ក្រុមបាល់ទាត់Bengaluru FC របស់ឥណ្ឌា ជាបេក្ខភាពឡើងទៅបំពេញក្នុងពូល D នៃពានរង្វាន់បាល់ទាត់កម្រិតទ្វីបអាស៊ី AFC Cup 2021 ប្រចាំតំបន់អាស៊ីភាគខាងត្បូង ក្រោយយកឈ្នះលើក្រុមបាល់ទាត់Eagles របស់ម៉ាល់ឌីវ ក្នុងវគ្គជម្រុះបឋម។
កីឡាករ Jayesh Dilip Rane របស់ក្រុមBengaluru FC រកបានគ្រាប់បាល់ជ័យជម្នះនៅនាទី២៦ ខណៈលទ្ធផលនេះបានបន្តរហូតដល់ចប់ការប្រកួត។ ដូច្នេះក្រុម Bengaluru FC ឡើងទៅចូលពូល D ជាមួយក្រុម ATK Mohun Bagan របស់ឥណ្ឌា Bashundhara Kings របស់បង់ក្លាដេស និងក្រុម Maziya របស់ម៉ាល់ឌីវ។
ការប្រកួតវគ្គជម្រុះពូល D នេះធ្វើឡើងពីថ្ងៃទី១៨ ដល់២៤ ខែសីហា ឆ្នាំ២០២១ លើទីលានកីឡដ្ឋាន Rasmee Dhandu Stadium ក្នុងទីក្រុង Malé ប្រទេសម៉ាល់ឌីវ ដោយស្វែងរកក្រុមខ្លាំងតែ១ក្រុមឡើងទៅជួបក្រុមNasaf របស់អ៊ូប៊ែគីស្ថាន ឬក្រុម Ahal របស់តួរមេនីស្ថាន ដែលជាក្រុមខ្លាំងមកពីតំបន់អាស៊ីកណ្ដាល៕