ក្លិប Win Streak សមាជិកលីគបាល់ទះនៅតៃវ៉ាន់ (Enterprise Volleyball League) របស់ វឿន វាសនា បន្តរកបានជ័យជម្នះលើក្រុម Changhua SDTV ក្នុងលទ្ធផល ៣សិតទល់នឹង០ (២៥-២០, ២៥-២១, ២៥-២០) កាលពីយប់ថ្ងៃទី១០ ខែធ្នូ ឆ្នាំ២០២៣។
ទស្សនាវីដេអូពេញនៃការប្រកួតរវាង Win Streak ប៉ះ Changhua SDTV៖
គួរដឹងថាមុនធ្វើដំណើរទៅប្រទេសតៃវ៉ាន់ កីឡាករ វឿន វាសនា សមាជិកក្រុមបាល់ទះជម្រើសជាតិកម្ពុជា ទទួលបានប្រាក់ឧបត្ថម្ភពី ឯកឧត្តមអភិសន្តិបណ្ឌិត ស សុខា ៥០០០ដុល្លារ ដើម្បីចូលរួមជាមួយក្រុមបាល់ទះ Win Streak។
វឿន វាសនា បានបង្ហោះសារនៅលើហ្វេសប៊ុកផ្ទាល់ថា៖ «សូមគោរពអរគុណ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងលោកជំទាវ កែ សួនសុភី ដែលឧបត្ថម្ភថវិកាចំនួន៥ពាន់ដុល្លាជាលើកទឹកចិត្តបន្ថែមដល់រូបខ្ញុំតាមរយៈលោកបណ្ឌិត អាំង សិរីពិសិដ្ឋ អគ្គលេខាធិការសម្រាប់បន្តដំណើរទៅលេងលីគកំពូលនៅតៃវ៉ាន់ ប្រទេសចិន។ សូមគោរពជូនពរឯកឧត្តមអភិសន្តិបណ្ឌិត និងលោកជំទាវ បងបណ្ឌិតអគ្គលេខា ជួបតែពុទ្ធពរទាំងបួនប្រការ និងជោគជ័យគ្រប់ភារកិច្ចសម្រាប់ជាតិ និងប្រជាជន»។
ការប្រកួតលីគបាល់ទះតៃវ៉ាន់ Enterprise Volleyball League មានសមាជិកចូលរួមចំនួន ៦ក្រុម រួមមាន Conti Sports, TMFI Falcons, Mizuno, Taichung Apollo, Taipower និងWin Streak។ ដោយការប្រកួតនៅសប្ដាហ៍ទី១ បានចាប់ផ្ដើចាប់ពីថ្ងៃទី១៤ តុលា នឹងគ្រោងបញ្ចប់វគ្គសន្សុំពីន្ទុនៅសប្ដាហ៍ទី១៨ ថ្ងៃទី៩ ខែមីនា ឆ្នាំ២០២៤៕