សិល្បៈជាតិ៖ ថ្មីៗនេះ អតីតតារាចម្រៀងល្បីឈ្មោះម្នាក់គឺអ្នកនាង គង់ បុប្ផា បានចេញមុខ Live នៅលើបណ្ដាញសង្គមហ្វេសប៊ុក ដោយលាតត្រដាងរឿងរ៉ាវឈឺចាប់រហូតសម្រក់ទឹកភ្នែកចេញមកប្រ៉ាវៗ ក្រោយត្រូវស្វាមីគំរាមកំហែងលែងលះ និងគំរាមដល់អាយុជីវិតម្ដាយនៅស្រុកខ្មែរ ព្រោះចង់ក្ដោបទ្រព្យតែឯង។
តារាចម្រៀងស្រីរូបនេះ ក្ដៅចិត្តខ្លាំងណាស់រហូតមិនខ្វល់ពីភាពអាម៉ាស់ដោយសារលាតត្រដាងរឿងអាស្រូវរបស់ខ្លួននិងស្វាមីឱ្យមហាជនបានដឹងនោះទេ។ ប៉ុន្តែអ្នកនាង គង់ បុប្ផា ហ៊ានលើកដៃចង្អុលមេឃនិយាយអះអាងផ្ទាល់មាត់ថា អ្នកនាងហ៊ានប្ដូរជីវិតប្រសិនបើស្វាមីអ្នកនាងនៅមិនញញើត ហើយនៅតែប៉ះពាល់បំពានដល់ម្ដាយរបស់ខ្លួនដែលកំពុងរស់នៅស្រុកខ្មែរមិនឱ្យបានសុខ ។ បើទោះបីជាស្វាមីអ្នកនាងគំរាមយ៉ាងណាក៏ដោយ ក៏អ្នកនាងសុខចិត្តប្រើផ្លូវច្បាប់ដើម្បីតទល់រកយុត្តិធម៌ឱ្យខ្លួននិងកូន ព្រមទាំងការពារម្ដាយដែលកំពុងមានជំងឺសតិអារម្មណ៍។
យ៉ាងណាមិញបើងាកទៅតាមដានភាគីស្វាមីរបស់អ្នកនាង គង់ បុប្ផា ដែលជាបុរសអនិកជនខ្មែររស់នៅសហរដ្ឋអាមេរិកមិនបានចេញមកតបតឬប្រតិកម្មចំពោះការចេញមកទម្លាយរបស់អ្នកនាងនោះឡើយ ចំណែកក្រុមគ្រួសារឬសាច់ញាតិក៏នៅស្ងប់ស្ងៀមដូចគ្នា។ អ្នកសារព័ត៌មានត្រយងបានព្យាយាមទំនាក់ទំនងទៅលោកដើម្បីស្រាយបំភ្លឺជុំវិញករណីនេះ តែមិនអាចទំនាក់ទំនងបាន។
សូមរំលឹកដែរថា បើគិតរហូតមកទល់ពេលនេះអ្នកនាង គង់ បុប្ផា បានឃ្លាតឆ្ងាយពីសិល្បៈរយៈពេលជាង ២០ ឆ្នាំមកហើយ ដោយបានទៅរស់នៅលើទឹកដីសហរដ្ឋអាមេរិកជាមួយស្វាមី និងមានកូនប្រុសស្រីចំនួន ៤ នាក់។ ដោយឡែកគេក៏ឧស្សាហ៍ឃើញតារាចម្រៀងស្រីរូបនេះឡើងចុះមកស្រុកកំណើតម្ដងម្កាល និងឃើញអ្នកនាងកាន់ក្បាលមេក្រូច្រៀងម្ដងៗនៅពេលមានពិធីបុណ្យទានផ្សេងដូចជា កម្មវិធីចូលឆ្នាំខ្មែរ កម្មវិធីភ្ជុំបិណ្ឌ ប្រជាជនខ្មែររស់នៅសហរដ្ឋអាមេរិកបានប្រារព្ធធ្វើឡើង។ សព្វថ្ងៃនេះ ក្រៅពីចិញ្ចឹមកូនប្រុសស្រី ៤ នាក់នៅក្នុងបន្ទុក គេក៏បានឃើញអ្នកនាង គង់ បុប្ផា លក់អីវ៉ាន់នៅលើអនឡាញន៍ផងដែរ៕