សិល្បៈជាតិ៖ ថ្មីៗនេះ កំពូលតារាជើងចាស់ម្ចាស់រហស្សនាម តារាទឹកភ្នែក អ្នកនាង ច័ន្ទ តារាទី បានបង្ហាញអារម្មណ៍ហួសចិត្តផង ឆ្អែតចិត្តផង និងរអាផង ចំពោះតារាសិល្បៈមួយចំនួនដែលបង្ហាញពីភាពបក្សពួកនិយម និងចូលចិត្តអែបអប មានខ្សែ មានបក្សពួក តោងអ្នកដែលមានមុខមាត់ដើម្បីលាភសក្ការៈរបស់ខ្លួន ដែលជាទង្វើមួយត្រូវបានអ្នកសិល្បៈជើងចាស់រូបនេះសម្លឹងឃើញ និងចាត់ទុកថាមិនគួរឱ្យកើតមានឡើងក្នុងសង្គមសិល្បៈនោះឡើយ។
វីដេអូឃ្លីបខ្លីមួយដកស្រង់សម្ដីរបស់អ្នកនាង ច័ន្ទ តារាទី ត្រូវបានបង្ហោះឡើងដោយតារាសម្ដែងប្រុស សាវិន ហ្វីលីព ដោយក្នុងវីដេអូនោះគឺ អ្នកទាំងពីរបានអង្គុយជជែកវែកញែកគ្នាអំពីអត្តចរិតលក្ខណៈតារាសិល្បៈនាពេលបច្ចុប្បន្ននេះ ដែលមានមួយចំនួនធំមិនសូវជាឱ្យតម្លៃទៅលើការរាប់អានគ្នាដោយសណ្ដានចិត្ត តែភាគច្រើនគឺបង្ហាញពីការរាប់អានគ្នាបែបហុតទឹកសម្លឹងកាក គិតផលប្រយោជន៍សួនបុគ្គលជាធំ។ កំពូលតារាទឹកភ្នែករូបនេះ បានព្រលយសម្ដីក្នុងន័យអន់ចិត្ត ដល់ថ្នាក់លែងចង់បន្តមានឈ្មោះជាតារាសិល្បៈទៅមុខទៀត ព្រោះតែផលតបស្នងដែលទទួលបានគឺមិនសមនឹងកិត្តិនាម ដោយបានលើកឧទាហរណ៍ករណីការទទួលអនិច្ចកម្ម លោក ពេជ្រ ភីរុណ ដែលអ្នកសិល្បៈរួមជំនាន់ ពេលស្លាប់ទៅបែរជាស្ងាត់បាត់មិនមានវត្តមានអ្នកសិល្បៈណាទៅចូលរួមពិធីបុណ្យឱ្យគគ្រឹកគគ្រេងទាល់តែសោះ។
សូមជម្រាបថា អ្នកនាង ចាន់ តារាទី គឺជាតារាសម្តែងដ៏មានទេពកោសល្យ និង ទទួលបានការគាំទ្រមួយរូបតាំងពីជំនាន់ទស្សវត្សរ៍ ឆ្នាំ ៨០ជាង ហើយបើទោះបីសព្វថ្ងៃនេះមិត្តរួមជំនាន់ស្និទ្ធស្នាលជាច្រើនរូបបានសម្រេចចិត្តចេញពីអាជីពសិល្បៈក្តី ប៉ុន្តែតួឯកស្រីតារាទឹកភ្នែករូបនេះ នៅតែប្រឡូកអាជីពសិល្បៈនេះដដែល។ ក្នុងចង្កោមសិល្បៈ គ្រប់គ្នាបានចាត់ទុកអ្នកនាងជាតារារៀមច្បង និង ជាសិល្បការនីផ្នែកសម្ដែងគំរូមួយសម្រាប់ពន្លកតារាជំនាន់ក្រោយ។ ហើយសព្វថ្ងៃនេះ អ្នកនាង ច័ន្ទ តារាទី មិនសូវមានសកម្មភាពសិល្បៈនោះទេ ដោយយកពេលវេលាមើលថែទាំម្ដាយកំពុងឈឺវ័យ ៩៣ ឆ្នាំ និងបានបើកភោជ្ជនីយដ្ឋានផ្ទាល់ខ្លួនឈ្មោះហាង ច័ន្ទ តារាទី៕
ដើម្បីជាក់ច្បាស់ពីការលើកឡើងរបស់អ្នកនាង ច័ន្ទ តារាទី សម្ភាសឆ្លើយឆ្លងជាមួយលោក សាវិន ហ្វីលីព ពីបញ្ហានេះ សូមទស្សនាវីដេអូព័ត៌មានខាងក្រោមនេះ៖