សិល្បៈជាតិ៖ គេអាចនិយាយបានថា នេះជាប្រវត្តិសាស្ត្រលើកដំបូងនិងមុនគេសម្រាប់ដើមឆ្នាំ ២០២៤ ដែលព្រឹត្តិការណ៍ប្រគំតន្ត្រីកំពូលតារាចម្រៀង K-POP Legendary ដ៏ល្បីប្រចាំប្រទេសកូរ៉េខាងត្បូងគឺលោក Rain និងកញ្ញា HyunA បានប្រមូលផ្ដុំដោយអ្នកគាំទ្រជាង ២០ ម៉ឺនមកទស្សនាផ្ទាល់នៅមុខសាលមហោស្រពកោះពេជ្រ។
ព្រឹតិ្តការណ៍ប្រគំតន្ត្រីដ៏ធំបំផុតលំដាប់ពិភពលោកមានឈ្មោះថា «GANZBERG Super Idol Concert» បានបង្ហាញនូវទស្សនីយភាពដ៏អស្ចារ្យនៃការសម្ដែងផ្ទាល់របស់កំពូលតារាចម្រៀង K-POP Legendary ទាំងពីរដួង ក៏ដូចជាកំពូលតារាចម្រៀងល្បីៗប្រចាំប្រទេសខ្មែរ ដែល ធ្វើឱ្យបរិយាកាសកាន់តែសប្បាយរីករាយ ទិដ្ឋភាពដ៏រំភើប សំឡេងហ៊ោកញ្ជ្រៀវកងរំពង មិនដាច់សូរពីអ្នកគាំទ្រមកពីគ្រប់ទិសទី ជាមួយការសម្ដែងដ៏កក្រើកក្នុងរាត្រីដែលមិនអាច បំភ្លេចបាន។
នេះគឺជាលើកទី 2 ហើយសម្រាប់ Rain ដែលបានមកសម្ដែងនៅ ប្រទេសខ្មែរជាថ្មីម្ដងទៀត។ កំពូលតារាចម្រៀង K-POP Jung Ji-hoon ដែលអ្នកគាំទ្រ ទូទាំងពិភពលោកស្គាល់ច្បាស់ថាឈ្មោះ Rain មិនត្រឹមតែជាកំពូលតារាចម្រៀងដ៏ល្បី ប្រចាំប្រទេសកូរ៉េខាងត្បូងប៉ុណ្ណោះទេ ប៉ុន្ដែលោកក៏ជាអ្នកនិពន្ធបទចម្រៀងដ៏ឆ្នើម អ្នករាំ និងជាតារាសម្ដែងដ៏ល្បីឈ្មោះផងដែរ។ ក្នុងឆ្នាំ 2004 Rain ទទួលបានកេរ្តិ៍ឈ្មោះល្បីល្បាញ បំផុតក្នុងរឿង “បំណុលផ្ទះជំពាក់ស្នេហ៍” ឬ “Full House” រឿងនេះគឺមានការគាំទ្រយ៉ាងខ្លាំង ជាពិសេសនៅក្នុងប្រទេសយើង ដែលអ្នកណាៗក៏ស្គាល់ Rain ច្បាស់តាមរយៈឈ្មោះ លីយ៉ុងជេ។ លើសពីនេះ Rain ក៏ទទួលបានការសរសើរជាច្រើននៅទូទាំងសកលលោក និងឈ្នះពាន់រង្វាន់ពិភពលោកជាច្រើនទៀតផង។
រីឯកញ្ញា HyunA ដែលមានឈ្មោះពេញថា Kim Hyun-ah គឺជាកំពូលតារាចម្រៀងដ៏ល្បីឈ្មោះម្នាក់ ហើយក៏ជាអ្នកនិពន្ធបទចម្រៀង អ្នករ៉េបដ៏ពូកែ (Rapper) និងជាតារាម៉ូដែលដ៏ ស្រស់ស្អាតប្រចាំប្រទេសកូរ៉េខាងត្បូង។ កញ្ញា HyunA បានបង្ហាញខ្លួនជាលើកដំបូងនៅ ក្នុងក្រុម Wonder Girl ប៉ុន្តែមិនយូរប៉ុន្មាន កញ្ញា HyunA ក៏បានចូលរួមក្នុងក្រុម 4Minutes ក្រោមផលិតកម្ម Cube Entertainment។ ក្នុងឆ្នាំ 2010 កញ្ញា HyunA ក៏បានចាប់ផ្ដើមច្រៀង ចម្រៀងទោល ដែលបទដំបូងរបស់នាង គឺមានចំណងជើងថា “Change” បទនេះគឺទទួល បានការគាំទ្រជាច្រើន និងជាប់លំដាប់ថ្នាក់លេខ 2ប្រចាំប្រទេសកូរ៉េខាងត្បូង។
សូមជម្រាបថា មហាព្រឹត្តិការណ៍ប្រគំតន្ត្រីលំដាប់ពិភពលោក GANZBERG Supper Idol Concert ក្រៅពីការបង្ហាញការសម្ដែងច្រៀងពីកំពូលតារាចម្រៀង K-POP ដ៏ល្បីប្រចាំប្រទេសកូរ៉េខាងត្បូង លោក Rain និង កញ្ញា HyunA ហើយនោះ ព្រឹត្តិការណ៍នេះក៏មាការចូលរួមពីកំពូលតារាចម្រៀងលំដាប់ប្រទេសរួមមាន លោក ឧកញ៉ា ខេមរៈ សិរីមន្ត អ្នកនាង ពេជ្រ សោភា លោក ឆន សុវណ្ណរាជ កញ្ញា យូរី (YURI) King Chi Mc Sey 1NE និង Redking ជាមួយ SOPHEAP មកញ៉ាំងបរិយាកាសឱ្យកាន់តែសប្បាយរីករាយបន្ថែមទៀត៕
