ប៉េកាំង៖ ប្រព័ន្ធផ្សព្វផ្សាយរដ្ឋបានរាយការណ៍ថា មនុស្សចំនួន ៤៧នាក់ត្រូវបានកប់នៅក្នុងការបាក់ដីនៅក្នុងខេត្តយូណាន ភាគនិរតីនៃប្រទេសចិន នាថ្ងៃចន្ទ សប្ដាហ៍នេះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃចន្ទ ទី២២ ខែមករា ឆ្នាំ២០២៤។
ទីភ្នាក់ងារព័ត៌មានរដ្ឋចិន Xinhua បានរាយការណ៍ថា ការរអិលបាក់ដីបានកើតឡើងនៅម៉ោង ៥:៥១នាទីព្រឹក (ម៉ោងក្នុងស្រុក) នៅក្នុងស្រុក Zhenxiong។
ដោយឡែកទូរទស្សន៍រដ្ឋចិន CCTV បានផ្សាយថា «ផ្ទះប្រហែល ១៨គ្រួសារត្រូវបានកប់នៅក្នុងការរអិលបាក់ដី ហើយមនុស្សជាង ២០០នាក់ត្រូវបានជម្លៀសចេញពីតំបន់កើតហេតុនោះជាបន្ទាន់»។
យោងតាមទូរទស្សន៍ CCTV បានឱ្យដឹងថា អាជ្ញាធរបានចាប់ផ្តើមការឆ្លើយតបជាបន្ទាន់មួយ ជាមួយនឹងអ្នកជួយសង្គ្រោះជាង ២០០នាក់ ព្រមទាំងបាននាំយកម៉ាស៊ីនជួយសង្រ្គោះរាប់សិបគ្រឿង និងឧបករណ៍ផ្សេងៗទៀតទៅតំបន់រងគ្រោះ។
វីដេអូដែលបានចែករំលែកនៅលើប្រព័ន្ធផ្សព្វផ្សាយសង្គមដោយអ្នកផ្សាយក្នុងស្រុកបានបង្ហាញពី បុគ្គលិកសង្គ្រោះបន្ទាន់ក្នុងឈុតពណ៌ទឹកក្រូច និងមួកសុវត្ថិភាពដើរស្វែងរកមនុស្សតាមគំនរកំរាលឥដ្ឋ ដែលបានដួលរលំចំកណ្តាលភ្នំដ៏ខ្ពស់ដែលពោរពេញដោយគ្រាប់ព្រិល។
គួរបញ្ជាក់ថា ការរអិលបាក់ដី គឺជារឿងធម្មតានៅក្នុងខេត្តយូណាន ដែលជាតំបន់ដាច់ស្រយាលនៃប្រទេសចិន ដែលមានជួរភ្នំដ៏ចោតទល់នឹងខ្ពង់រាបហិម៉ាឡៃយ៉ាន។
ប្រទេសចិនបានជួបប្រទះនឹងគ្រោះមហន្តរាយធម្មជាតិ ជាច្រើនដងក្នុងរយៈពេលប៉ុន្មានខែថ្មីៗនេះ ដោយគ្រោះមហន្ដរាយខ្លះកើតឡើងបន្ទាប់ពីមានព្រឹត្តិការណ៍អាកាសធាតុធ្ងន់ធ្ងរ។
កាលពីខែសីហា ឆ្នាំមុន មនុស្សជាង ២០នាក់ បានស្លាប់នៅពេលដែលភ្លៀងធ្លាក់ខ្លាំងបង្កឱ្យមានការបាក់ដីនៅជិតទីក្រុង ស៊ីអាន (Xi’an) ភាគខាងជើងប្រទេសចិន ហើយកាលពីខែមិថុនា មានការបាក់ដីនៅភាគនិរតីនៃខេត្ត Sichuan បានសម្លាប់មនុស្ស ១៩នាក់៕