ទីបំផុតអ្នកចាំទី អ៊ុំ សេរីរ័ត្ន បង្ហាញខ្លួនក្នុងជម្រើស១១នាក់ដំបូងសារថ្មីក្នុងជំនួប Tiffy Army ចាញ់ភ្នំពេញក្រោន ៣-០ នៅកីឡដ្ឋានស្តាតចាស់ សប្តាហ៍ទី១២ នៅលីគកំពូលកម្ពុជា កាលពីយប់ថ្ងៃទី៤ ខែធ្នូ ឆ្នាំ២០២៣ ក្រោយខកខានជិត៣ឆ្នាំ ប្រើពេលសរុប១០០៤ថ្ងៃ។
គួរដឹងថាអ្នកចាំទី អ៊ុំ សេរីរ័ត្ន ចាប់ផ្ដើមមានបញ្ហារបួសសរសៃជង្គង់ MCL នៅឆ្នាំ ២០១៨ ហើយក៏បានចេញទៅព្យាបាលនៅប្រទេសវៀតណាម ដោយត្រូវសម្រាករយៈពេលជាង១០ខែ។
របួសរហែកសរសៃជង្គង់ របស់ អ៊ុំ សេរីរ័ត្ន កើតមានឡើងក្រោយប្រកួតលីគកំពូលកម្ពុជា ក្នុងជុំ១ ហើយការដែលដឹងថាមានរបួសនេះ ដោយសារសេរីរ័ត្ន យល់ថាជើងស្ដាំរបស់ខ្លួនមិនល្អដូចដើម។ ក្រោយឆ្លុះមើលទើបដឹងថារហែកសរសៃជង្គង់។
បន្ទាប់ពីរបួសជាសះស្បើយ អ៊ុំ សេរីរ័ត្ន បានចូលលេងឡើងវិញនៅចុងឆ្នាំ ២០១៩។ លុះលីគកំពូលកម្ពុជាដំណើរការនៅឆ្នាំ ២០២០ រូបគេបង្ហាញខ្លួនបានតែ៣ប្រកួតបុណ្ណោះ ក៏របួសសរសៃម្តងទៀត តែមិនអាចទៅព្យាបាលនៅក្រៅប្រទេសបានទេ ដោយសារការផ្ទុះនៃជំងឺកូវីដ-១៩។ វិបត្តិនេះធ្វើឱ្យគេសម្រេចព្យាបាលនៅក្នុងប្រទេសកម្ពុជា ហើយនេះគឺជាលើកទី២ វះកាត់របួសសរសៃជង្គង់។
អ៊ុំ សេរីរ័ត្ន ធ្លាប់លើកឡើងថា ៖«ទោះបីខ្ញុំមានរបួសហ្វឹកហាត់មិនកើត ក៏ខ្ញុំមិនឃ្លាតឆ្ងាយពីបាល់ទាត់និងមិត្តរួមក្រុម របស់ខ្ញុំដែរ ហើយពិតខ្ញុំសោកស្ដាយមិនបានចូលរួមជួយក្រុមនៅលីគកំពូលកម្ពុជា ដោយសារត្រូវវះកាត់ជង្គង់ជាលើកទី២ជាចាំបាច់បំផុត»។
យ៉ាងណាមិញអ្វីដែលគេចង់ចាំ អ្នកចាំទី អ៊ុំ សេរីរ័ត្ន បំផុតនោះគឺរូបគេបង្ហាញខ្លួនក្នុងក្រុមជម្រើសជាតិកម្ពុជា ដោយបានជួយសង្គ្រោះបាល់ពិន័យ១១ម៉ែត្រ របស់ខ្សែប្រយុទ្ធជប៉ុន Shinji Okazaki ក្នុងព្រិត្តិការណ៍ជម្រុះ FIFA World Cup Russia ២០១៨ ជុំទី២ប្រចាំតំបន់អាស៊ីឆ្នាំ ២០១៥ នៅពហុកីឡដ្ឋានជាតិ (ស្តាតអូឡាំពិក)៕
