វៀតណាម៖ សារព័ត៌មានវៀតណាម(Viet Nam News)ចេញផ្សាយនៅថ្ងៃទី១៣ ខែធ្នូ ឆ្នាំ២០២៣នេះថា ប្រទេសវៀតណាមមានបំណងគ្រោងនឹងសម្រេចឱ្យបានការប្រើប្រាស់ជីសរីរាង្គរហូតដល់ទៅ៥០% លើផ្ទៃដាំដុះសរុបទូទទាំងប្រទេសនៅត្រឹមឆ្នាំ២០៥០និងយ៉ាងហោចណាស់ ៨០% នៃទីក្រុង និងបណ្តាខេត្តនានាត្រូវបង្កើតគំរូកសិកម្មជីសរីរាង្គដែលជាផ្នែកមួយនៃខ្សែសង្វាក់តម្លៃសម្រាប់កសិផលសំខាន់ៗ។
ផែនការនេះស្ថិតក្នុងចំណោមគោលដៅដែលបានកំណត់ក្នុងគម្រោងលើកកម្ពស់ការផលិត និងការប្រើប្រាស់ជីសរីរាង្គរហូតដល់ឆ្នាំ ២០៣០ ជាមួយនឹងចក្ខុវិស័យដល់ឆ្នាំ ២០៥០ ដែលត្រូវបានអនុម័តដោយក្រសួងកសិកម្ម និងអភិវឌ្ឍន៍ជនបទវៀតណាម(MARD)។
ធុរេនវៀតណាម។
ក្រសួងកសិកម្មវៀតណាមក៏មានគោលបំណងកសាងគំរូដាំដុះប្រកបដោយប្រសិទ្ធភាពដោយប្រើជីសរីរាង្គសម្រាប់ដំណាំសំខាន់ៗចំនួនប្រាំបួនរួមមាន ស្រូវ កាហ្វេ កៅស៊ូ ស្វាយចន្ទី ម្រេច តែ ដើមឈើហូបផ្លែ បន្លែ និងដំឡូងមី។
គោលដៅជាយុទ្ធសាស្រ្តរបស់ក្រសួងកសិកម្មវៀតណាមពេលនេះ ស្របពេលវៀតណាមមើលឃើញថា ការផលិត និងប្រើប្រាស់ជីសរីរាង្គលើផលិតផលកសិកម្ម គឺជានិន្នាការជៀសមិនរួចនៃវិស័យកសិកម្មរបស់វៀតណាមនាពេលអនាគត។ សម្រាប់វៀតណាម ផែនការនេះ ជាដំណោះស្រាយប្រកបដោយនិរន្តរភាពក្នុងការកាត់បន្ថយការប្រើប្រាស់គីមី និងការពឹងផ្អែកលើការនាំចូលជីពីបរទេស។
ទន្ទឹមផែនការជំរុញការប្រើប្រាស់ជីគីមីនេះ រដ្ឋាភិបាលវៀតណាមក៏នឹងបង្កើតលក្ខខណ្ឌអំណោយផលសម្រាប់ការចុះបញ្ជី និងផ្តល់អាជ្ញាប័ណ្ណក្នុងការផលិតជីសរីរាង្គ ដោយលើកទឹកចិត្តដល់ការអភិវឌ្ឍ ការផលិត និងការប្រើប្រាស់ជីសរីរាង្គក្នុងចំណោមគ្រួសារកសិករ ជាមួយកាកសំណល់ផ្ទះបាយប្រចាំថ្ងៃផងដែរ។
គួររំលឹកថា កសិផលរបស់វៀតណាមជារឿយៗត្រូវបានបណ្តាប្រទេសនាំចូលនៅតំបន់អឺរ៉ុបបានត្អូញត្អែរពីការប្រើប្រាស់សារធាតុគីមីលើបន្លែនិងផ្លែឈើ។ ចំណែកកាលពីខែតុលាថ្មីៗនេះ ប្រទេសជប៉ុនបានសម្រេចកម្ទេចទុរេន និងម្ទេសវៀតណាម ក្រោយទីភ្នាក់ត្រួតពិនិត្យជំងឺរបស់ជប៉ុនរកឃើញសារធាតុគីមីលើសកម្រិតស្តង់ដារ។
ក្នុងនោះទុរេនវៀតណាមប្រមាណ១,៤តោន រកឃើញសារធាតុគីមី procymidone នៅកំហាប់០,០៣ppm ខណៈស្តង់ដារអនុញ្ញាតឲ្យនាំចូលរបស់ជប៉ុនមានត្រឹមតែ ០,០១ppm។ នេះជាសារធាតុគីមីនៅក្នុងថ្នាំសម្លាប់សត្វល្អិតដែលអាចសម្លាប់ពពួកផ្សិត ។
ចំណែក ម្ទេសទម្ងន់ជាង៤តោនត្រូវបានរកឃើញសារធាតុគីមីចំនួន៤ប្រភេទ ក្នុងនោះសារធាតុគីមី២ប្រភេទលើសស្តង់ដារនៃការអនុញ្ញាតនាំចូលដូចជា tricyclazole ០,២ppm និង hexaconazole ០,០៣ppm ខណៈពេលដែលស្តង់ដារអនុញ្ញាតគឺ ០,០១ppm ៕