សិល្បៈជាតិ៖ សិល្បៈនៃការឡកម៉ុងសាយ ត្រូវបានគេចាត់ទុកថា ជាក្រុមរបាំប្រពៃណីចិនមួយដែលរួមសម្ដែងដោយសិល្បករពាក់ក្រណាត់ឆ្នៃម៉ូដជារូបសត្វតោ ហក់ លោត ចុះឡើងនៅលើបង្គោលដែក ធ្វើត្រាប់តាមកាយវិការសត្វតោពិតៗបូកបញ្ចូលក្បាច់គុនពិសេសៗជាច្រើនទៀតអមដោយអ្នកវាយស្គរលាន់ទ្រហឹងអឺងកងឱ្យស៊ីទៅនឹងចង្វាក់នៃការលោតផ្លោះរបស់តោ។
បើតាមបងប្អូនជាប់សែស្រឡាយចិនមានជំនឿថា សិល្បៈនៃការឡកម៉ុងសាយគឺជាតំណាងសត្វតោដែលមានឫទ្ធិខ្លាំងក្លា អាចបណ្ដេញ ឬកម្ចាត់ ភាវៈអាក្រក់ ចង្រៃឧបទ្រពទាំងពួងដើម្បីនាំមកនូវសិរីសួស្ដី នាំលាភនាំជ័យក្នុងឆ្នាំថ្មី។ ហើយចំពោះការរាំឡកម៉ុងសាយមួយគេត្រូវការឱ្យមានអ្នករាំចំនួនពីរនាក់ ដោយម្នាក់នៅក្បាលតោ និងម្នាក់ទៀតនៅកន្ទុយតោ ហើយអ្នករាំម៉ុងសាយគេមិនងាយនឹងឃើញមុខទេ ព្រោះគ្របជិតដោយសម្លៀកបំពាក់តោ។
ប្រពៃណីទំនៀមទម្លាប់មួយនេះ ត្រូវបានជនជាតិចិនប្រណិប័តន៍ធ្វើតៗគ្នា ពីមួយជំនាន់ទៅមួយជំនាន់ដោយពួកគេជឿថា ការឡកម៉ុងសាយជាការនាំហុងស៊ុយលើករាសីបណ្ដេញឧបទ្រពចង្រៃក្នុងឆ្នាំចាស់ចេញឱ្យអស់ ហើយនាំមកនូវសំណាងល្អក្នុងឆ្នាំថ្មីហេងៗរកស៊ីមានបាន។
សូមជម្រាបថា លោក សូវ ប៊ុនទ្រី ប្រធានសមាគមកត្តញូ ក៏បានប្រាប់ពីប្រវត្តិខ្លះនៃទំនៀមទម្លាប់ចិន និងជំនឿនៃសិល្បៈឡកម៉ុងដែលមានអាយុកាលរាប់រយឆ្នាំមកហើយនៅលើទឹកដីកម្ពុជាហើយលោក ចំរើន តារា សមាជិកក្រុមសមាគមកត្តញូ នឹងប្រាប់ពីបទពិសោធន៍នៃការហាត់សិល្បៈឡកម៉ុងសាយ ក៏ដូចជាការចាប់ជំនាញមួយនេះជាអាជីពផ្ទាល់ខ្លួនឱ្យមហាជនបានជ្រាបដឹងយ៉ាងពឹស្ដាក្នុងវីដេអូខាងក្រោមនេះ៖
