សិល្បៈជាតិ៖ ថ្មីនេះ តាមការប្រកាសនៅលើបណ្ដាញសង្គមបានឱ្យដឹងថា Influencer ចំនួន ៩ នាក់ ពួតដៃគ្នាផលិតមាតិការវីដេអូសម្រុកប្រម៉ូដតំបន់ទេសចរណ៍អង្គរ ដើម្បីស្របតាមគោលនយោបាយរាជរដ្ឋាភិបាលកម្ពុជា ក្នុងកាជម្រុញដល់វិស័យទេសចរណ៍កម្ពុជានៅឆ្នាំ២០២៤។
ជាមួយគ្នានោះ ក្រុមអ្នកផលិតមាតិកាទាំង ៩ នាក់នោះ នឹងបង្កើតមាតិការវីដេអូថ្មីៗប្លែកភ្នែក ក្នុងប្រយោជន៍ទាក់ទាញក្រសែភ្នែកភ្ញៀវទេសចរណ៍ជាតិ និងអន្តរជាតិឱ្យងាកមកចាប់អារម្មណ៍កាន់តែខ្លាំងពីតំបន់ទេសចរណ៍របស់កម្ពុជា ពិសេសតំបន់ទេសចរណ៍ធម្មជាតិ និងប្រវត្តិសាស្ត្រនៅលើទឹកដីនៃខេត្តសៀមរាបនោះតែម្តង។
កម្មវិធីនេះមានឈ្មោះថា “ស៊ីយូខេមបូឌា”(See You Cambodia ) ទស្សនាសៀមរាបឆ្នាំ២០២។ កម្មវិធីនេះត្រូវបានរៀបចំបង្កើតផ្តូចផ្តើមឡើងដោយ សហគមន៍ធនញ្ជ័យ និងក្រុមការងារ ខូល័រណាន៍ ជាមួយនឹងយុវជនស្ម័គ្រចិត្តមួយក្រុម ដើម្បីជាគម្រូផ្ដួចផ្ដើមគាំទ្រ ដល់យុទ្ធនាការក្រោមការដឹកនាំដ៏ខ្ពង់ខ្ពស់របស់សម្ដេច មហាបវរ ធីបតី ហ៊ុន ម៉ាណែត ដើម្បីជម្រុញដល់វិស័យទេសចរណ៍ គឺ ទស្សនាសៀមរាបឆ្នាំ ២០២៤។
សិល្បករ អ្នកផលិតមាតិការលើបណ្តាញសង្គមល្បីឈ្មោះ នឹងចូលរួមព្រឹត្តិការណ៍នេះទៅតាមជំនាញរបស់ពួកគាត់ ដែលកម្មវិធីនឹងប្រកាសដំណើរការជាផ្លូវការជាមួយនឹងការផ្សព្វផ្សាយចាប់ពីថ្ងៃទី ២៦ ខែមករាឆ្នាំ ២០២៤ នេះតទៅ ដែលគេជឿជាក់ថា ពួកគាត់នឹងក្លាយជាចលករដ៏សំខាន់ក្នុងជួយជំរុញលើកកម្ពស់នៃកំណើនភ្ញៀវទេសចរណ៍ពីបណ្តាប្រទេសនានានៅជុំវិញពិភពលោកបានឃើញពីភាពស្រស់ស្អាត ភាពទាក់ទាញនៃតំបន់ទេចរណ៍របស់កម្ពុជា ពិសេសតំបន់នានានៃខេត្តសៀមរាបតែម្តងក៏ជាការចូលរួមជំរុញយុទ្ធនាការរបស់ក្រសួងឱ្យកាន់តែមានប្រសិទ្ធភាពខ្លាំងឡើង ខណៈវិស័យទេចរណ៍បានដើរតួនាទីយ៉ាងសំខាន់ក្នុងការជំរុញឱ្យមានកំណើនសេដ្ឋកិច្ចនៅកម្ពុជានោះ។
យ៉ាងណាមិញ អ្នកជំនាញផលិតមាតិការល្បីឈ្មោះទាំងអស់ដែលបានស្ម័គ្រចិត្តចូលរួមយុទ្ធនាការនេះនឹងក្លាយជាអ្នកនាំយកនូវរូបភាពស្រស់ស្អាតទាក់ទាញ ភាពរួសរាយរាក់ទាក់ស្នាមញញឹមនៃជនជាតិខ្មែរ និងភាពវិជ្ជមានជាច្រើនដែលបង្ហាញថាភ្ញៀវទេចរណ៍នឹងទទួលបានអារម្មណ៍កក់ក្តៅចំពោះការមកដំណើរកម្សាន្តនៅកម្ពុជានិងអាចបន្តធ្វើដំណើរកម្សាន្តម្តងទៀតមកកម្ពុជាផងដែរ ។
សូមជម្រាប ប្រធានបទសំខាន់ដែលពួកគាត់នឹងធ្វើមានដូចជាការបង្ហាញទីកន្លែងស្រស់ស្អាតនៅខេត្តសៀមរាបដែលភ្ញៀវទេចរណ៍មិនសូវបានស្គាល់ ដំណើរកម្សាន្តពេលរាត្រីនៅខេត្តសៀមរាប ដំណើរផ្សងព្រេងនៅខេត្តសៀមរាប បង្ហាញពីតំបន់ទេចរណ៍កំពង់ភ្លុកដែលក្រុមផលិតភាពយន្តហូលីវូដមកថតភាពយន្ត តំបន់ឧទ្យានជាតិភ្នំគូលេនឋានទេវត្តា សារៈមន្ទីរ សណ្ឋាគារដែលភ្ញៀវគួរចូលស្នាក់នៅ ការទទួលទានអាហារ មធ្យោបាយធ្វើសំណើរ សេវាកម្ម និងតំបន់ទេចរណ៍ជាច្រើនទៀតដែលភ្ញៀវទេសចរណ៍គួរទទួលនិងទៅទស្សនាកម្សាន្ត៕