ក្រុមបាល់ទាត់ Hyderabad FC សមាជិកលីគកំពូលឥណ្ឌា Indian Super League បានប្រកាសចែកផ្លូវជាមួយលោក Conor Nestor អតីតគ្រូបង្វឹកព្រះខ័នរាជស្វាយរៀង ដោយស្របច្បាប់កាលពីថ្ងៃទី៣០ ខែធ្នូ ឆ្នាំ២០២៣។
បច្ចុប្បន្នក្រុមបាល់ទាត់ Hyderabad FC ដែលមានលោក Thangboi Singto ជនជាតិឥណ្ឌា ជាគ្រូបង្វឹក និងលោក Conor Nestor ជាគ្រូជំនួយ កំពុងស្ថិតនៅលេខរៀងទី១២ បាតតារាង ក្រោយឆ្លងកាត់១១ប្រកួត ស្មើ៤ និងចាញ់៧ មិនដែលឈ្នះ មានតែ៤ពិន្ទុប៉ុណ្ណោះ។
លោក Conor Nestor គ្រូបង្វឹកកម្រិត UEFA A Licence បានចំណាយពេលរយ:ពេល ៥ឆ្នាំដឹកនាំក្រុមព្រះខ័នរាជស្វាយរៀង ចាប់ពីឆ្នាំ ២០១៨ រហូតដល់ដើមឆ្នាំ ២០២៣ នៅលីគកំពូលកម្ពុជា ជួយឲ្យទទួលបានតំណាត់ថ្នាក់ដូចជា៖
-២០១៨ ទទួលបានលេខ៦
-២០១៩ ឈ្នះជើងឯក (ឈ្នះពានជាគ្រូបង្វឹកល្អប្រចាំឆ្នាំ)
-២០២០ ជើងឯករង
-២០២១ ជើងឯករង
-២០២២ ទទួលបានលេខ៣។
ស្របពេលសម្រាប់ការប្រកួតក្នុងពានរង្វាន់ សម្តេចអគ្គមហាសេនាបតីតេជោ ហ៊ុន សែន វិញក្រុមព្រះខ័នរាជស្វាយរៀង ក្រោមការដឹកនាំរបស់លោក Conro Nestor បានត្រឹមជើងឯករង នៅឆ្នាំ២០១៩ និងឆ្នាំ ២០២១ ខណ:នៅឆ្នាំ២០១៨, ២០២០, ២០២១ និង២០២២ កន្លងមកនេះ ធ្លាក់ក្នុងវគ្គ៨ក្រុមចុងក្រោយដូចគ្នា។
ខណ:ក្លិបបាល់ទាត់ព្រះខ័នរាជស្វាយរៀង បានប្រកាសតែងតាំងគ្រូបង្វឹកថ្មីគឺលោក Pep Munoz វ័យ៤៣ឆ្នាំ ជនជាតិសញ្ជាតិអេស្ប៉ាញ ដែលកាន់អាជ្ញាប័ណ្ណកម្រិតយូហ្វាប្រូឡាយសិន មានបទពិសោធន៍ការងារជាគ្រូបង្វឹបរយ:ពេលជាង១៩ឆ្នាំ ដោយចាប់ផ្តើមអាជីពជាគ្រូបង្វឹកដំបូងនៅក្រុម UE Lleida ក្នុងប្រទេសអេស្ប៉ាញមុនទៅចូលរួមជាមួយក្លិបយក្ស FC Barcelona។
បច្ចុប្បន្នព្រះខ័នរាជស្វាយរៀង កំពុងស្ថិតនៅកំពូលតារាងលីគកំពូលកម្ពុជា Cambodian Premier League រដូវកាល ២០២៣-២៤ សប្តាហ៍ទី១៥ ក្រោយឆ្លងកាត់ ១៥ប្រកួត ឈ្នះ១២ ស្មើ១ និងចាញ់២ មាន៣៧ពិន្ទុ៕
