កីឡករ គួន មុំ សមាជិតរបស់សមាគមបាល់ទះវិសាខា បានបង្ហើបប្រាប់ថា ក្រោយចប់ការប្រកួតពានរង្វាន់កីឡាបាល់ទះ តេជោលីគ រដូវកាលឆ្នាំ២០២៣/២០២៤ រូបគេនឹងត្រូវចេញទៅប្រកបអាជីពនៅក្រៅប្រទេសជាថ្មីម្ដងទៀត។
ថ្លែងប្រាប់ អ្នកសារព័ត៌មានក្នុងការប្រកួតពានរង្វាន់កីឡាបាល់ទះ តេជោលីគ កីឡាករមានតួនាទីវាយប្រយុទ្ធ កំពុងមានភាពលេចធ្លោរូបនេះបានបញ្ជាក់ថា ចប់តេជោលីគ រូបគេពុំមានពេលច្រើនឡើងដោយត្រូវចេញទៅប្រកបអាជីពនៅក្រៅប្រទេស តែប្រទេសណា រូបគេសុំលាក់សិន ខណ:ការចុះកិច្ចសន្យាបានធ្វើរួចរាល់ហើយ។
ងាកមកការប្រកួតបាល់ទះ តេជោលីគវិញ កីឡករ គួន មុំ បានរួមចំណេកជួបក្រុមវិសាខា ឡើងទៅកាន់ការប្រកួតជុំទី២ ដោយរក្សាកំណត់ត្រា ៧ប្រកួត ឈ្នះគ្រប់ការប្រកួត ដោយមិនចាញ់សូម្បី១សិតក្រោយបន្តឈ្នះ ក្លិប ន.ប ខេត្តពោធិ៍សាត់ នៅជុំទី២ កាលពីរសៀល ថ្ងៃអាទិត្យ ទី២៨ ខែមករាកន្លងទៅ។
កីឡាករ មានវ័យ២៦ឆ្នាំ ដែលមានបទពិសោធន៍ខ្លាំងរបស់កម្ពុជា ដោយរូបគេធ្លាប់បានចេញទៅប្រកបអាជីពនៅប្រទេសឥណ្ឌូណេស៊ី នៅឆ្នាំ២០២០ កន្លងទៅជាមួយក្រុម Garuda Jakarta ក្នុងរដ្ឋធានីហ្សាកាតា។
ត្រឡប់មកពីឥណ្ឌូណេស៊ី វិញ គួន ម៉ុម បានបន្តចូលរួមជាមួយក្រុមវិសាខា វិញ រហូតដល់ចុងឆ្នាំ២០២៣ រូបគេបានផ្ទេរទៅចូលរួមជាមួយក្លិបបាល់ទះ Long An នៅប្រទេសវៀតណាម ជើងទី២ (ក្នុងលក្ខខណ្ឌខ្ចីជើង) កាលពីថ្ងៃអាទិត្យ ទី១៥ ខែតុលា ឆ្នាំ២០២៣។
គួន ម៉ុម ពីឆ្នាំ២០១៩ ដល់បច្ចុប្បន្ន ស្របពេលដែលគេក៏ជាតួរអង្គដ៏សំខាន់ជួយឱ្យបាល់ទះបុរសក្នុងសាលរបស់កម្ពុជា ឈ្នះមេដាយសំរឹទ្ធិ ព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាម និងមេដាយប្រាក់ស៊ីហ្គេម លើកទី៣២ ក្នុងរាជធានីភ្នំពេញ កាលពីពេលថ្មីៗ។
កីឡាករ ដែលមានស្រុកកំណើតនៅខេត្តតាកែវ មានកម្ពស់១ម៉ែត្រ ៩៨សង់ទីម៉ែត សមាជិករបស់សមាគមបាល់ទះវិសាខា និងក្រុមជម្រើសជាតិកម្ពុជា គឺជាកីឡាករខ្មែរទី២ បន្ទាប់ពី វឿន វាសនា ដែលបច្ចុប្បន្នកំពុងចូលរួមជាមួយក្លិបបាល់ទះ Win Streak នៅលីគបាល់ទះតៃវ៉ាន់ Enterprise Volleyball League ៕
