ព្រឹត្តិការណ៍ប្រកួតកីឡាបាល់ទះដ៏ជក់ចិត្តបានឃិតជិតមកដល់ហើយ ដោយនៅល្ងាចនេះ ក្នុងពិធីបើក«តេជោលីគ» (Techo Volleyball Cambodia League) រដូវកាល២០២៤ នឹងមានការប្រកួតបើកឆាកមិត្តភាពអន្តរជាតិ រវាងសមាគមកីឡាបាល់ទះវិសាខា របស់កម្ពុជា ទល់នឹងក្លិបបាល់ទះ Sanest Khanh Hoa របស់វៀតណាម។
ក្នុងពិធីបើកព្រឹត្តិការណ៍ជាប្រវត្តិសាស្ត្រមួយនេះ គឺ«តេជោលីគ» (Techo Volleyball Cambodia League) រដូវកាល២០២៤ ក៏មានការសម្ដែង រួមជាមួយជំនួបមិត្តភាព ដែលនឹងចាប់ពីវេលាម៉ោង ១៧:០០នាទី នៅពហុកីឡដ្ឋានជាតិ (ស្តាតអូឡាំពិក) សម្រាប់អ្នកស្នេហាវិស័យកីឡាមួយនេះ អាចចូលរួមគាំទ្រចូលទស្សនាដោយសេរី លើសពីនេះក៏មានការផ្សាយផ្ទាល់ពីសារព័ត៌មាន «ត្រយង» ផងដែរ។
ដោយឡែកសម្រាប់ព្រឹត្តិការណ៍ប្រកួតកីឡាបាល់ទះ «តេជោលីគ» (Techo Volleyball Cambodia League) រដូវកាល២០២៤ នឹងចាប់ផ្តើមប្រកួតជាផ្លូវការនៅថ្ងៃទី១៣ ខែមករា រហូតដល់ថ្ងៃទី១៨ ខែមីនា ឆ្នាំ២០២៤ ដោយប្រកួតរៀងរាល់ថ្ងៃ សុក្រ-សៅរ៍ និងថ្ងៃអាទិត្យ នៅសាលវិមាននៃពហុកីឡដ្ឋានជាតិ (ស្តាតអូឡាំពិក)។
សមាសភាពក្លិប/សមាគមដែលបានចូលរួមជាផ្លូវការ «តេជោលីគ» រដូវកាល ២០២៤ ចំនួន៨ រួមមាន៖ ១) សមាគមបាល់ទះវិសាខា ២) សមាគមកីឡាបាល់ទះ ក្រសួងមហាផ្ទៃ ៣) ក្លិបបញ្ជាការដ្ឋានអង្គរក្ស ៤) ក្លិបកងពលធំ អន្តរាគមន៍លេខ៣ ៥) ក្លិបកីឡាបាល់ទះ ស្នងការដ្ឋាននគរបាលរាជធានីភ្នំពេញ ៦) ក្លិបកីឡាបាល់ទះ ខេត្តព្រះសីហនុ ៧) ក្លិបស្នងការដ្ឋាននគរបាល ខេត្តពោធិ៍សាត់ ៨) ក្លិបស្នងការដ្ឋាននគរបាល ខេត្តកណ្តាល។
ចំពោះរូបមន្តនៃការប្រកួតត្រូវបានចែកជា៣ជុំមាន៖
-ជុំទី១៖ ក្រុមទាំង ៨ប៉ះគ្នាចំនួន ១ជើង
-ជុំទី២៖ ក្រុមលេខ១ ដល់ ៦ (ចំណាត់ថ្នាក់ជុំទី១) ប៉ះគ្នាជំនួន១ជុំទៀត
-ជុំទី៣៖ ក្រុមលេខ១ ប៉ះ លេខ៣ ក្រុម លេខ២ ប៉ះ លេខ៤ (ចំណាត់ថ្នាក់ជុំទី២)៕
កម្មវិធីប្រកួតថ្ងៃទី១៣ ខែមករា ឆ្នាំ២០២៤៖