អ្នកមេម៉ាយចាយរាង ស្អាតស្រស់សោភាមិនចាញ់ក្រមុំ អ្នកនាង ភិន សុដាលីស កាលពីថ្ងៃម្សិលមិញនេះបានផុសចែករំលែករូបភាពស្អាតជាមួយនឹងកូនស្រីបណ្ដូលចិត្តរបស់ខ្លួននៅទីតាំងភ្នំចំបាប់ឬភ្នំបាប់ ដែលធ្វើឱ្យអ្នកគាំទ្រឃើញហើយអត់ទ្រាំមិនសរសើរមិនបានចំពោះរូបសម្រស់ដ៏ស្អាតរបស់កុមារី Katherina។
រាប់ចាប់តាំងពីថ្ងៃចាប់កំណើតបើកភ្នែកមើលឃើញពិភពលោកកាលពីថ្ងៃទី ៦ ខែ តុលា ឆ្នាំ ២០១៦ មកដល់ឆ្នាំ២០២១នេះ នាងតូច Katherina ចម្រើនវ័យជិតគ្រប់ ៥ឆ្នាំហើយ ឯរូបសម្រស់វិញពិតជាស្អាតនិងគួរឱ្យខ្នាញ់ខ្លាំងណាស់។ កន្លងៗមកកូនស្រីតូចរបស់អ្នកនាង ភិន សុដាលីស តែងតែត្រូវបានសារព័ត៌មានក្នុងស្រុកចាប់អារម្មណ៍យកទៅចុះផ្សាយព្រោះតែមុខមាត់ ខ្យូត ស្អាត និងគួរឱ្យស្រលាញ់ សម្លឹងពីខាងណាក៏មើលទៅស្រស់ស្អាតគួរឱ្យស្រលាញ់ដែរ។
ដូចជាថ្ងៃម្សិលមិញនេះ តាមរយៈផេករបស់កញ្ញា ភិន សុដាលីស ដែលមានឈ្មោះថា «Phin Sodalis ភិន សុដាលីស- KATY» បានបង្ហោះរូបភាព ៣សន្លឹក រវាងអ្នកនាងនឹងកូនស្រីសម្លាញ់នៅតំបន់ភ្នំចំបាប់ឬភ្នំបាប់ ដែលជាទីតាំងមួយក្នុងខេត្តតាកែវ កំពុងតែមានភាពល្បីល្បាញខ្លាំងសម្រាប់អ្នកស្រលាញ់ចង់មានរូបភាពទេសភាពស្អាត ដោយសារតែរណ្ដៅទឹកពណ៌ខៀវស្រងាត់ប្រៀបដូចជាមរកត។
រូបភាពត្រឹម៣សន្លឹកនោះ បានទាក់ទាញចិត្តអ្នកគាំទ្រ ឱ្យចូលមកបញ្ចេញមតិសរសើរ ជាពិសេសគឺផ្ដោតចំពោះកូនស្រីអ្នកនាង គឺនាងតូច Katherina គ្រប់គ្នា។
ទីតាំងភ្នំចំបាប់ ឬភ្នំបាប់នេះ មិនត្រឹមតែអ្នកនាង ភិន សុដាលីស នោះទេដែលបាននាំកូនស្រីទៅថតរូបលេងទុកជាអនុស្សាវរីយ៍ នៅមានបងប្អូនប្រជាពលរដ្ឋ និង តារាល្បីៗផ្សេងទៀត ដូចជាគ្រួសារអ្ន្នកនាង គង់ ចាន់ស្រីមុំ និង លោក គីម សីហា ព្រមទាំងកូនស្រី ម៉ូម៉ូ ជាដើម ក៏បានទៅថតផ្ដិតយកទេសភាពស្អាតនៅទីនោះមកចែករំលែកអ្នកគាំទ្រតាមរយៈផេករបស់អ្នកនាងដូចគ្នា។
គួរដឹងដែរថាដោយមានភាពល្បីល្បាញ និងមានមនុស្សកាន់តែច្រើនសំរុកទៅតំបន់នោះក៏មានការចែករំលែកតាមរយៈបណ្ដាញសង្គមដែរថា តំបន់ភ្នំដែលជាអតីតរណ្ដៅរំសេវសម្បូរទៅដោយជាតិកំបោរ និងជាពិសេសសារធាតុ តេអ៊ិនតេ ដែលសារធាតុ តេអ៊ិនតេនេះ គឺជាការលាយបញ្ចូល កាបូន(C) អីដ្រូហ្សែន(H) នីត្រូសែន (N) ដែលការប៉ះពាល់សារធាតុតេអ៊ិនតេនេះញឹកញាប់អាចនឹងធ្វើឱ្យខូចថ្លើម តម្រងនោម ចំនួនកោសិកាឈាមចុះទាប (បណ្ដាលឱ្យស្លេកស្លាំង) និងខូចខាតប្រព័ន្ធសរសៃប្រសាទ៕