែលជានិមិត្តរូបរបស់ខេត្តបាត់ដំបង ហើយផុសបង្ហាញលើបណ្ដាញសង្គម ដើម្បីជាមោទកភាព សម្រាប់បងប្អូនអ្នកខេត្តបាត់ដំបងដែលកញ្ញាអាចធ្វើបានដណ្ដើមមកុដជ័យលាភីជាមុខមាត់និងកិត្តិយសសម្រាប់ស្រុកកំណើតរបស់កញ្ញា។
គួរដឹងថាកញ្ញា ហុក សារិតុលា បច្ចុប្បន្នជាសិស្សថ្នាក់ទី១២ មានបងប្អូន ៣នាក់ ជាកូនស្រីពីរ ក្នុងគ្រួសារដែលមានបងប្អូនសុទ្ធតែស្រីសុទ្ធ។ កញ្ញា ហុក សារិតុលា មុននឹងក្លាយជាម្ចាស់ជ័យលាភី Miss Wisdom Cambodia ឆ្នាំ២០២១ កញ្ញាធ្លាប់ប្រកួត Miss Cambodia ឆ្នាំ២០២០ តែមិនទទួលបានជោគជ័យ៕