សិល្បៈជាតិ៖ រឿងរ៉ាវជីវិតពិតរបស់តារាសម្ដែងស្រី សឿ សុធារ៉ា មួយរយៈធំហើយ ដែលតារារូបនេះជួបតែរឿងទុក្ខសោក និងអកុសល បែកបាក់គ្រួសារ និងព្រាត់ប្រាស់អ្នកមានគុណ។យ៉ាងណាមិញជីវិត ដែលធ្លាប់តែអួរអាប់ ហាក់ដូចជាមានពន្លឺឡើងវិញបន្តិច ក្រោយពេលដែលតារាស្រីរូបនេះបាននាំកូនៗ ចូលទៅរស់នៅក្នុងទ្រនំថ្មីដែលជាអំណោយផ្ដល់ដោយ ឯកឧត្តម ខៀវ កាញារីទ្ធ។ នេះបើយោងតាមវីដេអូមួយផ្សាយលើទំព័រហ្វេសប៊ុករបស់តារាសម្ដែងសាវីន ហ្វីលីព។
កាលពីពេលថ្មីៗនេះ តារាសម្ដែងសាវីន ហ្វីលីព បានបង្ហោះវីដេអូបង្ហាញពីសកម្មភាពលោក និងក្រុមការងារបានទៅសួរសុខទុក្ខអ្នកនាង សឿ សុធារ៉ា និងក្រុមគ្រួសារនៅផ្ទះថ្មី ដែលស្ថិតនៅក្នុងបុរី ម៉ន ដានី គម្រោងទី១៤ ដែលផ្ទះនោះដែរ គឺជាអំណោយពីឯកឧត្តម ខៀវ កាញារីទ្ធ ដែលមានតម្លៃប្រមាណជាង ២ម៉ឺនដុល្លារ។
នៅក្នុងវីដេអូនោះដែរ ក្មួយស្រី សាពូន ដារ៉ាពិមាន បានបង្ហាញពីក្ដីរំភើបរីករាយនិងថ្លែងអំណរគុណយ៉ាងជ្រាលជ្រៅ ចំពោះលោកតា ខៀវ កាញារីទ្ធ ដែលជួយឱ្យក្មួយ ម្ដាយ និងប្អូនបានផ្ទះមួយរស់នៅសមរម្យនឹងគេ។
ជាកត់សម្គាល់ កូនស្រី ច្បង របស់អតីតគូស្នេហ៍ល្បីគឺលោក សាពូន មីដាដា និងអ្នកនាង សឿ សុធារ៉ា គឺជាក្មេងស្រីកតញ្ញូដឹងគុណឪពុកម្ដាយ ហើយក៏ជាក្មេងដែលមានដុងសិល្បៈពេញខ្លួនផងដែរ ព្រោះមានឈាមជ័រទាំងខាងឪពុកនិងម្ដាយជាអ្នកសិល្បៈសម្ដែង និងចម្រៀង ដោយក្មួយស្រី ពិមាន បានចូលរួមសម្ដែងនៅក្នុងភាពយន្ត ខារ៉ាអូខេ ជាច្រើនរួចមកហើយ៕