បន្ទាប់ពីមានភាពជោគជ័យនៃការប្រកួតពានរង្វាន់កីឡាបាល់ទះសម្តេចក្រឡាហោម ស ខេង ឆ្នាំ២០២៣ កាលពីពេលថ្មីៗកន្លងទៅ សហព័ន្ធកីឡាបាល់ទះកម្ពុជា នឹងត្រៀមរៀបចំព្រឹត្តិការណ៍ជាប្រវត្តិសាស្រ្តថ្មីមួយទៀត ក្នុងវិស័យបាល់ទះកម្ពុជា «តេជោលីគ» (Techo Volleyball Cambodia League)។
នារសៀលថ្ងៃទី២១ ខែធ្នូ ឆ្នាំ២០២៣ លោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការ តំណាង ឯកឧត្តមអភិសន្តិបណ្ឌិត ស សុខា ប្រធានសហព័ន្ធកីឡាបាល់ទះកម្ពុជា បានបើកកិច្ចប្រជុំជាមួយសមាគម-ក្លិប ទាំង៨ ដែលចូលរួមក្នុងព្រឹត្តិការណ៍បាល់ទះកម្ពុជា «តេជោលីគ» (Techo Volleyball Cambodia League) ដែលនឹងប្រព្រឹត្តិទៅ ចាប់ពីថ្ងៃទី១២ ខែមករា ដល់ ថ្ងៃទី១៨ ខែមីនា ឆ្នាំ២០២៤ ដោយការប្រកួតនឹងធ្វើឡើងនៅថ្ងៃ សុក្រ-សៅរ៍ និងថ្ងៃអាទិត្យ។
ព្រឹត្តិការណ៍ជាប្រវត្តិសាស្រ្តថ្មីមួយទៀត ក្នុងវិស័យបាល់ទះកម្ពុជា «តេជោលីគ» (Techo Volleyball Cambodia League) មាន ក្រុមចំនួន៨ ដូចខាងក្រោម៖
១) សមាគមបាល់ទះវិសាខា
២) សមាគមក្រសួងមហាផ្ទៃ
៣) ក្លិប បញ្ជាការដ្ឋានអង្គរក្ស
៤) កងពលធំអន្តរាគមន៍លេខ៣
៥) ក្លិបរដ្ឋបាលរាជធានីភ្នំពេញ
៦) ក្លិបបាល់ទះខេត្តព្រះសីហនុ
៧) ក្លិបស្នងការដ្ឋាននគរបាលពោធិសាត់
៨) ក្លិបស្នងការដ្ឋាននគរបាលកណ្តាល
ចំពោះរូបមន្តនៃការប្រកួតត្រូវបានចែកជា ៣ជុំ មាន៖
-ជុំទី១៖ ក្រុមទាំង ៨ប៉ះគ្នាចំនួន ១ជើង
-ជុំទី២៖ ក្រុមលេខ១ ដល់ ៦ (ចំណាត់ថ្នាក់ជុំទី១) ប៉ះគ្នាជំនួន១ជុំទៀត
-ជុំទី៣៖ ក្រុមលេខ១ ប៉ះ លេខ៣ ក្រុម លេខ២ ប៉ះ លេខ៤ (ចំណាត់ថ្នាក់ជុំទី២)
ការប្រកួត នឹងត្រូពហុកីឡដ្ឋានជាតិ រាជធានីភ្នំពេញ៕
