សិល្បៈជាតិ៖ ដូចមហាជនអ្នកគាំទ្របានជ្រាប និង ដឹងហើយថា កម្មវិធី Miss Global International 2023 នៃវគ្គផ្ដាច់ព្រ័ត្រត្រូវបានរៀបចំនឹងដឹកនាំដោយលោកអ៊ិន សុភិន អគ្គនាយកក្រុមហ៊ុនមហាហង្សសហការជាមួយស្ថានីយ៍ទូរទស្សន៍បាយ័នដែលបានធ្វើឡើងនៅរាត្រីថ្ងៃទី ១៨ ខែមករា ឆ្នាំ២០២។
គេសង្កេតឃើញថា កម្មវិធីធំកម្រិតពិភពលោកនេះ មានស្រីស្អាតដែលជាបេក្ខនារីប្រកួត ទាំង អ៊ឺរ៉ុប អាស៊ី អាហ្វ្រិច និងឡាទីន សរុបដល់ទៅ ៧៩រូប។ ចំណែកឯអ្នកគាំទ្រជាតិ និងអន្តរជាតិជាច្រើននាក់ ក៏បានសម្រុកមកចូលរួមលើកទឹកចិត្តបវរកញ្ញាតាមប្រទេសរបស់ខ្លួនរហូតដល់ណែនខាប់ស្ទូឌីយូ ហាក់ដូចជាពិតតាមអ្វីដែលលោក អ៊ិន សុភិន សន្យាថា ការនាំយកកម្មវិធីប្រកួតលំដាប់អន្តរជាតិ Miss Global International 2023 មករៀបចំនៅលើទឹកដីប្រទេសកម្ពុជា គឺអាចស្រូបទាញភ្ញៀវទេសចរណ៍អន្តរជាតិបានយ៉ាងច្រើននាក់មកកាន់កម្ពុជាតាមរយៈសកម្មភាពហ្វេនៗរបស់កម្មវិធី។
យ៉ាងណាមិញ អ្វីដែលមិនគួរមើលរំលងបាននោះគឺ នៅពីក្រោយភាពស្រស់ស្អាតរបស់បវរកញ្ញាអន្តរជាតិគ្រប់រូប គឺត្រូវបានលើកសម្រស់ដោយទឹកដៃកូនខ្មែរជាច្រើននាក់ ដែលបានជួយតុបតែងបន្ថែមភាពស្រស់ស្អាតលើផ្ទៃមុខនិងច្នៃម៉ូដសក់គ្រប់ទម្រង់ទៅតាមទ្រេមុខបវរកញ្ញានីមួយៗរហូតមានភាពជឿជាក់។
សូមជម្រាបថា ក្នុងនាមកម្ពុជាជាម្ចាស់ផ្ទះរៀបចំការប្រកួតMiss Global International 2023 នេះ ត្រូវបានហ្វេនអ្នកគាំទ្រវិស័យប្រកួតបវរកញ្ញាសម្លឹងឃើញថា ជាការជួយលើកតម្កើងកិត្តិយសមុខមាត់ប្រទេសជាតិ បង្ហាញពីភាពសុខដុមរមនា ទំនុកចិត្តក្នុងការរៀបចំកម្មវិធីលំដាប់អន្តរជាតិ បង្កើនឱកាសសេដ្ឋកិច្ច ស្រូបទាញបណ្តាភ្ញៀវទេសចរណ៍អន្តរជាតិឱ្យចូលមកទស្សនាប្រទេសកម្ពុជា ជាពិសេសទស្សនាតំបន់អង្គរ ដែលកត្តាទាំងអស់នេះហើយគឺធាតុផ្សំចម្បងក្នុងការផ្សព្វផ្សាយទៅកាន់ពិភពលោកអំពីអ្វីដែលប្រទេសកម្ពុជាមានផងដែរ។
អ្នកគាំទ្រវិស័យបវរកញ្ញាគ្រប់គ្នារំពឹងទុកថា រាជរដ្ឋាភិបាលនឹងងាកមកសម្លឹងឃើញពីការជួយជ្រោមជ្រែងវិស័យប្រកួតសម្រស់នៅកម្ពុជាឱ្យកាន់តែមានសក្ដានុពលខ្លាំងខ្លាជាងនេះបន្ថែមទៀត ដើម្បីឱ្យវិស័យមួយនេះកាន់តែរីកដុសដាលក្នុងការបង្កើនសេដ្ឋកិច្ចជូនជាតិ។ កម្មវិធីប្រកួតសម្រស់ Miss Global International រកបានបេក្ខភាពស្រីស្អាតដែលជាម្ចាស់មកុដឆ្នាំ២០២៣ គឺ បវរកញ្ញ មកពីប្រទេស ព័រតូរីកូ កញ្ញា Ashley Melendez៕
