សិល្បៈជាតិ៖ ដំណឹងចុងក្រោយដែលសារព័ត៌មានត្រយងបានឱ្យដឹងថា ក្រោយពីគ្រោះថ្នាក់ចរាចរណ៍ Vj ALaskoo បារម្ភខ្លាចពិការដៃមួយចំហៀង ព្រោះនៅពេលនេះលោកប្រកាសថាលោកអស់លទ្ធភាពនឹងព្យាបាល ថែមទាំងអស់កម្លាំងកាយចិត្តតស៊ូបន្តទៀត។
Vj ALaskoo បានឱ្យដឹងថា កាលពីថ្មីៗនេះលោកបានជួបនូវគ្រោះថ្នាក់ចរាចរណ៍ត្រូវរថយន្តបុកបណ្តាលឱ្យភ្លាត់ឆ្អឹងដៃ និងប៉ះទង្គិចចំក្បាល។ បន្ទាប់គ្រោះថ្នាក់ភ្លាម លោកត្រូវបានបញ្ចូនទៅមន្ទីពេទ្យដើម្បីព្យាបាល និងស្គែនមើលផ្នែកក្បាលឃើញថាត្រូវខ្ទាំចំហៀងក្បាល ចំណែកឯដៃម្ខាងភ្លាត់ឆ្អឹងស្មាបណ្ដាលឱ្យប៉ះពាល់សរសៃធំអាចប្រឈមនឹងស្វិតដៃម្ខាង។
យ៉ាងណាមិញ មុននេះបន្តិច Vj ALaskoo បានបញ្ជាក់នៅលើបណ្ដាញសង្គមរបស់លោកនូវការព្រួយបារម្ភទៅកាន់អ្នកគាំទ្រថា «បងប្អូនអើយ ជួយខ្ញុំផង.. ជួយប្រាប់ពេទ្យណា ពូកែខាងសសៃ ព្រោះខ្ញុំក្រោយពីគ្រោះថ្នាក់ចរាចរណ៍ ភ្លាត់ឆ្អឹងស្មា និង ត្រូវខ្ទាំចំហៀងក្បាល ។ ក្រោយពីបញ្ចូលឆ្អឺងមកដូចដើម តែដៃចាប់កាន់មិនសូវបាន រយះពេលជាងមួយខែហើយ ខូចទ្រង់ទ្រាយដៃគឺស្វិតទៅៗ ហើយស្ពឹក .. ខ្ញុំបារម្ភណាស់ ម្តេចមកជួបអកុសលបែបនេះ ខ្ញុំអស់់លទ្ធភាពនឹងព្យាបាល អស់កំលាំងកាយចិត្ត ខ្ញុំខ្លាចភាពពិការ»។
ក្រោយបង្ហោះដំណឹងក្រៀមក្រំនេះ អ្នកលេងបណ្ដាញសង្គមបានត្រឹមតែចូលរួមព្រួយបារម្ភពីស្ថានភាពសុខភាពរបស់លោក និងមានខ្លះទៀតបានចែករំលែកពីឈ្មោះមន្ទីរពេទ្យព្យាបាលសសៃនិងធ្វើចលនាសាច់ដុំជាដើម។
គួររំលឹកដែរថា Vj ALaskoo មានឈ្មោះកំណើត អៀង សំអាត មានស្រុកកំណើតនៅខេត្តកំពង់ឆ្នាំង លោកគឺជាអតីតបេក្ខជន Freshie Boy ឆ្នាំ២០០៥ បុរសឆ្នើមរូបនេះធ្លាប់គ្រងតំណែងជាម្ចាស់ពានផ្នែកពិធីករឆ្នើមនៅក្នុងកម្មវិធី « ពានរង្វាន់លេខ១១ Star Zeus» ដែលរៀបចំឡើងឯកឧត្តមហ្វៃ សំអាង កាលពីឆ្នាំ២០១៧ និងទទួលតំណែងជា «ប្រធានសមាគមអតីតពលករមកពីកូរ៉េ» នៅឆ្នាំ២០១៧។ សព្វថ្ងៃលោកកំពុងចាប់ផ្តើមការងារមួយចំនួនជាអ្នករៀបចំបណ្ដាកម្មវិធីធំៗ និងក្រុមហ៊ុននានាដូចជា ការរៀបចំការប្រកួតសម្រស់ Miss Grand Cambodia ជាដើម៕