សិល្បៈជាតិ៖ ប្រហែលជាប្រិយមិត្តសារព័ត៌មានត្រយងមួយចំនួននៅចាំបានពីអតីតតារាចម្រៀងល្បីឈ្មោះនៅអំឡុងឆ្នាំ១៩៧៩ ដល់ ១៩៨០ ហើយលោកក៏ជាម្ចាស់បទល្បី «បណ្ដាំទួលស្លែង» នោះគឺលោក អ៊ិន សុផារ៉ា។ ដំណឹងចុងក្រោយនេះ ត្រូវបានអ្នកសិល្បៈទម្លាយថា លោកធ្លាក់ខ្លួនពីតារាចម្រៀងល្បី បែរជាមានជីវភាពដុនដាបរើសអេតចាយនិងថែសួនឱ្យគេ។
តាមវីដេអូរបស់តារាសម្ដែងប្រុស សាវិន ហ្វីលីព បានបង្ហោះនៅលើបណ្ដាញសង្គមឱ្យមហាជនអ្នកលេងបណ្ដាញសង្គមបានឃើញថា អតីតតារាចម្រៀងប្រុសរូបនេះបានឃ្លាតឆ្ងាយពីសិល្បៈយូរឆ្នាំមកហើយ ដោយសារមិនមានឱកាសបានបង្ហាញមុខច្រៀងតាមឆាកតន្ត្រី រហូតមិននឹកស្មានដល់ថា រូបលោកលោកធ្លាក់ខ្លួនកម្សត់សឹងតែចិញ្ចឹមក្រពះមិនរស់។
លោក អ៊ិន សុផារ៉ា បានរៀបរាប់ថា សព្វថ្ងៃនេះលោកមានអាយុ ៧៣ ឆ្នាំហើយ រស់នៅជាមួយភរិយាក្នុងបន្ទប់ជួលមួយខែ ៤០ ដុល្លារនៅម្ដុំខណ្ឌដង្កោ រាជធានីភ្នំពេញទាំងត្រដាបត្រដួស។ លោកត្រូវបានម្ចាស់បន្ទប់ជួល ជួយរកការងារឱ្យធ្វើជាអ្នកសម្អាតអនាម័យ រើសកំប៉ុងអេតចាយលក់ និងមើលថែទាំសួនឱ្យគេ។ រីឯភរិយារបស់លោក គឺជាអ្នកជួយលាងចានឱ្យគេនៅហាងអាហារ ដើម្បីយកកម្រៃតិចតួចមកដោះទល់ជីវភាពគ្រួសារប្រចាំថ្ងៃដូចជា បង់ថ្លៃបន្ទប់ជួល និងថ្លៃទឹកភ្លេងជាដើម ។
លោក អ៊ិន សុផារ៉ា បានបញ្ជាក់ទៀតថា សព្វថ្ងៃនេះលោកមានវ័យកាន់តែចាស់ ចំណែកឯសុខភាពក៏កាន់តែទ្រុតទ្រោម ដោយមានជំងឺប្រចាំកាយគឺជំងឺលើសឈាមទៀតផង។ លោកអះអាងថា កាលមុនកូវីដ នៅមានហាងរាត្រីខ្លះផ្ដល់ឱកាសឱ្យលោកច្រៀង ប៉ុន្តែតាំងពីកូវីដរហូតមកទល់សព្វថ្ងៃនេះ គ្មានហាងណាទទួលលោកច្រៀងឡើយ ទាំងដែលរូបលោកអាចនៅច្រៀងបានធម្មតា ប៉ុន្តែប្រហែលមកពីលោកវ័យចំណាស់ពេកទើបបានជាគ្មានអ្នកណាហៅច្រៀងដូចមុនទៀត។
ដោយឡែកលោក អ៊ិន សុផារ៉ា ក៏បានរំលឹកដែរថា បទ «បណ្ដាំទួលស្លែង» គឺជាស្នាដៃនិពន្ធរបស់លោកផ្ទាល់ ទាំងទំនុកច្រៀង និងទំនុកមេឡូឌី រួចទើបយកឱ្យអ្នកតន្ត្រីករជួយសម្រួលបទភ្លេង និងបានថតសំឡេងនៅអំឡុងឆ្នាំ ១៩៨១។ ហើយតាមរយៈបទល្បីមួយបទនេះ លោក អ៊ិន សុផារ៉ា បានសាងកេរ្ដិ៍ឈ្មោះល្បីសុសសាយពេញសង្គមសិល្បៈខ្មែរ។
យ៉ាងណាមិញ តារាសម្ដែង សាវិន ហ្វីលីព បានសន្យាជាមួយលោក អ៊ិន សុផារ៉ា ថា លោកនឹងទៅសុំថៅកែហាង ទ្រខ្មែរ ដែលនិយមគាំទ្រតារាចម្រៀងចាស់ៗ និងបាត់មុខពីសិល្បៈ ដើម្បីឱ្យលោក អ៊ិន សុផារ៉ា ចូលច្រៀងនៅទីនោះ ជាមួយនឹងលោក ណូយ វណ្ណា។ សាវិន ហ្វីលីព ក៏បានអំពាវនាវសុំទឹកចិត្តពីមហាជនអ្នកគាំទ្រដែលមានចិត្តមេត្តាជួយត្រឹមតែម្នាក់ ១ ដុល្លារ តាមរយៈគណនី ABA របស់លោក លោក អ៊ិន សុផារ៉ា ផ្ទាល់ដែលមាន 070 816 428 ដើម្បីឱ្យលោកមានសង្ឃឹមក្នុងជីវិតឡើងវិញ៕
