៥២ប្រកួតមកនេះ ក្នុងពានរង្វាន់លីគទី២ កម្ពុជា Cambodian League 2 រដូវកាល២០២៣-២៤ មានរឿងកើតឡើងប្លែកចំនួន៤ ទំនងជាកម្រកើតមាននៅលើពិភពលោក នេះ។ សារព័ត៌មានត្រយង សូមសង្ខេបជូនប្រិយមិត្តជ្រាបដូចខាងក្រោម៖
១) ក្រុម១មានអ្នកចាំទី២នាក់ ត្រូវពិន័យកាតលើទីលានប្រកួតក្នុងពេលតែមួយ
ក្រុមបាល់ទាត់កងយោធពលខេមរភូមិន្ទ-ខ (Tiffy Army FC-B) ជាក្រុមមួយដែលត្រូវបានលោកអាជ្ញាកណ្ដាល ពិន័យកាតដល់អ្នកចាំទី២នាក់លើទីលានក្នុងប្រកួតតែ១ ពោលគឺ លោកអាជ្ញាកណ្ដាល សារី ថាណាក់ បានពិន័យកាតក្រហមដល់អ្នកចាំទី ម៉ៅ ណារិទ្ធ នៅនាទី៩០ ស្របពេលម៉ោងបន្ថែមមាន៥នាទី លោក ខែក ខេមរិន្ទ ដែលជាគ្រូបង្វឹកបានប្តូរអ្នកចាំទី ម៉ាត់ ឡានី ចូលជំនួសមុនចប់ការប្រកួត។ ប៉ុន្តែបង្ហាញខ្លួនបាន២នាទី អ្នកចាំទី ម៉ាត់ ឡានី ក៏ត្រូវពិន័យកាតលឿង១សន្លឹកដែរ ក្នុងចំណោមកាតសរុប៧សន្លឹកនៃជំនួបរវាង Tiffy Army FC ទល់ ISI ដង្កោសែនជ័យ-ខ លើទីលានកីឡដ្ឋានកងយោធពលខេមរភូមិន្ទ។
ប្រកួតនៅសប្តាហ៍ទី១៣ នៅថ្ងៃទី១៣ ខែមករា ឆ្នាំ២០២៣ ថ្មីៗនេះ ម្ចាស់ផ្ទះ Tiffy Army FC-B យកឈ្នះលើក្រុម ISI ដង្កោសែនជ័យ-ខ ដោយលទ្ធផល ៤ទល់១។
២) ខ្សែការពារម្នាក់ ចូលធ្វើជាអ្នកចាំទី២ប្រកួតម្នាក់ឯង
ខ្សែការពារ ម៉ាប់ ស៊ីណៃ របស់ក្រុមបាល់ទាត់អង្គរស៊ីធី បានដើរតួរជាអ្នកចាំទីលើកទី២ហើយ នៅដើមរដូវកាលនេះ ក្នុងគ្រាដែលក្រុមមកពីខេត្តសៀមរាប បានចរចាប្រកួតលើទឹកដីបណ្ឌិត្យសភានគរបាលកម្ពុជា ក្នុងខេត្តកណ្តាល របស់ក្រុមសមាគមកីឡាក្រសួងមហាផ្ទៃ នៅសប្ដាហ៍ទី៣ ថ្ងៃទី១៣ ខែមករា ឆ្នាំ២០២៤ តែបរាជ័យដោយលទ្ធផល១៤ទល់០។
ក្រុមអង្គរស៊ីធី យកកីឡាករតែ១៤នាក់ប៉ុណ្ណោះ មកប្រកួតលើកនេះ ប៉ុន្តែអវត្តមានអ្នកចាំទីទាំង៣របស់ក្លិបមានឈុន ផល្លី, ទុយ តឿនដារ៉ារិទ្ធ, វ៉ុន វិចិត្រ ដោយតម្រូវអោយកីឡាករ ម៉ាប់ ស៊ីណៃ ធ្វើជាអ្នកចាំទីលើកទី២ ខណៈកាលពីដើរជាអ្នកចាំទីលើកទី១កន្លងទៅ ក្នុងជំនួបទល់ក្រុមយុវជនបាទី នៅខេត្តតាកែវ។ ដូច្នេះគិតត្រឹមពេលនេះ ស៊ីណៃ ពាក់ស្រោមដៃចាប់បាល់បាន១៨០នាទីហើយ។
៣) កីឡាករ២នាក់ Hat Trick ១លើកៗ លើសពី៥គ្រាប់ ទល់នឹងគូប្រកួតតែ១ដូចគ្នា
ជាទូទៅគ្រាប់បាល់ Hat Trick (រកគ្រាប់បាល់បាន៣គ្រាប់ម្នាក់ឯងក្នុង១ប្រកួត) ប៉ុន្តែគ្រាប់បាល់ Hat Trick របស់កីឡាករ២នាក់នេះ រកបានលើសទី៣គ្រាប់ ពោលគឺកីឡាករ ជឿន ណាចា របស់ក្រុម Tiffy Army FC-B រកបាន៧គ្រាប់ម្នាក់ឯងក្នុង១ប្រកួត ហើយកីឡាករ នួន បូរី របស់សមាគមក្រសួងមហាផ្ទៃ រកបាន៦គ្រាប់ម្នាក់ឯងក្នុង១ប្រកួត។ ៣គ្រាប់របស់កីឡាករទាំង២នាក់ ទាត់ចូលទីក្រុមអង្គរស៊ីធី ដូចគ្នា។
៤) ក្រុម១បរាជ័យ១៤គ្រាប់ ២លើកជាប់ៗគ្នា
ក្រុមអង្គរស៊ីធី ដែលកំពុងឈរនៅតំបន់បាតតារាងលីគទី២ រដូវកាលនេះបានរងបរាជ័យ ដោយរបូតគ្រាប់បាល់រហូតដល់១៤គ្រាប់ជាប់ៗគ្នា ក្នុង២ប្រកួតចុងក្រោយ ដោយសប្ដាហ៍ទី១២បានចាញ់ក្រុម Tiffy Army FC ដោយលទ្ធផល ១៤-០ ហើយសប្ដាហ៍ទី១៣ បន្តចាញ់ក្រុមសមាគមកីឡាក្រសួងមហាផ្ទៃ ១៤ទល់០ ទៀត។
ពានរង្វាន់លីគទី២កម្ពុជា Cambodian League 2 រដូវកាល២០២៣-២៤ បានឈានដល់សប្ដាហ៍ទី១៣ហើយ ស្របពេលក្រុមជាសមាជិកទាំង៨ត្រូវប្រកួតវិលជុំចំនួន៣ជុំ សន្សំពិន្ទុ ហើយក្រុមដែលមានពិន្ទុច្រើនជាងគេនៅចុងរដូវកាលនឹងគ្រងជើងឯកប្រចាំឆ្នាំ៕
