សិល្បៈជាតិ៖ បន្ទាប់ពីកញ្ញា អាណារ៉ូស ចេញមកបង្ហោះសារបង្កភាពភ្ញាក់ផ្អើលលើបណ្ដាញសង្គម ដោយរៀបរាប់ពីរឿងណាត់ជួបខ្លួនដែលជាតារាល្បីទៅបាយថ្ងៃមួយពេលក្នុងតម្លៃខ្លួន ៣០០០ ដុល្លារនោះ ត្រូវបានអ្នកលេងបណ្ដាញសង្គម និងអ្នកសិល្បៈជាច្រើនផ្សេងទៀតចាត់ទុកថា ជារឿងបន្ទាបតម្លៃកិត្តិយសតារាសិល្បៈពិតប្រាកដ។
យ៉ាងណាមិញនាពេលថ្មីៗនេះ កញ្ញា អាណារ៉ូស បានបង្ហោះសារនៅលើបណ្ដាញសង្គមហ្វេសប៊ុកយ៉ាងដូច្នោះ៖ «ថ្លៃស៊ីបាយថ្ងៃ3000$ចាស តារាល្បីស៊ីថ្លៃតិចហើយ តែគ្រាន់តែស៊ីបាយធម្មតាទេចង់ជួបតារាល្បី បើគ្រាន់តែថ្លៃស៊ីបាយថ្ងៃ 3000$ មិនចំណាយ ថយអោយឆ្ងាយ មិនមែនមុខលុយទេ តែខ្ញុំជាតារា គួរយល់» ដោយសំណេរបស់នាងបានភ្ជាប់ជាមួយរូបភាពមួយសន្លឹកស្ដែងឱ្យឃើញថា នាងបានឆាតឆ្លើយឆ្លងគ្នាជាមួយអ្នកព្យាយាមចចារណាត់ជួបឱ្យទៅបាយថ្ងៃជាមួយថៅកែចិន។
ក្រោយការបង្ហោះនោះ គេឃើញមានអ្នកសិល្បៈជាច្រើននាក់បានប្រតិកម្មចំពោះពាក្យសម្ដីរបស់កញ្ញា អាណារ៉ូស ដោយនៅក្នុងនោះ លោកជំទាវ ចន ច័ន្ទលក្ខិណា ប្រធានសមាគមសិល្បករខ្មែរក៏បានប្រតិកម្មដែរថា ៖ «អ្នកសិល្បៈពិតប្រាកដគេមិនធ្វើការងារបែបនេះទេ»។
រីឯលោក កៅ សីហា អ្នកដឹកនាំសម្ដែងល្បីមួយរូបបានបញ្ចេញមតិប្រតិកម្មថា ៖ «កុំយកងារជាតារា ឬអ្នកសិល្បៈ មកសរសេរបែបនេះអូន។ មុនធ្វើអីមួយ គួរគិតឱ្យបានវែងឆ្ងាយ មិនមែនចេះតែលេងសើច យកlike យកល្បីតាមរយៈ ទង្វើចឹងៗទេ។ បំណងល្អពីបង»។
ហើយតារាចម្រៀងស្រី ស៊ុន ស្រីពេជ្រ ក៏បានលូកមាត់រឿងនេះដែរថា ៖ «និយាយមកសុទ្ធតែខ្លួនឯងអ្នកសិល្បៈ អ្នកសិល្បៈពិតប្រាកដគេថ្លៃថ្នូរមានកិត្តិយសណាស់ មិនដូចនាងទេ ការងារមិនដឹងអ្វីអោយប្រាកដ បងស្រីគួរមានវិធានការចំពោះម្នាក់នឹងឆាប់កាន់តែល្អ ដោយក្តីគោរពបងស្រីប្រធានសមាគម»។
ក្រៅពីអ្នកសិល្បៈហើយនោះ អ្នកលេងបណ្ដាញសង្គមជាច្រើននាក់ទៀតក៏បានចូលរួមបញ្ចេញមតិមិនពេញចិត្តដែរថា ៖ «តារាខាងណានាំអោយខូចឈ្មោះតារាគេត្រឹមត្រូវអត់ហើយ» «ម្នាក់នឹងមួយបំផ្លាញកិត្តិយសអ្នកសិល្បៈណាស់បង» «អោយតែគេមើលងាយអ្នកសិល្បះម៉ងមនុស្សប្រភេទនេះ» «មិនដឹងតារាអីទេ ពាក្យថាតារាខ្ពស់ណាស់នៅលើមេឃមិនងាយយកបានឡើយ។ តែពាក្យតារាសម័យនេះផុសតែតាម Tik tok បានថតMV ឬ ពាណិជ្ជកម្មបន្ដិចក៏ក្លាយជាតារា(តារារះលើដី) ។ ខ្ញុំសុំមិនយល់ហិហិ»
ភ្ជាប់ជាមួយករណីខាងលើនេះ អ្នកលេងបណ្ដាញសង្គមភាគច្រើនសុទ្ធតែដាក់ការស្ដីបន្ទោសថា កញ្ញា អាណារ៉ូស តែងតែបង្កសកម្មភាពដែលនាំឱ្យប៉ះពាល់ដល់សេចក្ដីថ្លៃថ្នូរ និងកិត្តិយសរបស់អ្នកសិល្បៈ ជាពិសេសនោះគឺការយកពាក្យជា តារា មកបាំងមុខទង្វើមិនល្អរបស់ខ្លួន។ អ្នកលេងបណ្ដាញសង្គមគ្រប់គ្នាបានអំពាវនាវឱ្យក្រសួងពាក់ព័ន្ធ ជាពិសេសគឺក្រសួងវប្បធម៌ និងវិចិត្រ ពិនិត្យមើលចំពោះករណីនេះ ហើយគួរមានចំណាត់ការការអប់រំណែនាំ បញ្ឈប់សកម្មភាពរបស់កញ្ញាបន្តទៀត៕
