សិល្បៈអន្តរជាតិ៖ កញ្ញា Karolina Shiino វ័យ២៦ឆ្នាំ បានបោះបង់មកុដជយលាភីបវរកញ្ញាជប៉ុនរបស់ខ្លួន ក្រោយកាសែតក្នុងស្រុកបានផ្សព្វផ្សាយរឿងកញ្ញាមានទំនាក់ទំនងជាមួយស្វាមីអ្នកដទៃ។
យោងតាម CNN និង The Associated Press ម្ចាស់តំណែងបវរកញ្ញាជប៉ុន សញ្ជាតិដើមអ៊ុយក្រែន បានប្រកាសបោះបង់ចោលតំណែងកាលពីថ្ងៃច័ន្ទ ទី៥ ខែកុម្ភៈ ក្រោយមានការផ្សព្វផ្សាយរឿងខ្លួនទាក់ទងស្នេហាជាមួយបុរសដែលរៀបការរួច។ កាលពីថ្ងៃទី២២ ខែមករា ឆ្នាំ២០២៤ កញ្ញា Karolina គឺជាស្ត្រីមកទ្វីបអឺរ៉ុបទីមួយដែលបានឈ្នះតំណែងបវរកញ្ញជប៉ុន Miss Nippon នេះបើតាម CNN និង BBC។
កញ្ញាបានថ្លែងប្រាប់សារសុំទោសនៅលើ Instagram ផ្ទាល់ខ្លួនថា ៖ ខ្ញុំពិតជាសោកស្ដាយដែលបានបង្កកំហុសដ៏ធំ ហើយក្បត់ទំនុកចិត្តអ្នកគាំទ្រខ្ញុំទាំងអស់។ នៅក្នុងពាក្យសុំទោសនោះដែរ អតីត Miss Nippon បានបញ្ជាក់ទៀត ថាខ្លួនភ័យខ្លាចផង ច្របូកច្របល់ផង ទើបពេលអ្នកកាសែតសួរនាំមិនបានសារភាពការពិត។
ដំបូងឡើយភាគីអ្នករៀបចំកម្មវិធីបានលើកឡើងថា បវរកញ្ញារបស់ខ្លួនមិនបានដឹងទេថាបុរសដែលខ្លួនទាក់ទងមានប្រពន្ធនិងកូន តែក្រោយមកពួកគេបានផ្លាស់ប្ដូរសេចក្ដីប្រកាសរបស់ខ្លួនវិញ។ តាមដឹងបុរសដែលទាក់ទងស្នេហាជាមួយនឹង Karolina គឺជាដុកទ័រផងនិងជា Influencer មួយរូបផងដែរ។
បុរសជាវេជ្ជបណ្ឌិតដែលពាក់ព័ន្ធក្នុងរឿងនេះគឺលោក Takuma Maeda ក៏បានសុំទោសចំពោះកំហុសឆ្គងខ្លួនដែលបង្កើតឱ្យមានរឿងអាស្រូវកើតឡើង។ នៅក្នុងខ្លឹមសារចុងក្រោយដែលលោកបានចែករំលែកលើ IG នាថ្ងៃពុធ លោកបាននិយាយថាលោកគ្មានគម្រោងលែងលះភរិយាលោកឡើយ ហើយលោកសន្យាថាលោកនឹងចាយពេលវេលាទាំងអស់ដែលនៅសល់ដើម្បីការងារនិងជីវភាពគ្រួសារ។
អតីតបវរកញ្ញាជប៉ុន ជនជាតិដើមអ៊ុយក្រែនរូបនេះបានទទួលសញ្ជាតិជប៉ុនកាលពីឆ្នាំ២០២២។ នាងបានផ្លាស់មករស់នៅប្រទេសជប៉ុនតាំងពីអាយុ៥ឆ្នាំជាមួយនឹងម្ដាយរបស់នាងដែលបានរៀបការស្វាមីថ្មីជនជាតិជប៉ុន។ ខណៈដែលកញ្ញាចូលរួមក្នុងការប្រកួតនោះក៏កើតមានបញ្ហាចម្រូងចម្រាសជាច្រើនផងដែរ ដោយសារតែរូបរាងរបស់កញ្ញាមានលក្ខណៈជានារីអឺរ៉ុប មិនមានលក្ខណៈជានារីជប៉ុននោះឡើយ។ Karolina ធ្លាប់បានលើកឡើងថាខ្លួនរីករាយដែលត្រូវបានទទួលស្គាល់ ហើយក៏រីករាយដែរ ដែលត្រូវបានគេស្គាល់ខ្លួនក្នុងនាមជានារីជប៉ុនម្នាក់។ ទោះជាមានគេប្រាប់ខ្ញុំថាខ្ញុំមិនមែនជាជនជាតិជប៉ុនក្ដី ប៉ុន្តែសម្រាប់ខ្ញុំ ខ្ញុំគឺជាជនជាតិជប៉ុនមួយរូប។
សូមជម្រាបជូនថា ការសម្រេចចិត្តបោះបង់មកុដរបស់ Karolina Shiino ត្រូវបានអ្នករៀបចំកម្មវិធីទទួលយក ប៉ុន្តែតំណែងនេះនឹងត្រូវតម្កល់ទុកឱ្យទំនេរចោលពេញមួយឆ្នាំ ដោយមិនរកអ្នកថ្មីមកជំនួសតំណែងនោះឡើយ៕
