ភ្នំពេញ៖ នៅថ្ងៃទី២២ ខែមករា ឆ្នាំ២០២៤នេះ ទំព័រហ្វេសប៊ុករបស់ក្រសួងការងារ បានបង្ហោះប្រសាសន៍របស់រដ្ឋមន្រ្តីក្រសួងការងារ ដែលបានបញ្ជាក់ថា បច្ចុប្បន្នទីផ្សារការងារតាមរោងចក្រសហគ្រាស និងក្រុមហ៊ុននានា កំពុងមានតម្រូវការងារបុគ្គលិកជំនាញក្នុងស្រុកប្រមាណ ៣ម៉ឺនកន្លែងទៀត ខណៈទីផ្សារនៅប្រទេសជប៉ុនក៏ត្រូវការពលករជំនាញពីកម្ពុជាចន្លោះពី ៣ពាន់ទៅ ៥ពាន់កន្លែងផងដែរ។
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាល វិជ្ជាជីវៈ។
ការបញ្ជាក់របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាល វិជ្ជាជីវៈ ធ្វើឡើងក្នុងជំនួបជាមួយយុវជនដែលបានចុះឈ្មោះចូលរួមជំនាញវិជ្ជាជីវៈផ្សេងៗប្រមាណ ២ម៉ឺននាក់ដោយខ្លះមកពីគ្រួសារក្រីក្រ គ្រួសារងាយរងហានិភ័យ និងយុវជនមកពីសេដ្ឋកិច្ចក្នុង និងក្រៅប្រព័ន្ធ ឬ កម្មករ-និយោជិតជាដើម។
ឯកឧត្តមរដ្ឋមន្រ្តីបន្ថែមទៀតថា បច្ចុប្បន្នទីផ្សារការងារត្រូវការបុគ្គលិកផ្នែកជំនាញក្នុងនោះមានដូចជាផ្នែកអគ្គិសនី មេកានិច ការជួសជុលរថយន្ត និងកសិកម្មជាដើម។ ឯកឧត្តមរដ្ឋមន្ត្រីថែមទាំងណែនាំដល់អ្នកពាក់ព័ន្ធពិសេសមន្រ្តីក្រសួងការងារតែម្តង ត្រូវអន្តរាគមន៍ជ្រើសរើសសិក្ខាកាមដែលបានមកបណ្តុះបណ្តាលជំនាញជាមួយក្រសួង ដើម្បីបញ្ចូលក្នុងទីផ្សារការងារតាមតម្រូវការជាក់ស្តែងនិងតាមសមត្ថភាពរបស់សិក្ខាកាម។
យោងតាមការបញ្ជាក់របស់មន្រ្តីជាន់ខ្ពស់ក្រសួងការងារបញ្ជាក់ប្រាប់សារព័ត៌មានក្នុងស្រុកបានឱ្យដឹងថា រយៈពេលមួយសប្តាហ៍ចាប់ពីថ្ងៃទី១៥ រហូតដល់ថ្ងៃទី ២១ ខែមករា ឆ្នាំ ២០២៤ ក្រសួងការងារបានបើកវគ្គបណ្ដុះបណ្ដាលដល់យុវជនមកពីគ្រួសារក្រីក្រ គ្រួសារងាយរងហានិភ័យ និងយុវជនមកពីសេដ្ឋកិច្ចក្នុង និងក្រៅប្រព័ន្ធ ឬ កម្មករ-និយោជិត ប្រមាណជាង ៦៧០ ថ្នាក់ ទៅលើមុខជំនាញចំនួន ១០ ដែលមានសិស្សប្រមាណជិត ២ ម៉ឺននាក់ក្នុងនោះស្រីមានជាង ៧ ពាន់នាក់។
ក្នុងនោះវិស័យចំនួន ១០ មានផ្នែកសំណង់ចំនួន ១៨៩ ថ្នាក់ អគ្គិសនីនិងថាមពលចំនួន ១៤ ថ្នាក់ អេឡិចត្រូនិកចំនួន ៤១ ថ្នាក់ កម្មន្តសាលចំនួន ៥៣ ថ្នាក់, មេកានិកទូទៅ/មេកានិករថយន្ត ចំនួន ១០៤ ថ្នាក់, ធុរកិច្ច និងព័ត៌មានវិទ្យា ១០១ ថ្នាក់, សេវាកម្មចំនួន ៣២ ថ្នាក់, បរិក្ខារត្រជាក់ និងកម្តៅ ចំនួន ៦០ ថ្នាក់ ទេសចរណ៍ចំនួន ៤១ ថ្នាក់, និង កសិកម្ម និង កសិ-ឧស្សាហកម្មចំនួន ៣៨ ថ្នាក់។
សូមរំលឹកថា កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យប្រមាណ ១ លាន ៥ សែននាក់ របស់រាជរដ្ឋាភិបាល បានបើកវគ្គជាលើកដំបូងនៅថ្ងៃទី ១៥ ខែមករា ឆ្នាំ ២០២៤ ដោយមានយុវជនចុះឈ្មោះចូលរៀនប្រមាណជិត ២ ម៉ឺននាក់ បន្ទាប់ពីរាជរដ្ឋាភិបាលបានប្រកាសដាក់ឱ្យអនុវត្តកម្មវិធីនេះជាផ្លូវការ កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ។
ដោយឡែកការចុះឈ្មោះចូលរៀននេះមិនតម្រូវឱ្យបង់ប្រាក់ទេ ហើយចំពោះយុវជនមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានថវិកាឧបត្ថម្ភបន្ថែមចំនួន ២៨ ម៉ឺនរៀល ក្នុង ១ ខែទៀតផង។ ប៉ុន្តែយុវជនមកពីសេដ្ឋកិច្ចក្នុង ឬ ក្រៅប្រព័ន្ធ ឬ កម្មករ-និយោជិត ដែលមានបំណងចង់រៀនជំនាញបន្ថែម ក៏អាចចុះឈ្មោះចូលរៀនដោយឥតគិតថ្លៃបានដែរ តែមិនទទួលបានប្រាក់ឧបត្ថម្ភដូចយុវជនមកពីគ្រួសារក្រីក្រ និងងាយរងហានិភ័យទេ៕