អ្នកនាំពាក្យក្រសួងមហាផ្ទៃ បានចេញលិខិតបំភ្លឹ ពាក់ព័ន្ធនីតិវិធីនៃការបញ្ចប់មុខតំណែងមន្រ្តីនគរបាលជាតិ នៅនាយកដ្ឋានបុគ្គលិក ដែលត្រូវបានផ្សព្វផ្សាយតាមសារព័ត៌មាន និងបណ្តាញសង្គមនាពេលថ្មីៗនេះ ដែលការផ្សព្វផ្សាយនោះនាំឲ្យមតិសាធារណជនមានការភ័ន្ដច្រលំ។ លិខិតបំភ្លឺរបស់អ្នកនាំពាក្យក្រសួងមហាផ្ទៃ បានចុះកាលបរិច្ឆេទនៅថ្ងៃទី៥ កុម្ភៈ ២០២៣។
នៅក្នុងលិខិតបានសរសេរថា អគ្គនាយកដ្ឋានធនធានមនុស្ស ជាអង្គភាពទើបបង្កើតថ្មី មាននាយកដ្ឋានចំនួន៤ ចំណុះឱ្យអគ្គនាយកដ្ឋាននេះ ក្នុងនោះនាយកដ្ឋានបុគ្គលិក នៃអគ្គស្នងការដ្ឋាននគរបាលជាតិ បានផ្ទេរ មកចំណុះអគ្គនាយកដ្ឋានធនធានមនុស្ស ដោយប្តូរឈ្មោះទៅជានាយកដ្ឋានបុគ្គលិកមន្ត្រីនគរបាលជាតិវិញ។
ក្នុងន័យនេះ ដើម្បីរៀបចំមុខតំណែងស្របតាមរចនាសម្ព័ន្ធថ្មីនៃនាយកដ្ឋាននីមួយៗ នាយនគរបាលថ្នាក់ឧត្ដមសេនីយ៍ និងនាយនគរបាលជាន់ខ្ពស់ ដែលមានឈ្មោះក្នុងអនុក្រឹត្យខាងលើនេះ អតីតមានមុខតំណែងជា គ្រូនគរបាលជាតិមានឋានៈស្មើអគ្គនាយករងនិងប្រធាននាយកដ្ឋាន នាយកវិទ្យាស្ថាន អនុប្រធាននាយកដ្ឋាន បុគ្គលិកមានឋានៈនិងបុព្វសិទ្ធិស្មើប្រធាននាយកដ្ឋាន ត្រូវបានផ្ទេរសម្រួលភារកិច្ចនិងតែងតាំងមុខតំណែងថ្មី ឡើងវិញ ឱ្យទៅបម្រើការងារនៅនាយកដ្ឋាននីមួយៗ ចំណុះអគ្គនាយកដ្ឋានធនធានមនុស្ស នៃក្រសួងមហាផ្ទៃ។
បើតាមក្រសួងមហាផ្ទៃ, ជាគោលការណ៍និងនីតិវិធីនៃការរៀបចំមុខងារមន្ត្រីសាធារណៈ បើអង្គភាពសាមីស្នើសុំតែងតាំងមុខតំណែងថ្មី ដែលមានឋានៈទាបជាងមុខតំណែងចាស់ អង្គភាពជំនាញត្រូវតែរៀបចំនីតិវិធីបញ្ចប់ មុខតំណែងចាស់ជាមុនសិន ដែលមានឋានៈខ្ពស់ជាង ទើបតែងតាំងមុខតំណែងថ្មីដែលមានឋានៈទាបជាងជាក្រោយ។
បន្ទាប់ពីបានបញ្ចប់មុខតំណែងចាស់ នៅថ្ងៃទី២៥ ខែតុលា ឆ្នាំ២០២៣ មន្ត្រីនគរបាលជាតិដែលមាន ឈ្មោះក្នុងអនុក្រឹត្យខាងលើនេះ ត្រូវបានក្រសួងមហាផ្ទៃតែងតាំងមុខតំណែងថ្មី តាមរយៈប្រកាសចុះថ្ងៃទី២៦ ខែតុលា ឆ្នាំ២០២៣ ស្របតាមលក្ខណសម្បត្តិ សមត្ថភាពជំនាញ ការគោរពវិន័យ សីលធម៌ល្អ មានឆន្ទៈមោះមុត ខិតខំបំពេញភារកិច្ច និងមានការទទួលខុសត្រូវការងារខ្ពស់៕
