សិល្បៈជាតិ៖ រូបភាពវីដេអូ AI ដែលបង្ហាញពីផ្ទាំងទស្សនីយភាពដ៏រស់រវើកនាសម័យមហានគរដ៏អស្ចារ្យ ត្រូវបានបង្ហោះនៅលើបណ្ដាញសង្គមដោយម្ចាស់គណនីមានឈ្មោះថា Ousa Kun កំពុងទទួលបាននូវការចាប់អារម្មណ៍ និងមានការរំលែកបន្តយ៉ាងច្រើនសន្ធឹកសន្ធាប់ ជាពិសេសមានការទាមទារចង់ឱ្យផ្ទាំងទស្សនីយភាពនេះលេចចេញជាខ្សែភាពយន្តឆាប់។
លោក Style Cheth ដែលជាក្រុមការងារនៃភាពយន្តអាពាហ៍ពិពាហ៍ឆ្នាំ៩៣ បានចែករមលែកបន្តពីការបង្ហោះរបស់មួយរបស់លោក Ousa Kun ភ្ជាប់ជាមួយនឹងការសរសេររៀបរាប់ថា៖ «រឿងនេះអាចនឹងមិនកើតឡើងឆាប់ៗនេះនោះទេ តែខ្ញុំពិតជាស្ទើតែទ្រាំរងចាំមិនបាន នៅពេលណាដែលយើងចាប់ផ្ដើមថត» ខ្លឹមសារដែលលោក Ousa Kun បានសរសេរជាភាសាអង់គ្លេសនៅលើបណ្ដាញសង្គមនោះ ត្រយងសូមប្រែសម្រួលជាខេមរៈភាសាថា៖ «ដើម្បីជំរុញខ្លួនឯងឱ្យបញ្ចប់សេណារីយ៉ូភាពយន្តដែលមាន៣វគ្គនេះ ខ្ញុំបានដាក់បញ្ចូលគ្នានូវឃ្លីបវីដេអូផ្សេងៗ ដើម្បីជាការជំរុញទឹកចិត្ត។ វីដេអូនេះមិនមែនជា Trailer នោះទេ តែបើមើលដោយខ្សែភ្នែក វាស្រដៀងនឹងអ្វីដែលខ្ញុំស្រមើស្រមៃទុកថាភាពយន្តដែលបង្កើតឡើងនឹងមានលក្ខណៈបែបនេះ។ តែភាពយន្តមែនទែននឹងមើលទៅកាន់តែល្អជាងនេះ។ សាច់រឿងលម្អិត តួអង្គ សាច់រឿង គឺស្ថិតនៅជាអាថ៌កំបាំងនៅឡើយ។ សូមរងចាំតាមដានទាំងអស់គ្នា»
ត្បិតជារូបភាពដែលបង្កើតដោយបច្ចេកវិទ្យា AI ប៉ុន្តែសាធារណជនដែលបានឃើញវីដេអូនេះបានកោតសរសើរចំពោះ Concept របស់អ្នកនិពន្ធ ហើយពិតជាអន្ទះសារចង់ឱ្យស្នាដៃដែលឆ្លុះបញ្ចាំងពីសម័យកាលដ៏រុងរឿងមួយនៃអាណាចក្រខ្មែរ នាសម័យមហានគរលេចចេញជារូបរាងឆាប់។
គេរំពឹងថាប្រសិនបើកម្ពុជាមានភាពយន្តដែលមានគុណភាពកម្រិតស្ដង់ដារអន្តរជាតិបែបនេះ នឹងធ្វើឱ្យវិស័យភាពយន្តនៅប្រទេសកម្ពុជាកាន់តែមានភាពរីករាយចំរើន ហើយក៏ជាបើកទ្វារសម្រាប់ផលិតករក្នុងស្រុកដែលបានពួតដៃគ្នាយ៉ាងសស្រាក់សស្រាំ ផលិតស្នាដៃល្អៗ ដើម្បីបញ្ជ្រាបខ្លួនចូលទៅកាន់ទីផ្សារបរទេស ខណៈដែលបច្ចុប្បន្នភាពយន្តកម្ពុជាជាច្រើនរឿងបានជ្រៀតចូលទីផ្សារក្នុងតំបន់ ដោយបានយកទៅចាក់បញ្ចាំងនៅតាមរោងភាពយន្តនានា ក្នុងប្រទេសតំបន់អាស៊ាន៕
