សមត្ថកិច្ចបានបញ្ជូនខ្លួនបុរសដែលបើករថយន្តម៉ាក Ford Ranger ដែលបង្កគ្រោះថ្នាក់ចរាចរណ៍នៅចំណុចស្តុបស្ពានឫស្សីកែវ បណ្តាលឱ្យមនុស្សស្លាប់ ០៤នាក់ រងរបួសធ្ងន់ ០៣នាក់ និងរបួសស្រាល ០១នាក់ ទៅសាលាដំបូងរាជធានីភ្នំពេញហើយនៅល្ងាចថ្ងៃទី២២ ខែមករា ឆ្នាំ២០២៤ នេះ។ បើតាមសេចក្តីរាយការណ៍ការបញ្ជូនខ្លួននេះដើម្បីចាត់ការតាមនីតិវិធីដ្បិត ជាប់ពាក់ព័ន្ធករណីបើកបរល្បឿនលឿន និងបើកបរក្នុងស្ថានភាពស្រវឹងមានអត្រាជាតិអាកុល ០.៥៤ មីលីក្រាមក្នុងមួយលីត្រខ្យល់។
ជនបង្កហេតុត្រូវបញ្ជូនមកតុលាការ។
គួររំលឹកថា កាលពីថ្ងៃទី២០ ខែមករា ឆ្នាំ២០២៤ វេលាម៉ោងប្រមាណ៧យប់ មានករណីគ្រោះថ្នាក់ចរាចរណ៍បុករះមួយបានកើតឡើងនៅចំណុចក្រោមស្ពានអាកាសឫស្សីកែវ ស្ថិតក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ បណ្ដាលឱ្យមានមនុស្សប្រុសស្រី៤នាក់បាត់បង់ជីវិត និងរងរបួសធ្ងន់ស្រាលចំនួន៤នាក់។
រថយន្តបង្កម៉ាក Ford Ranger ពណ៌ស ពាក់ស្លាកលេខ ភ្នំពេញ ២AZ-៥៩៥៤ បើកបរដោយឈ្មោះ នាង សំអូន ភេទប្រុស អាយុ៥៦ឆ្នាំ មុខរបរមន្ត្រីក្រសួងហិរញ្ញវត្ថុ មានទីលំនៅផ្ទះលេខ៤០A ផ្លូវលេខ២១០ ភូមិ៤ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ បើកបរក្នុងកម្រិតជាតិអាកុល ០.៥៤។
ប្រភពព័ត៌មានបានឱ្យដឹងបន្តថា នៅមុនពេលកើតហេតុនៅចំណុចទីតាំងខាងលើកំពុងមានការមមាញឹកចរាចរណ៍ ខណៈរថយន្ដនឹងម៉ូតូជាច្រើនគ្រឿងឈប់រង់ចាំស្ដុប ភ្លាមៗស្រាប់តែមានរថយន្តម៉ាក Ford Ranger មួយគ្រឿងពណ៌ស ពាក់ស្លាកលេខភ្នំពេញ 2AZ-5854 ធ្វើដំណើរចុះពីស្ពានឬស្សីកែវ ក្នុងទិសដៅពីកើតមកលិច ដោយល្បឿនយ៉ាងលឿនមក បុករះម៉ូតូ និង រថយន្ដពេញទំហឹងជាច្រើនគ្រឿង បណ្ដាលឱ្យមានមនុស្សដេកដួលរដូករណែលពេញផ្លូវ ខ្លះកៀបជាប់ក្រោមរថយន្ដ៕
អត្ថបទ៖ចតុមុខ