បន្ទាប់ពីផុសហួសចិត្តចំពោះគណនីមួយដែលបានប្រើប្រាស់ពាក្យប្រមាថនិងគំរាមសម្លា.ប់ខ្លួន កញ្ញា អ៊ីវ៉ា ក៏បានច្រានចោលរាល់ការចោទប្រកាន់ផ្សេងៗពិសេសរឿងអាស្រូវស្នេហា កញ្ញា អ៊ីវ៉ា ក៏បានបញ្ជាក់ប្រាប់សារព័ត៌មានត្រងឱ្យដឹងដែរថាកញ្ញា នឹងមានចាត់ចំណាត់ការផ្លូវច្បាប់ ប្រសិនបើបុគ្គលម្នាក់នោះនៅតែបន្តតាមរំខានរុកគួនកញ្ញាជាបន្តទៀត។
តារាចម្រៀងកញ្ញា អ៊ីវ៉ា បានផុសចែករំលែករឿងហួសចិត្តខ្លាំងមួយកាលពីថ្ងៃទី៩ ខែសីហា ឆ្នាំ២០២១ ដោយកញ្ញា ត្រូវបានគណនីមួយមានឈ្មោះថា Ah July ចូលមកខមមិនជេរប្រមាថ ព្រមទាំងតេមកជេរនិងគំរាមកញ្ញាថែមទៀត។
ឆ្លើយតបមកកាន់សារព័ត៌មានត្រយងកញ្ញា ឃីន ស្រីនាថ ហៅអ៊ីវ៉ា បានអះអាងថាកន្លងមកកញ្ញា មិនធ្លាប់ស្គាល់ម្ចាស់គណនីខាងលើនេះនោះទេ ហើយនៅពេលដែលមានបញ្ហាចម្រូងចម្រាស់ជេរប្រមាថនិងតេមកគំរាមកញ្ញា កញ្ញាបានចូលទៅស្រាវជ្រាវ ហើយអាចកំណត់បានថាគណនីនោះអាចជាគណនីក្លែងក្លាយ។
បន្ថែមលើសពីនោះទៀត កញ្ញា អ៊ីវ៉ា ក៏បានឱ្យដឹងដែរថាម្ចាស់គណនីរូបនោះក៏អាចជាមនុស្សមានសតិមិនល្អ ព្រោះមិនត្រឹមតែកញ្ញាម្នាក់នោះទេដែលត្រូវគណនីឈ្មោះ Ah July នោះជេររាលដាលសូម្បីតែ កញ្ញា សុខ ពិសី កញ្ញា សាឡាត់ ស្រី ក៏ដូចជាហាងកាត់ដេរប្រណីតនារីក៏មិនខុសគ្នាដែរ។
ទោះជាកញ្ញាអ៊ីវ៉ា បានលើកឡើងថាកញ្ញា តាំងពីដើមជាមនុស្សចូលចិត្តស្ងៀមស្ងាត់ និងមិនចង់មានរឿង ព្រោះកញ្ញាសាងបានភាពល្បីល្បាញនិងមិនធ្លាប់មានរឿងអាស្រូវអ្វីទាំងអស់។ ប៉ុន្តែបើបុគ្គលនោះនៅតែតាមរំខាន ប្រមាថ មើលងាយ គំរាម ដល់កញ្ញាទៀតនោះកញ្ញាអាចនឹងពិចារណាចាត់ចំណាត់ការតាមផ្លូវច្បាប់៕
ទស្សនាវីដេអូព័ត៌មាន អ៊ីវ៉ា ខាងក្រោមនេះ៖