សិល្បៈជាតិ៖ ករណីស្រីស្អាត Influencer ល្បីឈ្មោះ ម៉ន សូលីដែត ត្រូវបានលោក ហុក ពៅ ចៅក្រមជំនុំជម្រះសាលាដំបូងរាជធានីភ្នំពេញនៅរសៀលថ្ងៃទី២៥ ខែមករា ឆ្នាំ២០២៤ បានប្រកាសសាលក្រមបានផ្តន្ទាទោសដាក់ពន្ធនាគារកំណត់២ ឆ្នាំ និងតម្រូវឱ្យសងប្រាក់ទៅដើមបណ្តឹងរដ្ឋប្បវេណីចំនួន ២៨៩១៧៩ ដុល្លារ សាលក្រមបានទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ បើសិនភាគីណាមួយកើតទុកមិនសុខចិត្តចំពោះការកាត់ក្តីនេះ ។
ដោយឡែកកាលពីព្រឹកថ្ងៃទី១៥ ខែមករា ឆ្នាំ២០២៤ សាលាដំបូងរាជធានីភ្នំពេញ បានលើកយកសំណុំរឿង ឆបោក (រំលោភលើទំនុកចិត្ត) មួយករណី មកបើកសវនាការជាសាធារណៈ ជនជាប់ចោទឈ្មោះ ម៉ន សូលីដែត ភេទស្រី អាយុ៣០ ឆ្នាំ មុខរបរ Influencer និងជាអ្នកលក់អនឡាញន៍ល្បីឈ្មោះមួយរូប និងដើមបណ្តឹងរដ្ឋប្បវេណីមានឈ្មោះ វ៉ា សូលីដា ភេទស្រី អាយុ ៣១ ឆ្នាំ មុខរបរ អ្នករកស៊ី (ដើមបណ្តឹង និងជនជាប់ចោទត្រូវជាបងថ្លៃ និងប្អូនថ្លៃ) ។
ទាក់ទិននិងអង្គហេតុក្នុសំណុំរឿង.រំលោភទំនុកចិត្ត ដែលតុលាការបានលើកយកមកបើកសវនាការពេលនេះ ត្រូវបានគេដឹងថា ជនរងគ្រោះឈ្មោះ វ៉ា សុលីដា និងជនជាប់ ចោទឈ្មោះ ម៉ន សូលីដែត ត្រូវជាបងថ្លៃនិងប្អូនថ្លៃតាំងពីឆ្នាំ២០២០ បន្ទាប់ពីឈ្មោះ ម៉ន សូលីដែត បានរៀបការជាមួយប្អូនប្រុសដើមបណ្តឹងមក ពួកគេបានស្នាក់នៅផ្ទះលេខ២៤បេ ផ្លូវលេខ៩៩ ភូមិឬស្សី១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
ក្នុងអំឡុងពេលស្នាក់នៅជាមួយគ្នា ឈ្មោះ ម៉ន សូលីដែត តែងតែនិយាយពីរឿងអបិយជំនឿបាប់បងថ្លៃថា គាត់(ដើមបណ្តឹង)ជាមនុស្សអភ័ព្វគូរ និងរកស៊ីមិនសមប្រកប ហើយបើចង់កែប្រែវាសនា គេ (ជនជាប់ចោទ) បានស្គាល់លោកសង្ឃមួយអង្គ នៅខេត្តតាកែវ ។
ឈ្មោះ ម៉ន សូលីដែត តែងតែនិយាយប្រើល្បិចអូសទាញជនរងគ្រោះឱ្យជឿជាក់លើខ្លួន ដោយប្រៀបធៀបទៅលើបុគ្គលដែលរកស៊ីដោយជោគជ័យមួយចំនួននៅក្នុងស្រុកខ្មែរ គឺពួកគាត់សុទ្ធតែបានទៅរកលោកសង្ឃអង្គនោះ ឱ្យជួយធ្វើមន្តអាគម្ភអូមអាម ទើបរកស៊ីមានបានរហូតដល់សព្វថ្ងៃ ។ ដោយមានការជឿលើអបិយជំនឿ និងទុកចិត្តទាំងស្រុងលើឈ្មោះ ម៉ន សូលីដែត ជាប្អូនថ្លៃ ជនរងគ្រោះបានយល់ព្រមឲ្យជួយទាក់ទងទៅលោកសង្ឃនោះ ដើម្បីឲ្យជួយធ្វើកិច្ចកែប្រែវាសនាឱ្យគាត់ ដើម្បីឱ្យរកស៊ីកាត់តែលូតលាស់មានបានទៅមុខទៀត ។ ឈ្មោះ ម៉ន សូលីដែត បានប្រាប់ជនរងគ្រោះទៀតថា រាល់ការទាក់ទងទៅជាមួយលោកសង្ឃ គឺរូបគេជាអ្នកទាក់ទងផ្ទាល់ ដោយហាមមិនឲ្យជនរងគ្រោះទាក់ទងទេ ពោលគឺការងារចាត់ចែងអ្វីៗ ឈ្មោះ ម៉ន សូលីដែត អនុវត្តផ្ទាល់ទាំងអស់ ។
បន្ទាប់មកទៀត ម៉ន សូលីដែត បានប្រាប់ជនរងគ្រោះឲ្យវេលុយផ្តល់តាមអាខោន ABA ឈ្មោះ MORN SOLIDETH ជាបន្តបន្ទាប់សរុបទឹកប្រាក់ ២០៧.៥៧៩ ដុល្លារអាមេរិក ដើម្បីយកទៅតម្កល់កំណល់”ជើងព្រះ” មាស ចំនួនពីរដុំទម្ងន់២០ ដំឡឹង ស្មើទឹកប្រាក់ចំនួន ៤៧.០០០ ដុល្លារអាមេរិក សម្រាប់តម្កល់នៅក្នុងបន្ទប់សមាធិ និងតម្កល់លុយសុទ្ធនៅក្រោមខ្នើយរបស់ខ្លួន(ម៉ន សូលីដែត)សម្រាប់ចម្លងដៃ(ចម្លងកិច្ចអបិយជំនឿ)លើទឹកប្រាក់ចំនួន ៣៤.៦០០ ដុល្លារអាមេរិក ។
តាមពាក្យបណ្តឹងបានបញ្ជាក់ទៀតថា ក្រោយមកទៀតឈ្មោះ ម៉ន សូលីដែត តែងតែល្បួងលួង លោមជនរងគ្រោះឱ្យផ្តល់លុយបន្ថែម ប៉ុន្តែជនរងគ្រោះមានការសង្ស័យ និងអស់ជំនឿព្រោះនៅពេលដាក់លុយឲ្យម្តងៗ មិនដែលឃើញបានផលប្រយោជន៍មកវិញទេ ហើយជនរងគ្រោះក៏បានឈប់បន្តធ្វើកិច្ចតទៅទៀត ទើបនៅថ្ងៃទី២៧ ខែមករា ឆ្នាំ២០២៣ ជនរងគ្រោះបានសុំដកលុយ និងមាសយកមកវិញ ពេលនោះឈ្មោះ ម៉ន សូលីដែត បានទៅកាយយកមាសដែលកប់ក្នុងបន្ទប់សមាធិន ស្រាប់តែឃើញសុទ្ធតែមាសក្លែងក្លាយយកមកប្រគល់ឲ្យជនរងគ្រោះ ឃើញដូច្នោះជនរងគ្រោះបានឆោឡោ ទើបឈ្មោះ ម៉ន សូលីដែត និយាយថារូបគេជាអ្នកទទួលខុសត្រូវ ។
លុះព្រឹកថ្ងៃទី២៨ ខែកក្កដា ឆ្នាំ២០២៣ ជនរងគ្រោះបានទៅដាក់ពាក្យបណ្តឹងនៅកងរាជអាវុធហត្ថរាជធានីភ្នំពេញ ដើម្បីឲ្យជួអន្តរាគមន៍ឆែកឆេរលើឈ្មោះ ម៉ន សូលីដែត ស្រាប់តែឃើញលុយដុល្លារ និងមាសក្លែងក្លាយទាំងអស់ ទើបសមត្តកិច្ចនាំយកជនសង្ស័យទៅធ្វើការសាកសួរនិងកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី ហើយជនសង្ស័យត្រូវតុលាការសម្រេចឃុំខ្លួនដាក់ពន្ធនាគារព្រៃសចាប់ពីពេលនោះ ៕
