សិល្បៈជាតិ៖ កម្មវិធីប្រកួតសម្រស់ដ៏ធំ Miss Global International 2023 បានរៀបចំការប្រកួតវគ្គផ្ដាច់ព្រ័ត្រ គំរប់ខួប១០ឆ្នាំ របស់ខ្លួននៅលើទឹកដីដ៏អច្ឆរិយៈកម្ពុជាអង្គរ ដោយរកបានស្រីស្អាតចំនួន៥រូបជាម្ចាស់តំណែងកំពូលទាំង៥ ឬ Top5 នៃកម្មវិធី។
ក្នុងកម្មវិធីសន្និសីទសារព័ត៌មានគណៈកម្មការ Miss Global 2024 និង Top5 ក្រោយបញ្ចប់ដំណើរទស្សនកិច្ច និង មុនគោរពលាពីកម្ពុជា អ្នកសារព័ត៌មានតំណាងឱ្យស្ថាប័នត្រយងបានសួរទៅកាន់បវរកញ្ញាទាំង៥រូប ថាក្រោយបានមកប្រកួតនៅប្រទេសកម្ពុជា ពេលត្រលប់ទៅកាន់ប្រទេសកំណើតវិញ កញ្ញានឹងណែនាំ ឬនិយាយអ្វីខ្លះពីកម្ពុជាប្រាប់ទៅប្រជាជនរបស់ប្រទេសកញ្ញា?
ក្នុងនោះបវរកញ្ញាថៃ កញ្ញា Karn Chonnikarn (កាន ឈុននិកាន) ដែលជាប្រទេសជាប់ភូមិផងរបងជាមួយកម្ពុជា ហើយរមែងតែងតែមានបញ្ហាចម្រូងចម្រាសគ្នាជារឿយៗ លើរឿងប្រពៃណីនិងវប្បធម៌ បានថ្លែងពីគោលបំណងរបស់ខ្លួនថា កញ្ញា ចង់ឃើញប្រជាជនទាំងពីរប្រទេស ថៃ និងកម្ពុជា ឈប់ឈ្លោះប្រកែកគ្នា ថាអ្នកណាជាម្ចាស់វប្បធម៌ តែត្រលប់មកពួតដៃគ្នាផ្សព្វផ្សាយរួមគ្នាពីវិស័យទេសចរណ៍ដើម្បីទាក់ទាញភ្ញៀវបរទេសឱ្យមកទស្សនានៅប្រទេសទាំងពីរវិញ។
សូមជម្រាបជូនថា កម្មវិធីប្រកួតសម្រស់ Miss Global International 2023 បានបញ្ចប់ទៅដោយជោគជ័យកាលពីរាត្រី ទី១៨ ខែមករា ឆ្នាំ២០២៤ ដោយក្នុងនោះបវរកញ្ញាថៃ កញ្ញា កាន ឈុននិកាន ទទួលបានតំណែងលំដាប់រងទី២ រីឯបវរកញ្ញានៃប្រទេស ព័រតូរីកូ គឺជាម្ចាស់ជ័យលាភី ម្ចាស់មកុដ Miss Global International ប្រចាំឆ្នាំ២០២៣ ដែលជាឆ្នាំ គំរប់ខួប លើកទី១០ នៃការបង្កើតកម្មវិធីមួយនេះឡើង៕
