សិល្បៈជាតិ៖ លោក ចេង រតនា គឺជាអតីតនិស្សិតច្បាប់ បានក្លាយជាយុវជនឆ្នើមដំបូងគេ ដែលបើកទំព័រជាម្ចាស់ជ័យលាភីប្រឡងសរសេរតាមអាន «សំណេរអង្គរ» ជាប្រវត្តិសាស្ត្រ ដោយយុវជនរូបនេះ គឺជាបេក្ខជនសរសេរពាក្យត្រូវច្រើនជាងគេដែលសរសេរខុសតែ២ពាក្យប៉ុណ្ណោះ នៃសំណេរប្រឡងតាមអានថ្នាក់ជាតិ មានអ្នកចូលរួមជាង ៧០០នាក់ នៅស្ពានហាលប្រាសាទអង្គរវត្ត។
យ៉ាងណាមិញ ការប្រឡងសរសេរតាមអាន «សំណេរអង្គរ» ត្រូវបានរៀបចំឡើងដោយក្រសួងវប្បធម៌ និងវិចិត្រសិល្បៈ ក្រោមវត្តមានដ៏ខ្ពង់ខ្ពស់ពីលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា បានចូលរួមជាអធិបតីភាព និងអានអត្ថបទប្រឡងទៅកាន់បេក្ខជនក្នុងរយៈពេលមួយម៉ោង ដែលអត្ថបទទាក់ទងនឹងរមណីយដ្ឋានអង្គរ ជាការរៀបចំសម្រិតសម្រាំងទុកដោយឯកឧត្តមឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្រោមចំណងជើងថា «អង្គរ អាណាចក្រនៃអរិយធម៌ខ្មែរ»។
គួររំលឹកដែរថា លោក ចេង រតនា បានបញ្ចប់ការសិក្សាផ្នែកនីតិសាស្ត្រនៅសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច រយៈពេល ៤ ឆ្នាំ និងបានបន្តទៅសិក្សាបន្តនៅប្រទេសបារាំងបន្ថែមទៀត។ លោកគឺជាយុវជនម្នាក់ដែលតែងតែចូលរួមសកម្មភាពលើកស្ទួយវប្បធម៌សិល្បៈខ្មែរគ្រប់ទម្រង់ និងជាពិសេសទៅលើការចូលរួមអភិរក្ស និងលើកតម្លៃការសរសេរសំណេរអក្សរសាស្ត្រខ្មែរនៅលើបណ្ដាញសង្គមឱ្យបានត្រឹមត្រូវផងដែរ។
សូមជម្រាបថា កម្មវិធីសំណេរអង្គរ ជាកម្មវិធីថ្មីដែលបង្កើតឡើងក្នុងបំណងលើកកម្ពស់អក្សរសាស្ត្រខ្មែរ តាមរយៈការប្រឡងប្រជែងសរសេរតាមអាន។ កម្មវិធីនេះក៏អាចនឹងក្លាយជាព្រឹត្តិការណ៍ថ្នាក់ជាតិជាប្រចាំឆ្នាំផងដែរនាពេលអនាគត៕