សិល្បៈអន្តរជាតិ៖ ក្រោយរឿងភាគកូរ៉េដ៏ល្បីល្បាញ «Jewel in The Palace» ឬ «ជីវិតនាងចាំងគីម»បានចាក់បញ្ចាំងហើយទទួលបានជោគជ័យកាលពី២០ឆ្នាំមុន ថ្មីៗនេះតារាសម្ដែងមុខក្មេងមិនចេះចាស់ លី យ៉ុងអេ នឹងត្រលប់មកសម្ដែងជាតួអង្គ ដេ ចាំងគីម ម្ដងទៀត។
កាលពីថ្ងៃទី៣០ ខែមករា សារព័ត៌មានកូរ៉េបានចុះផ្សាយយ៉ាងគគ្រឹកគ្រេងថា ភាពយន្តល្បីល្បាញជាប្រវត្តិសាស្ត្ររឿង ជីវិតនាងចាំងគីម បានបញ្ចប់សេណារីយ៉ូជាស្ថាពរហើយក្រុមផលិតក៏បានចុះកុងត្រាជាមួយនឹងអ្នកនិពន្ធរួចរាល់ដើម្បីថតរឿងភាគថ្មីនេះដែរ ដោយតារាសម្ដែងនឹងមកដើរតួអង្គជា ដេ ចាំងគីម នោះគឺតារាសម្ដែងស្រី លី យ៉ុងអេ។
រឿងភាគបុរាណជាប្រវត្តិសាស្ត្រថ្មីនេះនឹងលាតត្រដាងពីជីវិតនាង ចាំងគីម ដែលបានក្លាយខ្លួនជាវេជ្ជបណ្ឌិត គឺជាសាច់រឿងដែលលំហូរទៅតាមរឿងចាស់ចាក់បញ្ចាំងនៅទូរទស្សន៍ MBC កាលពីឆ្នាំ២០០។ រឿងនេះក៏អាចចាត់ទុកបានថាជាខួប២០ឆ្នាំ នៃភាពយន្តចាស់ផងដែរដូច្នេះការផលិតភាពយន្តនេះនៅក្នុងឆ្នាំថ្មីនេះគឺកាន់តែមានអត្ថន័យជ្រាលជ្រៅថែមទៀត។ តាមការទម្លាយពីក្រុមផលិតភាពយន្តនេះ មានគោលដៅចាក់បញ្ចាំងនៅដើមឆ្នាំក្រោយ។
តារាសម្ដែងស្រី លី យ៉ុងអេ ដែលធ្លាប់សម្ដែងជា ចាំងគីម នឹងត្រលប់មកសម្ដែងជាតួអង្គ ដេ ចាំងគីម គឺជាតារាសម្ដែងដែលទទួលបានជោគជ័យយ៉ាងខ្លាំងលើការសម្ដែងភាពយន្តភាគបុរាណដូចជា កំណត់ហេតុសាអ៊ីដាំ,អ្នកស៊ើបអង្កេតកូ, ថ្ងៃដ៏ស្រស់ស្អាតមួយនានិទាឃរដូវ ជាដើម៕