ពានរង្វាន់ជម្រើសជើងឯកខេមបូឌានព្រីមៀរលីគ ឆ្នាំ២០២៣/២៤ សប្តាហ៍ទី១៣ នឹងចាប់ផ្តើមនៅល្ងាចថ្ងៃទី៨ ខែធ្នូនេះ ដោយជាជំនួបរវាងក្លិបបាល់ទាត់ភ្នំពេញក្រោន និងក្លិបបាល់ទាត់ណាហ្គាវើលដ៍ ក្នុងកីឡដ្ឋាន Smart RSN នៅវេលាម៉ោង ៦:៣០នាទីល្ងាច។
ក្នុងនោះគ្រូបង្វឹកភ្នំពេញក្រោន លោក Oleg Starynskyi និយាយមុនជំនួប នៃការប្រកួតជាមួយណាហ្គាវើលដ៏នៅល្ងាចថា៖«យើងរង់ចាំការប្រកួតនេះ ហើយចង់អរគុណទៅដល់ណាហ្គាវើលដ៏ដែលបានផ្លាស់ប្តូរពេលវេលាប្រកួត ដើម្បីឲ្យយើងមានពេលវេលាសម្រាប់ការត្រៀមខ្លួនលេង AFC CUP »។
លោកបានបន្តថា៖ «ខ្ញុំសង្ឃឹមថានឹងមានអ្នកគាំទ្រមកទស្សនាច្រើន ហើយពួកយើងក៏ធ្វើឲ្យអស់ពីសមត្ថភាពដើម្បីឈ្នះការប្រកួតដូចគ្នា។ កីឡាកររបស់យើងដែលមានបញ្ហារបួសនៅប្រកួតមុននោះកំពុងតែមានភាពប្រសើរឡើងហើយ នេះគឺជាចំនុចវិជ្ជមាន។ ពួកគេកំពុងមានបញ្ហាមួយចំនួន ដូច្នេះអ្នកទាំងអស់គ្នានឹងបានដឹងនៅការប្រកួតនេះ»។
បច្ចុប្បន្ន ភ្នំពេញក្រោន ស្ថិតនៅចំណាត់ថ្នាក់លេខ ២ ឆ្លងកាត់១២ប្រកួត ឈ្នះ៨ ចាញ់២ ស្មើ ១ មាន ២៦ពិន្ទុក្នុងដៃ ខណ:ណាហ្គាវើលដ៍ ស្ថិតនៅចំណាត់ថ្នាក់លេខ ៨ ឆ្លងកាត់ ១២ប្រកួត ឈ្នះ ៣ស្មើ៤ និងចាញ់ ៥ មាន១៣ពិន្ទុ។
ក្រុមភ្នំពេញក្រោន តំណាងកម្ពុជា នឹងបន្តជួប Shan United FC របស់មីយ៉ាន់ម៉ា ប្រកួតទី៦ នៅថ្ងៃទី១៤ ខែធ្នូ ឆ្នាំ២០២៣ ធ្វើឡើនៅក្នុងកីឡដ្ឋានTHUWUNNA STADIUM ស្ថិតក្នុង YANGON ប្រទេសមីយ៉ាន់ម៉ា៕
