ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃព្រហស្បតិ៍ សប្ដាហ៍នេះថា រុស្ស៊ីនឹងបន្ដសង្រ្គាមរបស់ខ្លួនក្នុងប្រទេសអ៊ុយក្រែន លុះត្រាតែទីក្រុងកៀវ ធ្វើកិច្ចព្រមព្រៀងដែលគិតគូរពីកង្វល់សន្ដិសុខរបស់ទីក្រុងម៉ូស្គូ ដោយលោកបន្ដថា ក្នុងករណីណាក៏ដោយ គោលដៅនៃ «ប្រតិបត្តិការយោធាពិសេស» នឹងសម្រេចគោលបំណងរបស់វា។ នេះបើយោងតាមការចេញផ្សាយដោយសារព័ត៌មាន CNA នាថ្ងៃសុក្រ ទី១៥ ខែធ្នូ ឆ្នាំ២០២៣។
ដោយឆ្លើយសំណួររបស់សាធារណជន និងប្រព័ន្ធផ្សព្វផ្សាយនៅក្នុងព្រឹត្តិការណ៍មួយដែលដឹកនាំដោយសង្រ្គាម លោកពូទីន បានប្រកាសថា លោកនឹងស្វែងរកអាណត្តិប្រធានាធិបតីរយៈពេល ៦ឆ្នាំទៀតនៅក្នុងខែមីនា ដោយបាននិយាយថា គោលដៅដើមរបស់លោក នៅអ៊ុយក្រែនមិនផ្លាស់ប្តូរទេហើយថា កងកម្លាំងរុស្ស៊ីកំពុងកែលម្អជំហររបស់ខ្លួននៅលើសមរភូមិ។
មេដឹកនាំវ័យ ៧១ឆ្នាំរូបនេះបាននិយាយថា គោលដៅស្នូលរបស់រុស្ស៊ីនៅតែជាការបំផ្លិចបំផ្លាញរបបណាស៊ីនិយម «de-Nazification», «de-militarisation» និងរំសាយអាវុធរបស់អ៊ុយក្រែន។ លោកបានបន្តថា៖ «នឹងមានសន្តិភាព នៅពេលយើងសម្រេចបាននូវគោលដៅរបស់យើង។ ចំពោះការរំសាយយោធា ប្រសិនបើពួកគេ (អ៊ុយក្រែន) មិនចង់ចុះកិច្ចព្រមព្រៀងទេ នោះយើងត្រូវបង្ខំចិត្តចាត់វិធានការផ្សេងទៀត រួមទាំងយោធាផងដែរ»។
ទាក់ទិននឹងបញ្ហានេះ ប្រធានាធិបតីអ៊ុយក្រែន លោក វូឡូឌីមៀ ហ្សេលិនស្គី បាននិយាយថា «ការចរចាជាមួយរុស្ស៊ី គឺមិនអាចទៅរួចទេ រហូតដល់ទាហានរុស្ស៊ីទាំងអស់ត្រូវបានបណ្តេញចេញពីទឹកដីអ៊ុយក្រែន ខណៈបច្ចុប្បន្នលោក កំពុងស្វែងរកជំនួយពីលោកខាងលិច បន្ថែមទៀតដើម្បីការពារប្រទេសរបស់លោក»។
លោកពូទីន បានចាត់ទុកខ្លួនឯងថា ជាបុរសត្រឹមត្រូវក្នុងការបន្តដឹកនាំប្រទេសរុស្ស៊ី តាមរយៈជម្លោះដែលលោកមើលឃើញថា ជាសារៈសំខាន់សម្រាប់ការរស់រានមានជីវិតរបស់រុស្ស៊ី ប៉ុន្តែអ្វីដែលទីក្រុងកៀវ និងសម្ព័ន្ធមិត្តលោកខាងលិច មើលឃើញថា ជាការដណ្តើមយកទឹកដីតាមបែបអាណានិគមដោយអយុត្តិធម៌។ លោកបាននិយាយថា កងកម្លាំងវរជនអ៊ុយក្រែនមួយក្រុមដែលបានឆ្លងទន្លេ Dnipro ក្នុងប្រទេសអ៊ុយក្រែនកំពុងត្រូវបានគេទុកចោល។ វិធីសាស្រ្តរបស់អ៊ុយក្រែនដូចជា កំពុងធ្វើដំណើរសុំទាន ដើម្បីទទួលបានជំនួយពីលោកខាងលិច ដូច្នោះឯង៕