សិល្បៈជាតិ៖ សិល្បករភ្លេងបុរាណខ្មែរ ឌៀប សិដ្ឋសុធា បានជ្រើសប្រើវិធីសាស្ត្រលួងកូនតូចរបស់ខ្លួន ដោយប្រគំបទ «Baby Shark» ជា Version ចាប៉ីដងវែង យ៉ាងពីរោះរណ្ដំ រហូតវីដេអូនោះកំពុងផ្ទុះការចាប់អារម្មណ៍ខ្លាំងនៅលើបណ្ដាញសង្គមនាពេលថ្មីនេះ។
មហាជនជាអ្នកលេងបណ្ដាញសង្គមជាច្រើននាក់មិនត្រឹមតែសរសេរសិល្បកររូបនេះដែលមានគំនិតច្នៃប្រឌិតនោះទេ ពួកគេថែមទាំងលើកមតិមកនិយាយក្នុង Comment ជាច្រើនទៀតថា ៖ «ប្ដីល្អចេះផ្ដល់ពេលវេលាដល់គ្រួសារ» «មានប៉ាអ្នកចាប៉ីគឺចឹងចង់បានបទអីឥលូវ» «យកប្តីចេះភ្លេងឡូយចឹង» និង «លេងកំដរឱ្យកូនពូជស្ដាប់ពេលដាច់ Internet» ជាដើម។
ដូចមហាជនបានដឹងមកហើយថា បទ «Baby Shark» គឺជាបទចម្រៀងរបស់បរទេសទម្រង់ប្រភេទចម្រៀងកុមារ ដែលបទនេះមានទម្រង់ផ្សារភ្ជាប់ជាមួយនឹងចលនាក្បាច់រាំរបស់កុមារ។ តារាចម្រៀងដែលបកស្រាយបទ «Baby Shark» នាងមានឈ្មោះថា Hopey Segoine ឬ Hope Marie បកស្រាយនៅអាយុ ១៤ ឆ្នាំ ជាកូនជនជាតិកូរ៉េកាត់អាមេរិក កើតនៅទីក្រុង Honolulu រដ្ឋ Hawaii នៃសហរដ្ឋអាមេរិក។ ដោយនៅឆ្នាំ ២០១៦ Pinkfong ដែលជាក្រុមហ៊ុនកម្សាន្តធំមួយរបស់ប្រទសកូរ៉េខាងត្បូង បានបញ្ចេញផ្សាយបទចម្រៀងនេះជាផ្លូវការនៅថ្ងៃទី ១៨ ខែមិថុនា ឆ្នាំ ២០១៦ លើបណ្ដាញសង្គមយូធូប ទទួលការគាំទ្រខ្លាំងរហូតក្លាយជាបទចម្រៀងល្បីទូទាំងសកលលោកតែម្ដង។
សូមជម្រាបថា សិល្បករ ឌៀប សិដ្ឋសុធា មិនត្រឹមតែជាសិល្បករផ្នែកភ្លេងបុរាណខ្មែរនោះទេ លោកក៏ជាមានទឹកដមសំនៀងពីរោះក្រអួនក្រអៅថែមទៀត ហើយលោកក៏ធ្លាប់បានចូលរួមបកស្រាយបទចម្រៀងជាច្រើន ក្រោយស្នាដៃនិពន្ធរបស់សម្តេចអគ្គមហាសេនាបតីតេជោ ហ៊ុន សែន ផងដែរ។
ដើម្បីកុំឱ្យខាតពេលយូរ សូមប្រិយមិត្តទាំងរីករាយស្ដាប់ និងទស្សនាការប្រគំបទ «Baby Shark» ទម្រង់ចាប៉ីដងវែងដោយសិល្បករ ឌៀប សិដ្ឋសុធា ដូចតទៅ៖
