សិល្បៈជាតិ៖ រាជិនីសប្បុរសធម៌ដែលមហាជនអ្នកលេងបណ្ដាញសង្គមគ្រប់គ្នាតែងតែហៅទៅកាន់ លោកជំទាវ សុខ រស្មី នោះក៏ព្រោះតែលោកជំទាវឧស្សាហ៍ចូលរួមសកម្មភាពសជួយសង្គមតាមរយៈការជួយដល់កុមារកំព្រា ជនពិការ ទុរគតជន ស្ត្រីមេម៉ាយ មនុស្សចាស់ជរា និងសកម្មភាពកកាបាទក្រហមកម្ពុជា ហើយជាពិសេសការជួយដល់សិល្បករចាស់ៗដែលកំពុងមានជីវភាពខ្វះខាត។
ថ្មីៗនេះ គ្រប់គ្នាក៏បានឃើញសកម្មភាពមនុស្សធម៌របស់លោកជំទាវខណៈនៅប្រទេសថៃ ដោយមិនអាចទ្រាំឃើញបងប្អូនខ្មែរនៅស្រុកថៃរងការលំបាក លោកជំទាវបានស្ម័គ្រចិត្តលូកដៃជួយសម្រាលជីវភាពនៅទីនោះតែម្ដង។
ដោយមើលពីឃើញការខ្វះខាត របស់បងប្អូនខ្មែរយើងនៅទីនោះ លោកជំទាវ សុខ រស្មី ក៏បានធ្វើការចែកអំណោយជូនដល់បងប្អូនខ្មែរនៅទីនោះប្រមាណជាង ១៥០០ នាក់ ហើយក៏មានបងប្អូនថៃជិត៤០០នាក់ មកទទួលនូវអំណោយផងដែរ។
លោកជំទាវ សុខ រស្មី បានឱ្យដឹងថា មូលហេតុដែលលោកជំទាវ ចូលរួមមកចែកអំណោយនៅម្តុំផ្សាប្រាទូណាម ទីក្រុងបាងកក ក៏ព្រោះតែលោកជំទាវមើលឃើញបងប្អូនប្រជាពលរដ្ឋជាកូនខ្មែរមានឈាមជ័រដូចគ្នារស់នៅទីនោះច្រើន ហើយលោកជំទាវក៏បានចែកជូនដូចជា អាហារ មី ទឹកដោះគោ គ្រឿងឧបភោគបរិភោគប្រចាំ និងជាពិសេសអាហារបំប៉នសុីប៊ែលប៉ារីសដែលទើបតែបើកសាខាថ្មីផ្តាច់នៅមុខនៅប្រទេសថៃ។
ចុងក្រោយនេះ លោកជំទាវបានអះអាងថា ការចែករំលែកកុសលបុណ្យទៅកាន់អ្នកខ្វះខាតនេះ គឺមិនមែនជាលើកទីមួយរបស់លោកជំទាវទេ ច្រើនលើកច្រើនសារមកហើយលោកជំទាវបានចូលរួម ហើយថ្ងៃខាងមុខទៀតលោកជំទាវនឹងធ្វើដំណើរទៅខេត្តនានានៃប្រទេសសថៃ ដើម្បីចែកអំណោយដល់បងប្អូនខ្មែរមកធ្វើការចំណាកស្រុកយើងកំពុងខ្វះខាតជីវភាព និងត្រូវការជំនួយ៕