សិល្បៈជាតិ៖ ជាថ្មីម្ដងទៀត តារាក្បាច់គុនខ្មែរអាមេរិកកាំង លោក ឌី សៅ បានធ្វើឱ្យអ្នកដែលនិយមគាំទ្ររូបលោកកន្លងមករីករាយ ជាមួយនឹងដំណឹងដ៏ល្អថ្មីមួយទៀតពាក់ព័ន្ធនឹងវិស័យភាពយន្តខ្មែរ ដោយលោកបានប្រកាសនៅលើហ្វេសប៊ុកផ្ទាល់របស់លោកពីគម្រោងថតភាពខ្នាតធំនៅប្រទេសកម្ពុជានាដើមឆ្នាំ ២០២៥ ខាងមុខនេះ។
ជាការពិតណាស់ បើនិយាយដល់លោក ឌី សៅ ត្បិតសាមីខ្លួនតែងតែដាក់ខ្លួនហើយនិយាយថាក្បាច់គុនល្បុក្កតោលោកមិនសូវល្អដូចនៅស្រុកខ្មែរ តែលោកបានធ្វើឱ្យកូនខ្មែរជាច្រើនមានមោទនភាពជាតិ ព្រោះលោកមិនត្រឹមតែជាតួសម្ដែងក្បាច់គុនប៉ុណ្ណោះទេ តែលោកក៏ជាគ្រូបង្វឹកក្បាច់គុន Trainer ឱ្យតារាហូលីវូដល្បីៗជាច្រើន ដោយក្នុងនោះមានទាំងតារាសម្ដែងម្ចាស់ពានរង្វាន់អូស្កាឆ្នាំ២០២៣ ផងដែរ។
ជាការពិតដែលប្រជាជនខ្មែរគឺជាជនជាតិមួយមានសម្បត្តិវប្បធម៌និងអរិយធម៌ដ៏ល្អផូរផង់និងចំណាស់មួយនៅអាស៊ី ជាពិសេសក្បាច់គុនបុរាណខ្មែរដែលដូនតាបានបន្សល់ទុកជាកេរ្តិ៍មរតកក៏ត្រូវបានកូនចៅខ្មែរជំនាន់ក្រោយហ្វឹកហាត់យ៉ាងខ្ជាប់ខ្ជួន ។ រហូតមានពេលខ្លះកូនខ្មែរដែលជាម្ចាស់ក្បាច់គុនថែមទាំងយកក្បាច់គុនរបស់ខ្លួនទៅចែករំលែកនិងបង្ហាត់បង្ហាញ។ តួយ៉ាងដូចជា Dy Sao តារាក្បាច់គុនជាតិខ្មែរសញ្ជាតិអាមេរិកបានយកក្បាច់គុនទៅបង្ហាត់តារាហូលីវូដល្បីៗ ដោយក្នុងនោះមានទាំងលោកស្រី Michelle Yeoh តារាសម្ដែងម្ចាស់ពានរង្វាន់អូស្កាឆ្នាំ២០២៣នេះថែមទៀតផង។
ងាកមកការសម្ដែងភាពយន្តវិញ លោក ឌី សៅ បានអភិវឌ្ឍខ្លួនពី Stuntman និងគ្រូបង្វឹកក្បាច់គុន មកសម្ដែងជាតួអង្គឯកនៅក្នុងភាពយន្តបែបវាយតប់គ្នារឿង «Hanuman: Shadow Master» ដែលបានបញ្ចាំងកាលពីឆ្នាំ២០២៣ កន្លងទៅ។
បើតាមការឱ្យដឹងរបស់សាមីខ្លួន ការត្រលប់មកប្រទេសកម្ពុជាដើម្បីថតភាពយន្តនេះ គឺជាការវិលត្រលប់មកមាតុភូមិកំណើតរបស់ខ្លួនជាលើកដំបូងបង្អស់ បន្ទាប់ពីលោកបានចាកចេញទៅរស់នៅអាមេរិកតាំងពីកុមារភាព៖ «ទន្ទឹងរងចាំ និងរៀបចំភាពយន្តខ្នាតធំនៅក្នុងកម្ពុជា ដែលគ្រោងនឹងថតនៅខែមករា ឆ្នាំ២០២៥ (Jan 2025) វានឹងជាលើកដំបូងរបស់ខ្ញុំត្រលប់មកកម្ពុជាវិញបន្ទាប់ពីចាកចេញពីកុមារភាព។ ខ្ញុំបានរង់ចាំជាយូរមកហើយសម្រាប់រឿងនេះ។ អរគុណអ្នកទាំងអស់គ្នា និងសូមព្រះប្រទានពរ។
ការចែករំលែកដំណឹងរបស់លោក ឌី សៅ អាចចាត់ទុកជារឿងមួយដ៏រីករាយសម្រាប់អ្នកគាំទ្រដែលនិយមចូលចិត្តលោក ទទួលបានឱកាសជួបនិងឃើញតារាសំណព្វចិត្តរបស់ខ្លួនមកប្រូម៉ូតផ្សព្វផ្សាយពីប្រទេសកម្ពុជានៅក្នុងភាពយន្តថ្មីរបស់ខ្លួន ជាពិសេសគឺជាកិច្ចរួមចំណែកផ្សព្វផ្សាយវិស័យទេសចរណ៍ក្នុងស្រុក ទៅកាន់ក្រសែភ្នែកអ្នកទេសចរណ៍នៅទូទាំងសកលលោកតាមរយៈផ្ទាំងទស្សនីយភាពភាពយន្តផងដែរ៕
