សិល្បៈជាតិ៖ ដំណឹងចុងក្រោយដែលសារព័ត៌មានត្រយងទទួលបានឱ្យដឹងថា តារាចម្រៀង រតនៈ ពិសី ត្រូវតុលាការសម្រេចឃុំខ្លួនដាក់ពន្ធនាគារព្រៃស.ម២ បណ្តោះអាសន្ន ពីបទ រំលោភលើទំនុកចិត្ត និងមិនបំពេញកាតព្វកិច្ចចំពោះឧបករណ៍ដែលអាចជួញដូរបានចំនួន ១៩២០០ ដុល្លារ។
ចៅក្រមស៊ើបសួរសាលាដំបូងរាជធានីភ្នំពេញប្រភេទ នៅថ្ងៃទី២៤ខែមករាឆ្នាំ២០២៤ បានសម្រេចឃុំញ្ជូនខ្លួនតារាចម្រៀង រតនៈ ពិសី ឬឈ្មោះពិត កែវ ពិសី អាយុ២៧ឆ្នាំ ជាតារាចម្រៀង និងជាម្ចាស់ក្រុមហ៊ុន ELI KP TRADING CO LTD ដែលមានអាសយដ្ឋានបច្ចុប្បន្ន ផ្ទះលេខ១៩ ផ្លូវលេខ៥ ភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។
ដោយឡែកការឃាត់និងបញ្ជូនខ្លួនតារាចម្រៀង រតនៈ ពិសី គឺធ្វើឡើងតាមពាក្យបណ្ដឹងរបស់ឈ្មោះ ផាន សុរិយា ភេទស្រី អាយុ៣១ឆ្នាំ ដោយបានប្តឹងចោទប្រកាន់ឈ្មោះ កែវ ពិសី ពីបទរំលោភលើទំនុកចិត្ត និងមិនបំពេញកាតព្វកិច្ចចំពោះឧបករណ៍ដែលអាចជួញដូរបាន ប្រព្រឹត្តនៅចំណុចរាជធានីភ្នំពេញ កាលកំឡុងថ្ងៃទី១៣ ខែមេសា ឆ្នាំ២០២។
គួររំលឹកដែរថា ឯកឧត្តម ច្រឹង ខ្មៅ ព្រះរាជអាជ្ញានៃអយ្យអមសាលាដំបូងរាជធានីភ្នំពេញ កាលពីថ្ងៃទី១៨ ខែមករាឆ្នាំ២០២៤ បានចេញដីកាបញ្ជាឱ្យជនសង្ស័យឈ្មោះ កែវ ពិសី ភេទស្រីឱ្យចូលខ្លួនទៅនាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃឲ្យបានមុនថ្ងៃទី១៦ ខែកុម្ភៈឆ្នាំ២០២៤ នៅរៀងរាល់ម៉ោងធ្វើការ ដើម្បីសាកសួរលើបណ្តឹងរបស់ឈ្មោះ ផាន សុរិយា ភេទស្រីអាយុ៣១ឆ្នាំ ជនជាតិខ្មែរ ទើបកម្លាំងសមត្ថកិច្ចឃាត់ខ្លួន៕
