ភ្នំពេញ៖ ទីភ្នាក់ងារសារព័ត៌មានវៀតណាម(VIETNAM NEWS AGENCY) បានចុះផ្សាយថា ភាគីកម្ពុជានិងវៀតណាម មានមហិច្ឆិតាបង្កើនទំហំពាណិជ្ជកម្មទ្វេភាគីឱ្យដល់ ២០ ពាន់លានដុល្លារនាពេលអនាគត ខណៈវៀតណាមបាន ឈានមុខគេក្នុងចំណោមប្រទេសក្នុងតំបន់អាស៊ានដែលមានវិនិយោគិនច្រើននៅកម្ពុជា។ ការចេញផ្សាយនេះ អំឡុងពេលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដឹកនាំគណៈប្រតិភូជាន់ខ្ពស់កម្ពុជាច្រើនរូបទៀត ទៅបំពេញទស្សនកិច្ចផ្លូវការនៅសាធារណរដ្ឋសង្គមនិយមវៀតណាម រយៈពេល២ថ្ងៃ ចាប់ពីថ្ងៃទី១១ ដល់ថ្ងៃទី១២ ខែធ្នូ ឆ្នាំ២០២៣។
នាយករដ្ឋមន្រ្តីកម្ពុជា(ឆ្វេង)និងនាយករដ្ឋមន្រ្តីវៀតណាម(ស្តាំ)។
ទីភ្នាក់ងារសារព័ត៌មានវៀតណាមមួយនេះបន្តថា ភាគីនាយករដ្ឋមន្រ្តីវៀតណាម លោក ផាម មិញជិញ (Pham Minh Chinh) បានអបអរសាទរចំពោះសមិទ្ធិផលសំខាន់ៗដែលរដ្ឋាភិបាលកម្ពុជាសម្រេចបានក្រោមការដឹកនាំរបស់សម្តេច ហ៊ុន សែន និងបង្ហាញទំនុកចិត្តខ្ពស់ក្រោមការដឹកនាំរបស់សម្តេច ហ៊ុន ម៉ាណែត។ នាយករដ្ឋមន្រ្តី វៀតណាម ជឿជាកថា កម្ពុជានឹងបន្តសម្រេចបាននូវសមិទ្ធិផលថ្មីៗក្នុងការអភិវឌ្ឍន៍ប្រទេស រួមទាំងគោលដៅប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅ ២០៣០ និងជាប្រទេសមានប្រាក់ចំណូលខ្ពស់នៅឆ្នាំ ២០៥០។
ចំពោះកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគវិញ កាសែតវៀតណាមខាងលើបន្ថែមទៀតថា នាយករដ្ឋមន្ត្រីទាំងពីរបានឯកភាពគាំទ្រគ្នាទៅវិញទៅមកក្នុងការកសាងសេដ្ឋកិច្ចឯករាជ្យ ភាពពឹងលើខ្លួនឯង សមាហរណកម្មអន្តរជាតិ និងសេដ្ឋកិច្ចប្រកបដោយប្រសិទ្ធភាព។ ប្រទេសទាំងពីរនឹងពង្រឹងការតភ្ជាប់សេដ្ឋកិច្ច រួមទាំងការតភ្ជាប់ហេដ្ឋារចនាសម្ព័ន្ធ និងក្របខ័ណ្ឌគោលនយោបាយ ជំរុញពាណិជ្ជកម្មទ្វេភាគី ជាពិសេសពាណិជ្ជកម្មតាមព្រំដែន និងកិច្ចសហប្រតិបត្តិការអភិវឌ្ឍន៍សេដ្ឋកិច្ចក្នុងតំបន់។
ពិធីចុះMOUរវាងប្រទេសកម្ពុជានិងវៀតណាម។
ភ្ជាប់ជាមួយគ្នានោះ ភាគីទាំងពីរបានឯកភាពជំរុញ និងសម្រួលដល់សកម្មភាពអាជីវកម្មរបស់សហគ្រាសមកពីប្រទេសទាំងពីរផងដែរ។
តាមប្រភពរបស់ទីភ្នាក់ងារសារព័ត៌មានវៀតណាមដដែរបញ្ជាក់ថា វៀតណាមនៅតែជាប្រទេសមានវិនិយោគិនច្រើនឈានមុខគេក្នុងតំបន់អាស៊ានដែលដាក់ទុននៅកម្ពុជា ដោយមានគម្រោងសកម្មចំនួន ២០៥ មានដើមទុនចុះបញ្ជីសរុបចំនួន ២.៩៥ ពាន់លានដុល្លារសហរដ្ឋអាមេរិក។
នៅឆ្នាំ២០២២ ទំហំពាណិជ្ជកម្មវៀតណាម-កម្ពុជាកើនឡើងជិត ១១% បើធៀបនិងឆ្នាំ២០២១ គឺឈានដល់ជិត ១១ប៊ីលានដុល្លារ។ ចំណែកការនាំចេញរបស់វៀតណាមមកកម្ពុជាមានចំនួន ៥,៧៥ ប៊ីលានដុល្លារ កើនឡើង ១៩% ធៀបនឹងរយៈពេលមួយឆ្នាំ ខណៈការនាំចូលពីកម្ពុជាសម្រេចបាន ៤,៨២ ប៊ីលានដុល្លារ កើនឡើង ២,៤៨% ។
រីឯ ១១ខែនៃឆ្នាំ២០២៣ ពាណិជ្ជកម្មរវាងវៀតណាមនិងកម្ពុជាមានចំនួនសរុបជិត ៨ ពាន់លានដុល្លារ។ វៀតណាមជាដៃគូពាណិជ្ជកម្មធំទីបីរបស់កម្ពុជា និងជាដៃគូពាណិជ្ជកម្មធំបំផុតក្នុងសមាគមប្រជាជាតិអាស៊ីអាគ្នេយ៍ (អាស៊ាន)។
វៀតណាមបាននិងកំពុងបង្កើតគម្រោងជាច្រើននៅកម្ពុជា ក្នុងការផ្គត់ផ្គង់វត្ថុធាតុដើមសម្រាប់ផលិតកម្មឧស្សាហកម្មក្នុងស្រុក ជាពិសេសកៅស៊ូ។ ដោយឡែក កម្ពុជាក៏ជាទីផ្សារសម្រាប់ផលិតផលដែក និងលោហៈ សម្ភារៈសំណង់ អាហារកែច្នៃ និងទំនិញប្រើប្រាស់ពីប្រទេសវៀតណាមផងដែរ។
សូមបញ្ជាក់ថា អំឡុងពេលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទៅបំពេញទស្សនកិច្ចផ្លូវការនៅសាធារណរដ្ឋសង្គមនិយមវៀតណាម រយៈពេល២ថ្ងៃ អនុស្សារណៈយោគយល់គ្នាសំខាន់ៗចំនួន៣ បានចុះកិច្ចព្រមព្រៀង។ក្នុងនោះអនុស្សារណៈ ទី១ ស្តីពីកិច្ចសហប្រតិបត្តិការលើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា និងក្រសួងវិទ្យាសាស្ត្រ និងបច្ចេកវិទ្យា វៀត ណាម។ ទី២-អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការរវាងវិទ្យាស្ថានជាតិការទូត និងទំនាក់ទំនងអន្តរជាតិ កម្ពុជា និងបណ្ឌិត្យសភាការទូត វៀតណាម។ និងទី៣-អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងសភាពាណិជ្ជកម្មវៀតណាម៕