កីឡាការិនី ស្រួង ភាវី របស់កម្ពុជា បាន ឈ្នះពានរង្វាន់ទី៧ របស់ LPBA ដែលរៀបចំឡើងដោយសហព័ន្ធកីឡាស្នូកឃ័រអាជីព (Professional Billiards Association) នៅប្រទេសកូរ៉េខាងត្បូង នៅរសៀលថ្ងៃទី១១ ខែកុម្ភៈ ឆ្នាំ២០២៤។
គូប្រកួតវគ្គផ្ដាច់ព្រ័ត្ររបស់ម្ចាស់មេដាយមាស ស៊ីហ្គេម ស្រួង ភាវី គឺកីឡាការិនីរបស់កូរ៉េខាងត្បូង Jung-suk LIM ក្រោយយកឈ្នះលើម្ចាស់ផ្ទះកូរ៉េខាងត្បូង មួយរូបទៀតគឺកីឡាការិនី Kyung-ja Kim នៅវគ្គពាក់កណ្តាលផ្ដាច់ព្រ័ត្រ កាលពីថ្ងៃទី១០ ខែកុម្ភៈ កន្លងទៅ។
ក្រោយដណ្តើមបានជើងឯកកីឡាការិនី ស្រួង ភាវី បានបង្ហោះសារលើគណនីហ្វេសប៊ុករបស់ខ្លួនថា៖«ពានទី៧របស់LPBAដែលខ្ញុំបានលើកក្នុងថ្ងៃនេះ ! ខ្ញុំជឿជាក់ថាពុកម៉ែបងប្អូនសុទ្ធតែធ្លាប់ឆ្លងកាត់នូវស្ថានភាពនេះគ្រប់ៗគ្នា គឺថារាល់កិច្ចការទាំងអស់ដែលយើងសម្រេចបានដោយការតស៊ូពុះពារដ៏ស្វិតស្វាញ នោះប្រាកដជាហត់នឿយតាំងពីចាប់ផ្ដើមរហូតដល់ពេលសម្រេចបាននូវលទ្ធផល នោះរូបរាងកាយរបស់យើងនឹងទ្រុឌទ្រោមជាទំងន់ ។ ប៉ុន្តែដោយហេតុយើងសប្បាយរីករាយនូវលទ្ធផលដែលយើងសម្រេចបានដោយសេចក្ដីព្យាយាមដ៏មោះមុតនេះ ធ្វើឱ្យភ្លេចអស់នូវការហត់នឿយទាំងប៉ុន្មានដែលបានឆ្លងផុតវាដោយលំបាកលំបិននោះ»។
នារីដែលចេះនិយាយភាសាកូរ៉េ បានយ៉ាងច្បាស់រូបនេះបន្ថែមថា៖«សម្រាប់រូបខ្ញុំផ្ទាល់ដើម្បីបានលើកកិត្យានុភាព មោទកភាព និងភាពក្លាហាន ខ្លាំងក្លារបស់ជនជាតិខ្មែរ ខ្ញុំសូមស៊ូខ្សោះអស់ពីក្នុងខ្លួន បូជាទាំងកម្លាំង កាយ ចិត្ត ធ្វើយ៉ាងណាពុះពារតស៊ូរហូតបានទទួលនូវអ្វីដែលពុកម៉ែបងប្អូនចង់ឃើញ ចង់បាន ពីកូនស្រីកម្ពុជាម្នាក់នេះ។ ព្រោះតែជំពាក់គុណបុព្វបុរសខ្មែរគ្រប់ជំនាន់ទើបរូបខ្ញុំខំប្រឹង ដើម្បីតបស្នងនូវគុណូបការៈ មហាបុព្វបុរសខ្មែរគ្រប់ជំនាន់»។
ក្នុងនាមជាម្ចាស់ជើងឯក ស្រួង ភាវី ទទួលបានពានរង្វាន់ចំនួន១ អមដោយប្រាក់រង្វាន់លើកទឹកចិត្តចំនួន៣០លានវ៉ុន (ជាង៩១លានរៀល)៕
ខាងក្រោមជាវីដេអូប្រកួតវគ្គផ្ដាច់ព្រ័ត្រ របស់កីឡាការិនី ស្រួង ភាវី ទាំងស្រុង៖
