អតីតគ្រូបង្វឹកអង្គរថាយហ្គឺរ គឺលោក Alistair Heath ថាខ្លួនមិនសោកស្តាយចំពោះ «បទពិសោធន៍ការងារ» ដ៏ឆ្កួតលីលារយៈពេល ១៨ខែរបស់ខ្លួននៅក្នុងតំបន់អាស៊ីអាគ្នេយ៍ បើទោះបីពេលនេះរូបលោកងាកទៅរកការងារជាមួយក្លិបនៅស្រុកកំណើត នៃប្រទេសអង់គ្លេសវិញក៏ដោយ។
គួរដឹងថាលោក Alistair Heath គ្រូបង្វឹកជនជាតិអង់គ្លេស វ័យ៣៩ឆ្នាំ កាន់អាជ្ញាបណ្ណ UEFA A-License ត្រូវបានក្លិបបាល់ទាត់អង្គរថាយហ្គឺរ សមាជិកលីគកំពូលកម្ពុជា បញ្ចប់តំណែងកាលពីថ្ងៃទី១ ខែកញ្ញា ឆ្នាំ២០២៣ ក្រោយចាយពេលអស់រយ:ពេល១៨ខែ នៅលើទឹកដីសៀមរាប។
លោក Alistair Heath បានបោះបង់ការងារ «សុខស្រួល-Comfort zone» ជាគ្រូបង្វឹកក្រុមយុវជនរបស់ក្លិប Leicester City ព្រមទាំងបានកាត់ប្រាក់ខែយ៉ាងច្រើន ដើម្បីផ្លាស់មកកាន់ប្រទេសកម្ពុជា ក្នុងនាមជាគ្រូបង្វឹកអង្គរថាយហ្គឺរ ប៉ុន្តែចុងក្រោយលោកត្រូវបានគេបណ្តេញចេញពីតំណែងតាមរយ: Call តាមប្រព័ន្ធ Zoom ដោយប្រើពេលត្រឹមតែ ២០ វិនាទីប៉ុណ្ណោះ។
ការពិតទៅក្លិបបាល់ទាត់អង្គរថាយហ្គឺរ គ្មានកន្លែងហ្វឹកហាត់ គ្មានផ្កាឈូកងូតទឹក ហើយពេលខ្លះក៏គ្មានឧបករណ៍ហាត់ប្រាណផងដែរ ដូច្នេះយើងត្រូវជិះកង់បីទៅផ្ទះខ្ញុំ ដើម្បីយកឧបករណ៍មុនពេលហ្វឹកហាត់។
កីឡាករក្នុងស្រុកនៅខេត្តសៀមរាបទទួលបានប្រាក់ខែប្រហែល ២៥០ដុល្លារក្នុងមួយខែ ខណ:អតីតខ្សែការពារក្រុម Cardiff គឺកីឡាករ Ben Nugent ទទួលបានច្រើនជាងនេះបន្តិច។ លោក Alistair Heath បន្តទៀតថា៖«ខ្ញុំមិនប្រកាន់នោះទេ ខ្ញុំទទួលបានប្រាក់ខែដំបូង ១០០០ដុល្លារ រហូតដល់ ១៥០០ដុល្លារ»។
ប៉ុន្តែ Alistair Heath នៅតែថាខ្លួនមិនសោកស្តាយចំពោះ «បទពិសោធន៍ការងារ» នៅអាស៊ីអាគ្នេយ៍ ខណ:រូបលោកក៏បានបន្សល់ទុកនូវស្នាមសាក់ប្រាសាទអង្គរវត្តនៅលើកដៃ និងរូបខ្លានៅលើដៃ មុនចាកចេញពីប្រទេសកម្ពុជា។
បច្ចុប្បន្នក្លិបបាល់ទាត់អង្គរថាយហ្គឺរ ក្រោមការដឹកនាំរបស់លោក នី យុទ្ធ គ្រូបង្គោល (បណ្ដោះអាសន្ន) ស្ថិតនៅលេខ៩ នៃលីគកំពូលកម្ពុជា ក្រោយឆ្លងកាត់១២ប្រកួត ឈ្នះ៣ ស្មើ២ និងចាញ់៧ មាន១១ពិន្ទុ៕
