សិល្បៈជាតិ៖ ជាស្ថិតិដំបូងក្នុងប្រវត្តិសាស្ត្រសម្រាប់វិស័យភាពយន្តខ្មែរដែលឈានជើងចូលទីផ្សារភាពយន្តនៅអាស៊ីអាគ្នេយ៍ និង អឺរ៉ុប គឺរឿង «កំណើតអរូប» ត្រូវបានប្រកាសជាផ្លូវការក្នុងការនាំចេញទៅចាក់បញ្ចាំងនៅរោងភាពយន្តលំដាប់ៗដល់ទៅ ១៥ ប្រទេសធំ។
អ្នកនិពន្ធ និងដឹកនាំរឿង លោក សែម វិសាល បានថ្លែងឱ្យដឹងក្នុងអង្គពិធីសន្និសីទសារព័ត៌មានស្តីពីការផ្សព្វផ្សាយនៅអន្តរជាតិអំពីខ្សែភាពយន្ត «កំណើតអរូប» នៅថ្ងៃទី ២៣ ខែធ្នូ ឆ្នាំ២០២៣ ថា នេះគឺជាដំណឹងមួយដ៏ល្អសម្រាប់វិស័យភាពយន្តរបស់កម្ពុជាយើង ដែលកំពុងត្រូវប៉ាន់ពីខាងទីផ្សារភាពយន្តក្រៅស្រុក។ ជាពិសេសផលិតកម្ម Wonder Film Entertainment ដែលជាអ្នកបើកទំព័រដំបូងគេក្នុងប្រវត្តិសាស្ត្រភាពយន្តកម្ពុជាឆ្ពោះទៅកាន់អន្តរជាតិយ៉ាងច្រើនប្រទេស។ ដូច្នេះហើយក៏ជាលើកទីមួយក្នុងប្រវត្តិសាស្ត្រសម្រាប់វិស័យភាពយន្តខ្មែរ ដែលឈានជើងចូលទីផ្សារអឺរ៉ុប ជាពិសេសបញ្ចាំងផ្លូវការសុទ្ធតែរោងភាពយន្តលំដាប់ៗនៅទីនោះ។
លោកបន្តថា ចក្ខុវិស័យរបស់ផលិតកម្ម Wonder Film Entertainment គឺចង់ពាំនាំខ្សែភាពយន្តខ្មែរ ពោរពេញដោយគុណភាពពិតប្រាកដនិងបន្តបន្ទាប់ ដើម្បីចូលរួមលើកកំពស់និងផ្សព្វផ្សាយវិស័យវប្បធម៌ តំបន់ទេសចរណ៍ ប្រពៃណី អរិយធម៌ ប្រវត្តិសាស្ត្រ ទំនៀមទម្លាប់ សាសនា ដ៏សម្បូរបែបនិងបុរាណជាយូរលង់សមនឹងកិត្តិនាមរបស់កម្ពុជា ព្រះរាជាណាចក្រអច្ឆរិយៈ។
រឿង «កំណើតអរូប» បានចាប់ផ្តើមចាក់បញ្ចាំងនៅគ្រប់រោងភាពយន្តនៅប្រទេសកម្ពុជា កាលពីដើមខែមេសា ឆ្នាំ២០២៣ ដោយទទួលបានការគាំទ្រខ្លាំងយ៉ាងមិននឹកស្មានដល់ពីអ្នកនិយមចូលចិត្តមើលរឿងប្រភេទរន្ធត់ ឬលងបន្លាច ក្នុងរយៈពេលមួយដ៏ខ្លី រហូតដល់មានការចាប់អារម្មណ៍ពីប្រទេសជិតខាងដូចជាឡាវ និងថៃ ជាដើម។ សាច់រឿងដ៏ប្លែកមួយនេះ នឹងធ្វើដំណើរ #GOINTERNATIONAL ទៅបណ្តាប្រទេសទាំង ១៥ លើសកលលោកក្នុងពេលឆាប់ៗនេះ។ ហើយមិនត្រឹមតែ ១៥ ប្រទេសលើទីផ្សារអាស៊ី និងអឺរ៉ុបនោះទេ ព្រមទាំងបញ្ជាក់ផ្លូវការបន្ថែមប្រមាណជិត ២០ ប្រទេសទៀត ក្រោយបញ្ចាំងតាមបណ្ដារោងភាពយន្តអន្តរជាតិរួចរាល់ នឹងមានដាក់ឱ្យទស្សនាក្នុង platform online ធំៗប្រមាណជិត ២០០ ប្រទេសទៀតផង។
សូមជម្រាបថា រឹតតែពិសេសជាងនេះទៀតនោះ ខ្សែភាពយន្តថ្មីរបស់ Wonder Film នឹងកាន់តែអស្ចារ្យបន្ថែមទៀត ទាំងបច្ចេកទេស និងគុណភាពលំដាប់អន្តរជាតិ ដែលនឹងចេញជាផ្លូវការចាប់ពី ពាក់កណ្ដាលឆ្នាំ២០២៤ខាងមុខនេះតទៅ៕
