ភ្នំពេញ៖ នៅថ្ងៃទី២២ ខែមករា ឆ្នាំ២០២៤នេះ រដ្ឋមន្ត្រីក្រសួងធនធានទឹក បានបើកកិច្ចប្រជុំស្តីពីប្រព័ន្ធប្រកាសអាសន្នជាមុនពីគ្រោះមហន្តរាយធម្មជាតិនានា ជាមួយប្រតិភូតំណាងក្រុមការងារហានិភ័យពីអាកាសធាតុ និងប្រព័ន្ធប្រកាសអាសន្នជាមុន (CREWS- Climate Risks and Early Warning Systems) អង្គការឧតុនិយមពិភពលោក(WMO) និងតំណាងមជ្ឈមណ្ឌលគ្រប់គ្រងគ្រោះមហន្តរាយអាស៊ី(ADPC)។
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក។
កិច្ចប្រជុំនេះដើម្បីកំណត់ទិសដៅយុទ្ធសាស្ត្រ និងទម្រង់ប្រតិបត្តិការនាពេលអនាគត ដែលជាផ្នែកដ៏សំខាន់មួយនៃការងារឧតុនិយម និងជលសាស្ត្រ។នេះបើតាមទំព័រហ្វេសប៊ុករបស់ក្រសួងធនធានទឹកនិងឧតុនិយម។
កិច្ចប្រជុំនេះ ភាគីទាំងពីរបានពិភាក្សាលម្អិតជាមួយក្រុមការងារ និងមន្រ្តីបច្ចេកទេសនៃក្រសួងធនធានទឹក និងឧតុនិយមពាក់ព័ន្ធនឹងការផ្តល់សេវាឧតុនិយម និងការព្យាករអាកាសធាតុ ក្នុងបរិបទប្រទេសកម្ពុជា និងបរិបទនៃការប្រែប្រួលអាកាសធាតុសកល។
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក បានជម្រាបប្រាប់កិច្ចប្រជុំថា កម្ពុជាជាប្រទេសកំពុងអភិវឌ្ឍ និងជាប្រទេសងាយរងគ្រោះពីហានិភ័យនៃគ្រោះធម្មជាតិ ជាពិសេសទឹកជំនន់នារដូវវស្សា គ្រោះរាំងស្ងួតនារដូវប្រាំង ខ្យល់ព្យុះនិងខ្យល់កន្រ្តាក់ជាដើម។ ជាក់ស្តែង ពេលបច្ចុប្បន្ននេះប្រទេសកម្ពុជាកំពុងជួបប្រទះគ្រោះរាំងស្ងួតនិងប្រឈមការខ្វះទឹកស្រោចស្រពដំណាំស្រូវ ក្នុងពេលប្រជាកសិករបង្កបង្កើនផលស្រូវរដូវប្រាំងលើសផែនការកំណត់ ដែលតំបន់ខ្លះធ្វើលើសផែនការពី ២ទៅ៣ដង។
រដ្ឋមមន្រ្តីក្រសួងធនធានទឹក និងគណៈប្រតិភូ CREWS។
ទោះបីជាយ៉ាងណា ឯកឧត្តមរដ្ឋមន្ត្រីបញ្ជាក់ថា ក្រសួងធនធានធានទឹក និងឧតុនិយម រួមជាមួយអាជ្ញាធរពាក់ព័ន្ធទាំងថ្នាក់ជាតិ និងនៅមូលដ្ឋានភូមិឃុំ បាននិងកំពុងខិតខំយ៉ាងសស្រាក់សស្រាំក្នុងការអន្តរាគមន៍បូមទឹកសង្រ្គោះស្រូវរដូវប្រាំងរបស់ប្រជាកសិករ ដែលកំពុងប្រឈមខ្វះទឹក សំដៅជួយកាត់បន្ថយនូវការខូចខាតឱ្យបានជាអតិបរមា។
ជាមួយគ្នានេះដែរ ឯកឧត្តមរដ្ឋមន្ត្រីថា វត្តមានរបស់ CREWS នាឱកាសនេះ នឹងជួយដល់កិច្ចសហការក្នុងវិស័យឧតុនិយម ទាំងរដូវវស្សា និងរដូវប្រាំង ជាពិសេសការពង្រឹងលើប្រព័ន្ធប្រកាសអាសន្ននិងការជូនដំណឹងជាមុនដល់ប្រជាពលរដ្ឋងាយរងគ្រោះឱ្យត្រៀមលក្ខណៈប្រុងប្រយ័ត្ន ឈានទៅកាត់បន្ថយនូវគ្រោះមហន្តរាយធម្មជាតិនានា និងកាត់បន្ថយបានការខាតបង់ធ្ងន់ធ្ងរផ្នែកសេដ្ឋកិច្ច។
ឯកឧត្តមរដ្ឋមន្ត្រីបានលើកឡើងថា ពិភពលោកទាំងមូលបាននិងកំពុងប្រឈមចំពោះការប្រែប្រួលអាកាសធាតុដែលបង្កជាការឡើងកម្តៅនៃភពផែនដី ការកើនឡើងនីវ៉ូទឹកសមុទ្រ និងការជ្រាបចូលនៃទឹកប្រៃ (SEA level rise and Salinity intrusion) ដែលនឹងជះឥទ្ធិពលលើជីវិតទាំងអស់ដែលមាននៅលើភពផែនដី ជាពិសេស មនុស្ស សត្វ និងរុក្ខជាតិ ដែលផលវិបាកនៃការប្រែប្រួលអាកាសធាតុ។ បញ្ហានេះទាមទារឱ្យមានការយកចិត្តទុកដាក់ខ្ពស់ពីគ្រប់ដៃគូពាក់ព័ន្ធ ជាពិសេសស្ថាប័នរដ្ឋាភិបាល ដើម្បីធ្វើយ៉ាងណាស្វែងរកដំណោះស្រាយរួម និងឈានទៅកាត់បន្ថយបានគ្រោះមហន្តរាយធម្មជាតិទាំងនេះ។
គួរបញ្ជាក់ថា ក្រសួងធនធានទឹក និងឧតុនិយម នាពេលកន្លងមកបានធ្វើកិច្ចសហការជាមួយអង្គការ CREWS លើគម្រោងមួយចំនួនដូចជា៖ ទី១)វគ្គបណ្តុះបណ្តាលមន្ត្រីនាយកដ្ឋានឧតុនិយម និងនាយកដ្ឋានជលសាស្ត្រ និងការងារទន្លេពីការផលិតផែនទីហានិភ័យគ្រោះរាំងស្ងួត និងទឹកជំនន់ ទី២)វគ្គបណ្តុះបណ្តាលពីការព្យាករធាតុអាកាស ផលប៉ះពាល់និងការផ្តល់ព័ត៌មានជាមុន ទី៣)វគ្គបណ្តុះបណ្តាលពីការប្រើប្រាស់ប្រព័ន្ធគ្រប់គ្រងទិន្នន័យអាកាសធាតុនិងជលសាស្ត្រ និងដំឡើងSoftware ប្រព័ន្ធគ្រប់គ្រងទិន្នន័យនៅលើServer នាយកដ្ឋានជលសាស្ត្រ និងការងារទន្លេ និង ទី៤)គម្រោងអភិវឌ្ឍប្រព័ន្ធព្យាករណ៍ទឹកជំនន់ និងផ្តល់ដំណឹងជាមុននៅអាងស្ទឹងព្រែកត្នោត ស្ទឹងសែន និងស្ទឹងពោធិ៍សាត់៕