សិល្បៈជាតិ៖ តាំងពីរាត្រីថ្ងៃទី២១ ខែមករា ឈានចូលមកដល់ថ្ងៃទី២២ ខែមករា ឆ្នាំ២០២៤ នេះ ប្រធានបទក្ដៅដែលអ្នកលេងបណ្ដាញសង្គម កំពុងជជែកវែកញែកគ្នានោះ គឺរឿងអតីតតារាចម្រៀង Lee Seung-hyun (លី សឹងហ៊ុន) ឬ ឈ្មោះក្នុងសិល្បៈ Seungri អតីតសមាជិក BigBang លេចមុខក្នុងកម្មវិធីជប់លៀងក្នុងក្លិបកម្សាន្តដ៏ធំមួយនាទីក្រុងភ្នំពេញ។
ត្បិតមានអ្នកគាំទ្រមួយចំនួនបានសម្ដែងពីការសប្បាយអរ ចំពោះវត្តមានអតីតតារាចម្រៀង K-pop ដ៏ល្បីល្បាញកម្រិតពិភពលោករូបនេះនៅកម្ពុជា ប៉ុន្តែសម្រាប់អ្នកដែលដឹងសាច់រឿងពិតដ៏ស្អុយគគ្រុកនៅពីក្រោយរូបភាពសុភាពនិងស្រស់សង្ហា របស់តារារូបនេះនៅប្រទេសកូរ៉េ ពួកគេហាក់មិនសប្បាយចិត្ត និងត្រេកអរចំពោះការមកដល់របស់ Seungri នោះឡើយ។
វត្តមានរបស់ Seungri ត្រូវបានចែកចាយលើបណ្ដាញសង្គម ដោយសារមានអ្នកសិល្បៈនិងបុគ្គលល្បីៗជាច្រើនបានបង្ហោះចែករំលែកជាសាធារណៈ ដូចជា តារាសម្ដែង និង ចម្រៀង ព្រីន លោកបានបង្ហោះរូបភាពនិងសរសេរថា បង្រៀនពូ Seungri ( Big Bang K-pop ) ឲ្យចេះសំពះ ខណៈដែលស្រីស្អាតក្រុមរាំ ARROW PLAS បានបង្ហោះរូបភាពវីដេអូថតរូបអនុស្សាវរីយ៍ជាមួយនឹង Seungri នៅលើបណ្ដាញសង្គមរបស់ខ្លួនផងដែរ។
នៅក្នុងនោះគេឃើញមានវត្តមានបុគ្គលល្បីៗជាច្រើនដែលបានចែករំលែករូបភាពជាមួយនឹងអតីតតារាចម្រៀងក្នុងក្រុម BigBang រូបនេះ។ យ៉ាងណាមិញនៅក្នុងចំណោមអ្នកដែលចូលមកអបអរ ត្រេកអរនិងស្វាគមន៍ ចំពោះការមកដល់ទឹកដីកម្ពុជារបស់ Seungri ក៏មានអ្នកមួយចំនួនដែលបានដឹងសាច់រឿង និងបទឧក្រិដ្ឋដែលលោកបានប្រព្រឹត្តិនៅប្រទេសកំណើត សម្ដែងមតិ មិនពេញចិត្ត និងមិនស្វាគមន៍បុរសកូរ៉េរូបនេះនៅលើទឹកដីកម្ពុជានោះឡើយ។ បើមើលទៅតាមមតិយោបល់ជាច្រើនពីភាគី អ្នកមិនស្វាគមន៍ Seungri ពួកគេបានលើកឡើងពាក់ព័ន្ធនឹងអំពើដ៏សែនថោកទាបដែលបុរសវ័យ 33 ឆ្នាំរូបនេះបានប្រព្រឹត្តិនាពេលកន្លងមកទៅលើស្ត្រីភេទ។
ករណីអាស្រូវរបស់ Seungri ក៏ត្រូវបានគេយកទៅផលិតជាភាពយន្តដែលមានចំណងជើងថា Taxi Driver2 ដោយនៅក្នុងភាគទី១១ដល់១៣ គេបានលើកយកករណីនោះមកលាតត្រដាងតាមរយៈតួអង្គឈ្មោះ Victor ដែលមានន័យថាជ័យជំនះ ដោយចង់សំដៅដល់ Seungri ព្រោះឈ្មោះរបស់លោកមានន័យថាជ័យជំនះ នៅក្នុងភាសាកូរ៉េ។ ត្រយងសូមដកស្រង់អ្នកដែលបង្ហាញមតិនិងទស្សនៈ មិនស្វាគមន៍ Seungri ដូចខាងក្រោម៖
«ថតជាមួយនឹងមានដឹងប្រវត្តិទេ?» «ស្រុកខ្ញុំគេ Proud ព្រោះបានថតជាមួយ Seungri» «I’m Disgusted ឬ ខ្ញុំខ្ពើមរអើមខ្លាំងណាស់» «មួយៗសប្បាយអរណាស់ តិចទៀតវាស៊ីខ្លួនប្រាណហើយចាប់លក់ទើបដឹង!» «ចាប់យកទៅលក់ឱ្យអស់ទៅ Oppa» «ខំទៅប្រយ័ត្នវាចាប់លក់» «Blacklist ឬជនស្ថិតក្នុងបញ្ជីខ្មៅ Criminal ឬឧក្រិដ្ឋជន»
ក្រៅពីជាតារាចម្រៀងអាជីពហើយនោះ Seungri គឺជាអ្នកជំនួញមួយរូប ដែលមានតួនាទីធំៗក្នុងវិស័យធុរៈកិច្ចដូចជា Sublabel YGX, ហាង Ramen និងក្លិបកម្សាន្ត។
ចំពោះអ្នកដែលមិនទាន់បានដឹងពីសាច់រឿងឈានដល់ការចាប់ខ្លួន Seungri ហើយផ្ទុះចេញរឿងរ៉ាវអាស្រូវនោះ គឺចេញពីក្លិបកម្សាន្តមួយកន្លែងរបស់លោកមានឈ្មោះថា Burning Sun។ ក្លិបកម្សាន្តនេះ បានលាក់បង្កប់នូវរឿវរ៉ាវដ៏កខ្វក់និងខ្មៅងងឹតជាច្រើន ដូចជាការរំលោភបំពាន ការជួយដូរផ្លូវភេទ ពេស្យាចារ ការចែកចាយនិងលក់ថ្នាំញៀន លាក់បង្កប់កាមេរ៉ា គេចពន្ធ និងអំពើពុករលួយរបស់ប៉ូលិសតំបន់ចូលដៃជើងជួយជនខិលខូច។ល។
នៅក្នុងរឿង Taxi Driver តួ Victor ដែលតំណាងឱ្យ Seungri ឱ្យតែចាប់អារម្មណ៍លើស្ត្រីរូបណាដែលមកលេងកម្សាន្តក្នុងក្លិប គាត់នឹងប្រាប់អ្នកធ្វើការក្នុងក្លិបនោះ ហើយពួកគេនឹងប្រើល្បិចរៀបគម្រោង ដាក់ថ្នាំរួចនាំនាងយកទៅបន្ទប់ដើម្បីរំលោភបំពាន និងថតវីដេអូទុកដើម្បីយកទៅចែកចាយនៅក្នុង Group Chat។ ពួកគេទាំងនោះចាត់ទុកស្រីៗប្រៀបដូចជាទំនិញ ហើយបើទោះជានារីរងគ្រោះបានទៅប្ដឹងសមត្ថកិច្ច ប៉ុន្តែគ្មានអ្នកណាជួយនោះឡើយ ព្រោះប៉ូលិសគឺជាដៃជើងរបស់ពួកគេ។
ថ្វីត្បិតបច្ចុប្បន្នរូបគេត្រូវបានដោះលែងឱ្យនៅក្រៅឃុំ ប៉ុន្តអាជីពសិល្បៈរបស់គេនៅប្រទេសកូរ៉េ មិនអាចត្រលប់ទៅរកភាពរុងរឿងដូចមុនបាននោះឡើយ ហើយការដែលបុរសដ៏គ្រោះថ្នាក់និងចាត់ទុកមនុស្សស្រីជាឧបករណ៍បំរើការសប្បាយបង្ហាញខ្លួនក្នុងក្លិបកម្សាន្តរបស់កម្ពុជា ធ្វើឱ្យមនុស្សជាច្រើន ស្រមៃដល់រឿងដែលគេធ្លាប់បានប្រព្រឹត្តិ និងបារម្ភពីសុវត្ថិភាពរបស់មនុស្សស្រី។ មួយវិញទៀតគេយល់ឃើញថា ការដែលផ្ដល់ឱកាស ឱ្យមនុស្សបែបនេះមានមុខមានមាត់ក្នុងសង្គមឡើងវិញ នឹងធ្វើឱ្យមនុស្សលែងខ្វល់ ឬលែងខ្លាចការប្រព្រឹត្តិអំពើខុសឆ្គង ដោយសារគេមិនទទួលបានមេរៀនធ្ងន់ធ្ងរណាមួយ ដូច្នេះពួកគេនឹងយល់ថា ទង្វើអាក្រក់របស់ខ្លួនមិនយូរមិនឆាប់នឹងត្រូវបានអ្នកដទៃបំភ្លេចចោល៕